Read bura-pabir Aka Yahwana 20 Bible Online

Aka Yahwana 20 - bura-pabir bible

Aka Yahwana 20

¹Antə I wutə mdərthlentərhyel laga thlata amtazi akwa səghəi ka tsəkuramər ku na zurang kula vəi data, ka can laga ola akwa tsiyari.

²Antə tsa ngkəi dragon ni, watau pwapu na aɗi təng waci tə mda ana kəga ni abbər Ɗimi wala Shatan ni, ka mbwi ni mnyar məva dəpu pal.

³Antə mdərthlentərhyel ni ndzəhəuwa ni akwa ku na zurang na kula vəi datə ni, ka harta, ka dləɓtə mnyari ni, har ka məva dəpu pal ni təramta. Akwa saka ngəni tsa aɗi ata mzhi jaktə pwaktə mji kəra wa. Ma sakatə məva dəpu pal ni ku kuri, mda ata msərantə ni mnyar saka laga raka.

⁴Antə I wutə dəkəl kuthlikurayeri, ka mji tə mdə hamta ala ɗa izniyir hara shariya ni andzəndzi ata. Tsuwa I ku wutə mpika mji tə mdə nthləgəmta kəra ɗa kamnyar hara seɗa ata kəra Yesu, ka tsuwa kamnyar ngkər ndərər Hyel ni. Da an aɗi vəngkər səli aka mwaɓi ni, wala aka dludzərni wa ni. Tsuwa da an aɗi dlu seɗar mwaɓi ni ata mumurkəma ɗa wala ata tsiya ɗa wa ni. Antə mji ngəni ku jaktə ndzi ka mpika, ka hara kuthlikur ar məva dəpu pal ata kəma duku ka Kristi.

⁵Amma mambila mji na mtə ni aɗi jaktə wutə mpikə wa, tar ma məva dəpu pal ni ku təramta. Ngəni an thlatər mji akwa mtəmta na ntangkəma.

⁶Ata ndzi sur kucali aka mji na ata wutə kərɗa akwa nca mjir thlata akwa mtəmta ntangkəma ni, kamnyar da akwa nca mji na ɓɗakkarkara. Kamnyar arɗa, mtə na suɗkur ni aɗi ka duna ata kəra ɗa wa, tsuwa da ata ndzi pristayeri ar Hyel ka ar Kristi, ka hara kuthlikur ata kəma duku ka tsa ar məva dəpu pal.

⁷Aghəla tə məva dəpu pal ni ku kuri, antə mda ata sə psi Shatan akwa pərsəna ni.

⁸Antə tsa ata sə səɓəla ka pwaktə shanga mji na akwa duniya, watau Gog ka Magog. Shatan ni ata tsaptə ɗa shang ata kəma duku kamnyar mpa, hangkurər ɗa ata ndzi apa wuyakər mnya manda.

⁹Antə I wutə ɗa titiləmtadzi akwa duniya, ka kalaktə vəi fəliyir sojayeri ar Hyel, ka bərni tə tsa hirhir ni. Amma u'u ku thlata amtazi ka səghəi ata kəra ɗa ka mbamta ɗa.

¹⁰Antə mdə psu shatan na pwaktəmta ɗa ni akwa mandar u'u ka u'u mwapu na ana shiwura ni, akwa vəi tə mdə pumta mwaɓi ka naɓiyayeri ar thlandər akwa ni. Antə da ata ɗar bwani pci ka viri har ba saka madi.

¹¹Antə I wutə Hyel andzəndzi ata dəkəl kuthlikur laga mwapu ola. Antə duniya ka vəi na amtazi ku hwi ka sha, tə mda aɗi jaktə wutə ɗa kəra wa.

¹²Antə I wutə mji mtəmta, na ol'ola ka na raka raka, athləthlata akəma dəkəl kuthlikur ni. Antə mdə ku kəlar kakaɗayeri, tə mdə jaktə kəlar kakaɗə damwa, watau Kakaɗər Mji na ka Mpikə ni. Antə mdə ku hara shariya aka mji na mtəmtari ni ata kəra su tə da hara, apatə mdə ku rəbuta akwa kakaɗayeri.

¹³Antə manda ku hamta mji mtəmta na akwa tsa. Antə Mta ka Duniyar mji mtəmta tsuwa ku hamta mji mtəmta na akəla ɗa. Antə mdə ku hara shariya ala ɗa ata kəra su tə da hara.

¹⁴Antə mdə psu Mta ka Duniyar mji mtəmtə ni akwa mandar u'u. Mandar u'u ngəni an mtə na suɗkur ni.

¹⁵Tsuwa shanga mji na aɗi wutə thləma ɗa rəbutə rəbutari akwa Kakaɗər Mpikə nə wa, mdə pumta ɗa akwa mandar u'u ni.