Read bura-pabir Aka Yahwana 21 Bible Online

Aka Yahwana 21 - bura-pabir bible

Aka Yahwana 21

¹Antə I wutə vəi na amtazi na bilənari ka duniya na bilənari. Vəi na amtazi na ntangkəma ni ka duniya na ntangkəma ni ku kurtə sha, tsuwa manda aɗi kəra wa.

²Antə I wutə Bərni na Ɓɗakkarkara ni, Urushalima na bilənari ni, thlata amtazi adzə Hyel akwa səghəi. Mdə ɗəmhə ni apa amaliya na dəɓamtadzi akwa ləptər kəldzərni kamnyar kəɓa ka salngkiɗa.

³Antə I nggatə kuraku laga ola thlata adzə dəkəl kuthlikur ni akwa pəla abbər, “Kulini Vəi ndzəndziyir Hyel an adzə mjirni! Tsa ata ndzəndzi ata kəma duku kəga da, antə da ata ndzi mjirni. Hyel ka kərari an ata ndzi ata kəma duku kəga da,[2] antə tsa ata sə ndzi Hyelər ɗa.

⁴Tsa ata famta ala ɗa shanga shimwi na ata nca ɗa. Antə mta aɗi kəra wa, tsuwa ɗəffə ɓzəɓza, wala tuwa, wala sur kəta, aɗi kəra wa. Kamnyar suayeri na waci ni shang ku təramta.”

⁵Antə Hyel na andzəndzi ata kəra dəkəl kuthlikur ni pəla, “Kulini I ata namtə shanga su ka da ndzi bilən!” Antə tsa pəla ali, “Rəbutə ngəni, kamnyar ndərayeri ngəni an jiri tə mda amzhi mbərsa kari.”

⁶Antə tsa jaktə pəla ali, “Ku kuri! I an Baɗitari ka Datari, Tsuratari ka Tsikərari. Kəlara mdə na ka thləli, I ata na alari yimər mpika na səɓəla akwa vəi kucirkila ni cauta.

⁷Mdə na ku səma, tsa ata səm kifa akəli. Antə I ata ndzi Hyelərni, antə tsa ata ndzi ɓzərna.

⁸Amma mji na ana thlivəra, ka mjir səm mdəkur, ka mjir hara adiyakur, ka mjir tsi mda, ka karwayeri, ka mjir hakdzi, ka mjir nu haptu, ka shanga mjir thlandər, nəɓwar ɗa an akwa mandar u'u na ana mba ka u'u mwapu na ana shiwura. Ngəni an mtə na suɗkur ni.”

⁹Antə pal akwa nca mjirthlentərhyel na murfa na ka tasayeri ol'ola murfa, nghyinghyari ka bwaniyayeri na akwa tsikərari ni, si ka pəla ali, “Asəra, kəi ncanta ala ga amaliya, na mwalar Ɓzər Gam ni.”

¹⁰Antə Mambəl si ata kəri, tə mdərthlentərhyel ni kətə ra ka mwantə ra ata kəra gar laga ola ka nal, ka ncanta ali Urushalima, Bərni na Ɓɗakkarkara, thlata amtazi adzə Hyel akwa səghəi.

¹¹Bərni ni akwa mbəlmbəla ka səliyir Hyel, mbələrni apa pela daraja na zum ta hwada, apa jaspa, hulang apa gəlas.

¹²Tsa ka katangga na ola ka nal, ka nyarfayeri kumnya suɗa, ka mjirthlentərhyel kumnya suɗa akwa wul nyarfayeri ni. Tsuwa mdə ku rəbutə thləma nyarmbwayeri na kumnya suɗa ar Israila ni ata nyarfayeri ni.

¹³Nyarfayeri aɗi makər abwa raghəi, ka damwa makər abwar yala, ka damwa makər abwar anəm, ka damwa makər tsuwa abwar ramta.

¹⁴Mdə nci səla katanggar bərni ni ka pelayeri kumnya suɗa ar səla mbwa, natə mdə rəbutə thləma aposəlayeri na kumnya suɗa ar Ɓzər Gam ni ata.

¹⁵Tsuwa mdərthlentərhyel na gari ali ni ka zwalər dinar ar ngkərtə su, kamnyar ngkərtə bərni ni, ka nyarfayeri ar bərni ni, ka katanggarni ni.

¹⁶Bərni ni ka kuɗəma nfwar, saɓəlkurərni ka baukurərni shang kalkal. Sakatə tsa ngkərtə bərni ni ka zwalər ngkərtə su ni, antə tsa wuta abbər saɓəlkurari, ka baukurari, ka nalkurari shang kalkal, saɓəlkur kəlara pal akwa nca ɗa an kilomita dəpu suɗa ka aru nfwar.

¹⁷Antə tsa ngkərtə dza katangga ni ka wuta abbər nalkurərni dzartsi aru pal ka nfwarkumari ka nfwar, dzartsi tə mda ana kəthlər kəgari antə mdərthlentərhyel ni kəthlər kəgari.

¹⁸Mdə hən katangga ni ka pelar daraja tə mda ana kəga jaspa, ka hən bərni ni ka dinar swakti, antə tsa ndzi hulang apa gəlas.

¹⁹Tsuwa mdə dəɓatə pelayeri ar səla katanggar bərni ni ka shanga pelayeri ar daraja tə mdə patə ɗa ata. Pela na ntangkəma akwa səla katangga ni an jaspa, na suɗkur sapfiya, na makərkur agat, na nfwarkur Emeral,

²⁰na ntəfkur oniks, na ngkwakur karneliyan, na murfəkur kirisolat, na nciskur beril, na əmdləkur topaz, na kumkur daimon, kumkantangkur jasinth, na kumnya suɗkur amethlis.

²¹Mdə nam nyarfayeri na kumnya suɗə ni ka liya dəɓa na ata mbəlmbəla kumnya suɗa, kəlara nyarfu ka pelar dəɓa pal. Mdə nam lakur kuta di ni ka dinar swakti, tə tsa ndzi hulang apa gəlas.

²²I aɗi wutə mbwar vəngkər səli akwa bərni nə wa, kamnyar Mthlaku na Hyel na ka Duna ta Shang ka Ɓzər Gam ni an mbwar vəngkər səli ni.

²³Tsuwa bərni ni aɗi akwa tur parakər pci wala parakər thliya wa, kamnyar səliyir Hyel akwa hamta alari parakəu, tsuwa Ɓzər Gam ni an pitəlarni.

²⁴Shanga mjir duniya ata sə mwa akwa parakər bərni ni, antə shanga kuthlyayeri na akwa duniya ata sə səntə gənar ɗa akwa bərni ni.

²⁵Nyarfayeri ar bərni ni ata ndzi kəlarkəlarari surkə pci, tsuwa viri aɗi anda wa.

²⁶Tsuwa mjir duniya ata sə səntə shanga gəna na ka səli akwa duniya ni akwa bərni ni.

²⁷Amma su na adiya aɗi ata səkwa bərni nə wa, zhar ka mdər hara sur cika wala thlandər wa. Amma tar mji natə mdə ku rəbutə thləma ɗa akwa Kakaɗər Mpika na ar Ɓzər Gam ni an ata ləkwa bərni ni.