Read bura-pabir Aka Yahwana 22 Bible Online

Aka Yahwana 22 - bura-pabir bible

Aka Yahwana 22

¹Aghəla nda antə mdərthlentərhyel ni ncanta ali thlyaghar yimər mpika na yilang apa gəlas, akwa hwi səɓəla adzə dəkəl kuthlikur ar Hyel ka Ɓzər Gam ni,

²ka hwi ləghəi akwa ɗəffa laku ar bərni ni. Ata mnya thlyagha ni abwani ka aɓəla bwanda, nfur mpika aɗi na ana ya ka kumnya suɗa akwa məva, kəlara thliya tsa ana ya. Tsuwa mda ana kəthlər ka thlaliyirni kamnyar kuri shilkər mjir duniya.

³Su aɗi tə mda ata sə jaktə shuwumtari kəra wa. Kamnyar dəkəl kuthlikurər Hyel ka Ɓzər Gam ni an ata ndzi akwa bərni ni, tsuwa mafayeri arni ata vəngkər səli alari.

⁴Da ata wutə kəmari, tsuwa mda ata rəbutə thləmari ata mumurkəma ɗa.

⁵Viri aɗi ata hara kəra wa, antə da aɗi ata tur pitəla wala parakər pci wa, kamnyar Mthlaku na Hyel ata ndzi parakər ɗa. Antə da ata hara kuthlikur ba saka madi.

⁶Antə mdərthlentərhyel ni pəla ali, “Ndərayeri ngəni an jiri tsuwa mda ata mzhi mbərsa kari. Antə Mthlaku, Hyel na hamta Mambələr ni aka naɓiyayeri ni, thlentə mdərthlentərni ka tsa ncanta aka mafayeri arni su na ku ndzi dwali ka tsa hara kula shamta saka.”

⁷“Nggədza tsuwa aɗi ata fəi wa, I ata si təkəma. Ata ndzi sur kucali aka mji na ku kələngkər aka ndərayeri ar naɓikur na akwa kakaɗə ngəni ni!”

⁸I na Yahwana ni, I an nggatə ka wutə shanga suayeri ngəni ni. Tsuwa sakatə I ku kuri nggatə ɗa ka wutə ɗa, I zuzuri adzə səla mdərthlentərhyel na ncanta ali suayeri ni, kamnyar kəi vəngkər səli alari.

⁹Amma tsa pəla ali, “Ga aɗiya hara apani wa! I an mdər kəthlər tsu apa, ga, kəga maɗama' nga na naɓiyayeri, ka shanga mji na akwa kələngkər aka ndərayeri na akwa kakaɗə ngəni ni. Hyel antə ga ata vəngkər alari səli!”

¹⁰Antə tsa jaktə pəla ali, “Ga aɗiya hartə ndərər naɓikur na akwa kakaɗə ngəni nə wa, kamnyar saka ku hara kudzəha.

¹¹Ka mdə na ɗimi ləkəma akwa hara ɗimikurərni. Ka mdə na adiya ləkəma akwa hara adiyakurərni. Ka mdə na ɓɗaku ləkəma akwa hara ɓɗakkurərni. Ka mdə na ɓɗakkarkara ləkəma akwa ndzi ɓɗakkarkara.

¹²“Aɗi ata fəi wa, I akwa si təkəma! I akwa si ka watsəɓa akwa tsi, kəi hamta aka kəlara mda kalkal ka su tə tsa ku hara.

¹³I an Baɗitari ka Datari, Tsuratari ka Tsikərari, na Ntangkəma ka na akwa Kurari.”

¹⁴Ata ndzi sur kucali aka mji na ku kəcimta ləptayeri arɗa. Kamnyar mda ata zhar ɗa ka da ləvəi akwa nyarfur bərni ni, ka səm yar nfu na ata nfur mpikə ni.

¹⁵Amma mji na aɓəla ata hildi ni an kilayeri, ka mjir hakdzi, ka mjir karwakur, ka mjir tsi mda, ka mjir nu haptu, ka shanga mji na ana hir thlandər, ka na ana thlandər.

¹⁶“I na Yesu ku thlentə mdərthlentərhyel arna ala giri, ka seɗa ngəni aka ikələziyayeri. I an kəkar Dauda. I an dzardzar na parakəu.”

¹⁷Antə Mambəl ka Amaliya ni pəla, “Asəra!” Tsuwa ka shanga mji na akwa ku nggatə karatə ni pəla, “Asəra!” Tsuwa ka shanga mji na ka thləli si, ka tsuwa shanga mji na akwa bara yimər sa, sa yimər mpikə ni gapani.

¹⁸I na Yahwana, akwa tsaktə kəlara mdə na ku nggatə ndərər naɓikur na akwa kakaɗə ngəni ni, abbər kəlara mdə na ku jakəngkər su, Hyel ata jakəngkər alari bwaniyayeri natə mdə ngkər akwa kakaɗə ngəni ni.

¹⁹Tsuwa kəlara mdə na ku kəmta su akwa ndərər naɓikur na akwa kakaɗə ngəni ni, Hyel ata dlutsə bwarni na akwa yar Nfur Mpikə ni, ka bwarni na akwa bərni na Ɓɗakkarkara ni, apatə mdə ku ngkərɓəla akwa kakaɗə ngəni ni.

²⁰Mdə na ku hamta seɗa ata kəra shanga su ngəni ni akwa pəla, “Jiri I akwa si taktar!” Amin. Ka gə si, Mthlaku Yesu!

²¹Ka Mthlaku Yesu hara ɓɗakkur aka shanga giri na mjir Hyel.[3] Amin.