Read bura-pabir Aka Yahwana 3 Bible Online

Aka Yahwana 3 - bura-pabir bible

Aka Yahwana 3

¹“Ka gə rəbuta aka mdərthlentərhyel ar ikələziya na ahar Sardis ni abbər, “Ngəni an ndər na thlata akəla mdə na ka mambəlayeri murfa na ar Hyel ka sasəlkayeri murfə tsuwa. “I asəndə shanga su tə ga ana hara. Mda akwa wulari apa gə ka mpika, amma gə mtəmtari.

²I ku nggaɓəla abbər surharar nga na mdər nuwa aɗi mwanta apatə Hyelərna akwa barari wa. Antə thlata akwa heni ni! Ka gə jakə duna aka su na mbila akəla ga ata mnya mtə ni.

³Ɗangtə thlipə natə gə nggatə ntangkəma ka dlu ni, kara kəsi ɓɗaku, ka gə tubi. Ma ga aɗi thlatə wa, I ata si ata kəra ga apa mdər həla, tsuwa ga aɗi ata səndə sakatə I ata si nə wa.

⁴Amma tsu mji laga aɗi raka akwa nca giri ahar Sardis na aɗi diɓərantə ləptər ɗa ka ɗimikur wa. Antə da ata sə mwa ata kəma duku ka iya, akwa kari na mwapu kamnyar da ku mzhi.

⁵Kəlara mdə na ku səma, mda ata hadza alari ləptu na mwapu, tsuwa I aɗi ata cajimta thləmari akwa kakaɗər mpikə wa. Amma ma sakatə I ku thləthlata akəma Təddarna ka mjirthlentərni, I ata psəmnya thləmari abbər tsa arna.

⁶Mdə na ka thləmər nggatə su, ka tsa nggatə su tə mambəl ata pəla aka ikələziyayeri.”

⁷“Ka gə rəbuta aka mdərthlentərhyel ar ikələziya na ahar Filadelfiya, “Ngəni an ndər na thlata akəla mdə na ɓɗakkarkara ka na jiri, tsa na ka tsəkuram ar Dauda, tsa natə ma tsa ku kəlari, mdər hartari aɗi wa, ma tsa ku hartə tsuwa, mdər kəlarari aɗi wa ni.

⁸I asəndə shanga suayeri tə ga ana hara. Antə nggədza I ku zhar nyarmbwa bwang akəma ga, natə mdər mzhi hartari aɗi wa. Tsuwa I ku sənda abbər duna gə raka, amma wala apani ga ku kələngkər aka ndərərna, ga aɗi kampikərna wa.

⁹Antə kulini, I ata hara ka mjir Shatan na ana thlandər abbər da mjir Hyel amma aɗi jiri wa ni, ka da zuzuri adzə səla ga, kamnyar ka da nggaɓəla abbər I hir nga.

¹⁰Tsuwa təng tə ga ku ɓəlatə ndərərna atar nggitər su tə gə hara, I ata ɓəlatə nga akwa sakar bwani na ata si ata kəra duniya kamnyar ngkərtə shanga mjir duniya ni.

¹¹I akwa si kula shamta saka. Antə ka gə kəsi su tə gə kəgari ni ɓɗaku, ta mda asə dlutsə dzakwar kuthlikur na ar nga.

¹²Mdə na ku səma, I ata namtə ni ka tsa ndzi zhimbwalər mbwar Hyel arna, antə tsa aɗi ata sə ləɓəla kazhar vəi nə wa. Tsuwa I ata rəbutə thləma Hyelərna ata tsa, ka thləma bərni na ar Hyelərna, watau Urushalima na bilən, na ata səghəi akwar amtazi akəla Hyel arna. Tsuwa I ata rəbutə thləmi na bilən ni ata tsa.

¹³“Mdə na ka thləmər nggatə su, ka tsa nggatə su tə Mambəl akwa pəlari aka ikələziyayeri!”

¹⁴“Ka gə rəbuta aka mdərthlentərhyel ar ikələziya na ahar Lawudikiya ni abbər, “Ndər ngəni thlata akəla Amin. Tsa an mdər seɗa na ka jirkur ka na jiri, tsa an baɗitər su tə Hyel namta.

¹⁵I asəndə shanga suayeri tə ga ana hara. Antə ga aɗi mtathlaku wa, wala bwarbwar wa. Kuji ma ga an mtathlaku wala bwarbwar!

¹⁶Amma təng tə gə ləffa, tə aɗi mtathlaku wala bwarbwar wa ni, I ata sə tifəɓəla nga akwa mnyi.

¹⁷Kamnyar ga ana pəla, ‘I ka gəna, I ku wutə su hang, antə I aɗi akwa tur su kəra wa.’ Amma ga aɗi sənda abbər gə hilhilari ka sur kətadzə wa! Ai gə ngguɗi, ka mdlyang, ka dura.

¹⁸Antə I akwa na gə sauri abbər ka gə mastə dinar akəli, dinar tə mdə thləlɓəla akwa u'u, kamnyar ka gə ndzi ka gəna, ka mastə ləptayeri kamnyar hartə vəi durakurər nga, ta ashira ga andzi ata bəbal ka gə ləkwa səli. Ka gə mastə kuzəkər nca akəli, ka gə fadza aka nca ga kamnyar ka nca gə wutə su ɓɗaku.

¹⁹Shanga mji tə I hira, I ana mpa ala ɗa ka ɗi ɗa tsuwa. Antə ka gə vu ɗəffa ga kara tubi.

²⁰Nggədza ra athləthlata anyarmbwa akwa tsarar nyarmbwa ni. Kəlara mdə na ku nggatə kurakəi ka kəlar ali nyarmbwa ni, I ata ləmbwa adzə ni, kəi səma ata kəma duku ka tsa, yeru ka tsa ata kəma duku.

²¹“Kəlara mdə na ku səma, I ata hara ka tsa ndzəndzi adzə ra ata dəkəl kuthlikurərna, tsu apatə I ku səma ka ndzəndzi ka Təddarna ata dəkəl kuthlikurərni.

²²“Mdə na ka thləmər nggatə su, ka tsa nggatə su tə Mambəl akwa pəlari aka ikələziyayeri!”