Read bura-pabir Aka Yahwana 4 Bible Online

Aka Yahwana 4 - bura-pabir bible

Aka Yahwana 4

¹Aghəla ngəni antə I jaktə wulsu, ka wutə nyarmbwa laga bwang amtazi! Antə kuraku na ntangkəma tə I nggata akwa gari ali apa kuraka təmbəl ni pəla, “Asəra amtazi, kəi ncanta ala gə su natə ku ndzi dwali ka tsa hara aghəla ngəni.”

²Antə Mambəl si ata kəri təkəma, tə I wutə dəkəl kuthlikur laga amtazi, ka mdə laga andzəndzi ata.

³Tsuwa mdə na andzəndzi ata dəkəl ni akwa mbəlmbəla apa jili pelayeri laga jaspa ka karneliyan. Tsuwa su na kalaktə dəkəl kuthlikur ni an kigyau laga na akwa mbəlmbəla apa pelar emeral.

⁴Su na kalaktə dəkəl kuthlikur ngəni tsuwa an dəkəlayeri laga sərkumari ka nfwar, ka mji ol'ol laga sərkumari ka nfwar andzəndzi ata dəkəlayeri ni. Shanga ɗa ka ləptər ɗa mwapmwapu ka dzakwar kuthlikur tə mdə nam ka dinar ata kəra ɗa.

⁵Antə parakə laga apa wurka ku thlata adzə dəkəl ni, ka kurakayeri laga, ka tsuwa kurakayeri ar dlərər Hyel. Tsuwa akəma dəkəl kuthlikur ni an zafayeri laga murfa na akwa mba, natə da an Mambəlayeri na murfa ar Hyel.

⁶Tsuwa akəma dəkəl kuthlikur ni su laga aɗi na dludzi ka mandar gəlas, na akwa mbəlmbəla apa pelar dəɓa laga ata pci. Tsuwa mwaɓiyayeri laga aɗi nfwar na kalaktə dəkəl kuthlikur ni, kəlara pal akwa thlimbəlari pal. Tsuwa kəlara pal akwa nca mwaɓiyayeri ni ka ncayeri hang abwakəma ka abwahili.

⁷Mwaɓi na ntangkəma ni dludzi ka tsəngi, na suɗkurari ni dludzi ka gyal thla, na makərkurari ka kəmari apa mda, mwaɓi na nfwarkurari dludzi ka duku na akwa fəla.

⁸Kəlara pal akwa nca mwaɓiyayeri na nfwar ni ka ɓəɓəku ngkwa ngkwa. Tsuwa dza ɗa ku kalaktədzi ka ncayeri, aɓəlaɓəla ka avivi, antə pci ka viri da akwa hara ha kula tsamta. Da akwa hara ha abbər, “Ɓɗakkarkara, Ɓɗakkarkara, Ɓɗakkarkara, an Mthlaku Hyel na ka Duna ta Shang! Tsa aɗi waci, ka kulini, ka akwa si!”

⁹Tsuwa kəlara saka mwaɓiyayeri na nfwar ni ana hara hayeri ar nar səli ka olkur, ka gwaɗita aka tsa na ata dəkəl ni, na ka mpika har ba saka madi ni,

¹⁰mji na ol'ola sərkumari ka nfwar ni ana ndla akəma mdə na andzəndzi ata dəkəl kuthlikur ni, ka vəngkər səli aka mdə na har ba saka madi ni. Antə da ana pwi sur bar kərər ɗa akəma dəkəl kuthlikur ni, akwa ha ka pəla,

¹¹“Mthlaku na Hyelər yeru, ga ku mzhi ka səli ka olkur ka duna ndzi ar nga. Kamnyar ga an namtə shanga suayeri, tsuwa ka hirər nga antə da aɗi, ka hirər nga antə gə namtə ɗa!”