Read bura-pabir Aka Yahwana 5 Bible Online

Aka Yahwana 5 - bura-pabir bible

Aka Yahwana 5

¹Antə I wutə kakaɗu laga pərpərari na ka rəbuta ata, kutari ka hilari, akwa tsi mazəma mdə na ndzəndzi ata dəkəl kuthlikur ni. Antə mdə ku dləɓta ka sur dləɓtər kuthlikur murfa.

²Antə I wutə mdərthlentərhyel laga na ka duna akwa psəmnya ka kuraku na ola abbər, “Wan tə ɓɗakkurərni ku mzhi ka tsa mbwaləmta sur dləɓtər kuthlikur ni, ka tsa kəlar kakaɗə nə ri?”

³Amma mda aɗi wala duku na amtazi, wala akwa duniya, wala akira duniya, natə ɓɗakkurərni ku mzhi ka tsa kəlar kakaɗə ni, zhar ka karatə su na akwa kutari wa.

⁴Antə I ku tuwa ka duna kamnyar tə mda aɗi mzhi wutə mdə na amzhi kəlar kakaɗə ni, ka karatə su na akwa wa ni.

⁵Antə pal akwa nca mji na ol'ola ni pəla ali, “Ga aɗiya tuwa wa. Nggədza Tsəngi na akwa nyarmbwar Yahuda, na Kəkar Dauda ni ku səmi. Antə tsa ata mzhi mbwaləmta sur dləɓtər kuthlikur na murfə ni ka kəlar kakaɗə pərpərari ni.”

⁶Antə I wutə Ɓzər Gam ni athləthlata akwa ɗəffa bəbalər dəkəl kuthlikur ni, ka mwaɓiyayeri ngəni nfwar ni, ata ɗəffa mji ngəni ol'ol nfwar ni. Tsuwa Ɓzər Gam ni athləthlata apa mdə ku ɗar tsi ni. Ɓzər Gam ni ka təmbəlayeri murfa, ka ncari murfa, na ndzi kalkal ka Mambəlayeri na murfa tə Hyel thlentə ka da ra hara alari kəthlər akwa shanga duniya ni.

⁷Antə Ɓzər Gam ni ku mwari ka dlu kakaɗə na pərpərari ni akwa tsi mazəma mda na andzəndzi ata dəkəl kuthlikur ni.

⁸Sakatə tsa ku dlu kakaɗə ni, antə mwaɓiyayeri na nfwar ni, kəga mji na ol'ola sərkumari ka nfwar ni, ndla akəma Ɓzər Gam ni. Kəlara pal akwa nca ɗa ka guləm akwa tsiyari, ka tasayeri na ol'ola ar dinar nghyinghyari ka sur shiwura na msəra, natə da an adduwayeri ar mji na ɓɗakkarkara ar Hyel.

⁹Antə da hara ha laga bilən, abbər, “Ga an ɓɗakkur na ku mzhi ka gə kətə kakaɗə na pərpərari ni ka mbwaləmta sur dləɓtər kuthlikur ni. Kamnyar waci mdə ku tsi nga, tsuwa atar mamshir nga ga ku pəli mji aka Hyel akwa kəlara dur, ka mnya, ka mji, ka kəlara tsəɗi.

¹⁰Ga ku namtə ɗa tə da ndzi kuthlyayeri ka da hara kəthlər aka Hyel apa Pristayeri antə da ata hara kuthlikur ata kəra duniya.”

¹¹Sakatə I jaktə wula, antə I nggatə kuraka mjirthlentərhyel dlama dlama, dəpu dəpwayeri. Da athləthlata ka kalaktə dəkəl kuthlikur ni, ka mwaɓiyayeri na nfwar ni, ka mji na ol'ola ni,

¹²akwa hara ha ku kuraku abbər, “Ɓzər Gam natə mdə tsi ni, ku mzhi ka mdə nar kuthlikur, ka gəna, ka ɗəɗukur, ka duna, ka olkur, ka səli ka huwa!”

¹³Tsuwa I ku nggatə shanga su tə Hyel namta amtazi, ka akwa duniya, ka akira duniya, ka akwa manda, ka shanga su na ka mpika akwa da, akwa hara ha abbər, “Ka huwa, ka olkur, ka səli, ka kuthlikur, ndzi aka mdə na andzəndzi ata dəkəl kuthlikurərni, ka aka Ɓzər Gam ni, ba saka madi!”

¹⁴Antə mwaɓiyayeri na nfwar ni shinau ka pəla, “Amin!” Antə mji na ol'ol ni tsuwa ku ndla ka vəngkər səli aka Ɓzər Gam ni.