Read bura-pabir Aka Yahwana 6 Bible Online

Aka Yahwana 6 - bura-pabir bible

Aka Yahwana 6

¹Antə I wutə Ɓzər Gam ni mbwaləmta pal akwa nca sur dləɓtər kuthlikur na murfə ni. Antə I nggatə pal akwa nca mwaɓiyayeri na nfwar ni pəla ka kuraku apa kurakər dlərər Hyel abbər, “Asəra!”

²Sakatə I wula, təng nggədza taku laga mwapu, ka mda ata hila taku ni ka lali akwa tsiyari. Antə mdə hamta alari dzakwar kuthlikur. Antə tsa ləɓəla apa mdə na ku səma an akwa ra jaktə səma.

³Sakatə Ɓzər Gam ni jaktə mbwaləmta sur dləɓta na suɗkur ni, antə I ku nggatə mwaɓi na suɗkur ni akwa pəla, “Asəra!”

⁴Antə taku damwa ku səɓəla mamza apa u'u! Antə mdə nar izni aka mdə na ata hila taku ni abbər ka tsa kələmta msərakur kazhar kəra duniya, kamnyar ka mji tsəgəi nvwa ɗa. Antə mdə ku na alari katsakar na ola.

⁵Sakatə Ɓzər Gam ni ku jaktə mbwaləmta sur dləɓta na makərkur ni, antə I nggatə mwaɓi na makərkur ni akwa pəla, “Asəra!” Sakatə I wula, antə I wutə taku laga mənggəl, ka mdə laga ata hila taku ni, ka sur ngkərtə kəgəɓkurər su akwa tsiyari.

⁶Antə I nggatə su laga apa kuraku akwa səɓəla akwa nca mwaɓiyayeri na nfwar ni, akwa pəla abbər, “Tasar alkama natə hangkur kwabari an su tə lebəra ata wutari akwa ɓukcir pci, ka tasa makər ar barli natə hangkur kwabari an su tə lebəra ata wutari akwa ɓukcir pci. Amma mda aɗiya gyalntə mal zaitun wala yimər anap wa.”

⁷Antə Ɓzər Gam ni jaktə mbwaləmta sur dləɓta na nfwarkur ni, antə I nggatə mwaɓi na nfwarkur ni akwa pəla, “Asəra!”

⁸Sakatə I wula, antə I wutə taku laga kwalharra, ka mdə laga ata hila taku ni. Thləma mdər fəl taku ni an Mta ka Kula akwa nu dəlpari. Antə mdə hamta ala ɗa kuthlikur ata kəra bwa nfwarkur ar mjir duniya, ka da tsəgəi ɗa ka katsakar, ka mi, ka shilku ka tsuwa atar mwaɓiyayeri na akwa mtaku.

⁹Sakatə Ɓzər Gam ni mbwaləmta sur dləɓta na ntəfkur ni, antə I wuta akira bagaɗi ni mpika mji tə mdə tsəgəi kamnyar ngkər ndərər Hyel, ka kamnyar ndzi ka jirkur ata kəra seɗar ɗa.

¹⁰Antə da haptə kuraku akwa pəla, “Mthlaku na ka Duna ta Shang, ga an ɓɗakkarkara ka na ka jiri! Nawa antə ga ata sə hara shariya aka mjir duniya ri, ka gə ntəmta ɗimikur tə da hara ala yeru atar tsəgəi yeru ni?”

¹¹Antə mdə ku hamta ləptu mwapu aka kəlara mda akwa nca ɗa, ka pəla ala ɗa abbər ka da ɗar ghərəmtaghəra asəgu, har tar ma mdə ku kuri tsəgəi shanga mafayeri nvwa ɗa kəga maɗama' ɗa tsu apatə mdə ku tsəgəi ɗa ni.

¹²Sakatə Ɓzər Gam ni ku mbwaləmta sur dləɓta na ngkwakur ni, antə I wutə duniya kənggərantədzi ka duna. Antə pci ngka mənggəl apa yadə mənggəl, antə thliya ngka mamza pit apa mamshi.

¹³Antə sasəlkayeri təgəri akwa duniya tsu apatə yar kamndə na aɗi ng'hə wa ana təgəri ata nfur ɗa akwa sakatə shambar na ka duna ku fi ni.

¹⁴Antə vəi na amtazi ku sha apatə mda ana pərtə sərpi ka təra kəgari. Tsuwa tsa fagamta shanga garayeri kəga ɗəɗəgəlayeri kazhar vəi ndzəndziyir ɗa.

¹⁵Antə kuthlyayeri ar duniya, ka mji na ka olkur, ka mji na ol'ola ar mpa, ka mjir gəna, ka mjir kuthlikur, ka shanga mambila mji, mafa ka ɓzər kuta, ku kəɗar abbər ka da ɗuwamtadzi akwa gulayeri, ka akira pelayeri akwa garayeri.

¹⁶Da akwa kəga garayeri ka gagəmayeri abbər, “Ndlangkər girdzi ala yeru, ka giri ɗuwamta yeru ta mdə na andzəndzi ata dəkəl kuthlikur ni, ka tsuwa ta ɗəffə bwarbwarkur ar Ɓzər Gam ni!

¹⁷Kamnyar vir na mwavər ar ɗəffə bwarbwarkur arɗa ku si, antə wan ata mzhi nggitari ri?”