Read bura-pabir Aka Yahwana 7 Bible Online

Aka Yahwana 7 - bura-pabir bible

Aka Yahwana 7

¹Aghəla ngəni I wutə mjirthlentərhyel laga nfwar athləthlata akwa kuɗəma nfwar ar duniya ni, akwa ngkatə shambarayeri na nfwar ar duniya ni, ta da asə fya ata di, wala ata kəra manda, wala akwa nfu laga.

²Antə I wutə mdərthlentərhyel damwa na thlata abwar raghəi ka sur dləɓta ar Hyel na ka mpika. Antə tsa kəga mjirthlentərhyel na nfwar natə Hyel hamta ala ɗa dunar hilantə duniya ka manda ni. Tsa kəga ɗa ka kuraku na ola,

³abbər, “Giri aɗiya hilantə duniya, wala manda wala nfwayeri wa, tar ma yeru ku dləɓtə su laga ata mumurkəma mafayeri na ar Hyelər mburu.”

⁴Antə I nggatə hangkur mji tə mdə dləɓta ala ɗa su akwa nyarmbwayeri na kumnya suɗa ar Israila ni, mji dəpu aru ka nfwarkumari ka nfwar.

⁵Nggədza laku tə mdə nuwa ka dləɓtə su aka nyarmbwayeri ar Israila ni. Akwa nyarmbwar Yahuda, mji dəpu kumnya suɗa, akwa nyarmbwar Ruben, mji dəpu kumnya suɗa, akwa nyarmbwar Gad, mji dəpu kumnya suɗa,

⁶akwa nyarmbwar Asher, mji dəpu kumnya suɗa, akwa nyarmbwar Naftali, mji dəpu kumnya suɗa, akwa nyarmbwar Manasse, mji dəpu kumnya suɗa,

⁷akwa nyarmbwar Simeyon, mji dəpu kumnya suɗa, akwa nyarmbwar Lawi, mji dəpu kumnya suɗa, akwa nyarmbwar Issakar, mji dəpu kumnya suɗa,

⁸akwa nyarmbwar Zebulun mji dəpu kumnya suɗa, akwa nyarmbwar Yusuf, mji dəpu kumnya suɗa, akwa nyarmbwar Benjamin, mji dəpu kumnya suɗa.

⁹Aghəla ngəni I wula ka wutə mji dlama dlama natə mda amzhi jikatari wa! Da səɓəla akwa shanga tsəɗiyayeri, ka shanga durayeri, ka shanga mji, ka shanga mnyayeri, ka thləthlata akəma dəkəl kuthlikur ni, ka akəma Ɓzər Gam ni. Da hadzə ləptayeri na mwapmwapu, ka thlali dipənau akwa tsiya ɗa.

¹⁰Da akwa tuwa ka kuraku akwa pəla, “Mbantədzi ana thlata akəla Hyelər mburu, na andzəndzi ata dəkəl kuthlikur, ka akəla Ɓzər Gam ni.”

¹¹Antə shanga mjirthlentərhyel thləthlatə ka kalaktə dəkəl kuthlikur ni, ka mji na ol'ola ni, ka mwaɓiyayeri na nfwar ni. Antə da ndla ka kəma ɗa ata di akəma dəkəl kuthlikur ni, ka vəngkər səli aka Hyel,

¹²akwa pəla, “Amin! Ka huwa ka səli, ka ɗəɗukur, ka usa ka huwa, ka olkur ka kuthlikur, ka duna ndzi aka Hyelər mburu har ba saka madi! Amin.”

¹³Antə pal akwa nca mji na ol'ol ni yu ra ka pəla, “Kəga wa an ka ləptayeri mwapmwapu nə ri? Tsuwa da thlata ama ri?”

¹⁴Antə I pəla, “Zanuwa, Ai ga ana sənda.” Antə tsa pəla ali abbər, “Nayeri ni an mji na səɓəla akwa bwani na mwavər ni. Da ku kəcimta ləptayeri arɗa akwa mamshir Ɓzər Gam ni, ka ndzi mwapmwapu.

¹⁵An su na hara, “Tə da thləthlata akəma dəkəl kuthlikurər Hyel akwa hara alari kəthlər pci ka viri akwa mbwarni ni. Tsa na andzəndzi ata kəra dəkəl kuthlikur ni ata ɗuwar ɗa akwa tentərni ka tsa ɓəlatə ɗa.

¹⁶Antə da aɗi ata jaktə nggatə mi kəra wa, wala ka thləli jaktə kətə ɗa kəra wa, bwarbwarkur pci aɗi ata jaktə tsa ɗa wa, wala ka pci jaktə mba dza ɗa wa.

¹⁷Kamnyar Ɓzər Gam na adzə dəkəl kuthlikur ni, ata ndzi mdər ɓəla ɗa, antə tsa ata mwantə ɗa akwa vəi kucirkila na ata hamta yimər mpika. Antə Hyel ata famta shanga shimwi na ata nca ɗa.”