Read bura-pabir Aka Yahwana 9 Bible Online

Aka Yahwana 9 - bura-pabir bible

Aka Yahwana 9

¹Antə mdərthlentərhyel na ntəfkur ni ku mbur təmbələrni. Antə I wutə sasəlka laga thlata amtazi ka təri akwa duniya. Antə mdə hamta alari tsəkuram ar ku na zurang na kula vəi datari.

²Antə tsa kəlar ku natə vəi datari aɗi wa ni, antə ɗer laga səɓəla apa ɗerər kəthla na ola, har tə parakər pci ka shambar ku ndzi mənggəl ka ɗer na səɓəla akwa ku ni.

³Antə ntsəkwayeri səɓəla akwa ɗer ni, ka səghəi akwa duniya. Antə mdə hamta ala ɗa dunar nji mda apa hiɗayeri.

⁴Antə mdə pəla ala ɗa abbər da aɗiya dəkəi kusar wa, wala nfwayeri wa, wala su damwa wa, tar mji na aɗi ka seɗar Hyel ata murkəma ɗa wa.

⁵Mda aɗi pəla aka ntsəkwayeri ni ka da tsəgəi mji wa, amma ka da hara ala ɗa bwani ar thliya ntəfu daci. Tsuwa jili njir ntsəkwayeri ni ata kəta apa njir hiɗi.

⁶Akwa kuta thliyayeri ngəni ntəfu ni, mji ata sə bara mta, amma da aɗi ata wutari wa. Da ata sə bara nggukə mta, amma mtə ni ata sə hwi kazhar ɗa.

⁷Ntsəkwayeri ni ndzi apa takwayeri na ɗəmhəɗəmhari kamnyar ləkwa mpa. Da ka su laga na dludzi ka dzakwar kuthlikur ar dinar ata kəra ɗa, ka kəma ɗa apa kəma mji.

⁸Shishir kəra ɗa dludzi ka shishir kəra mwanki, ka thlira ɗa apa thlira tsəngi.

⁹Mdə hartə kərathla ɗa ka su laga na dludzər ləptər liya mənggəl, ka kuraka ɓəɓəka ɗa apa kuraka takwayeri na hang akwa ndəkər wagənayeri akwa hwi ləkwa mpa.

¹⁰Shanga ɗa ka kur, antə da akwa nja apa hiɗi. Da ka dunar dəkəi mji mnyar thliya ntəfu ka kura ɗa ni.

¹¹Da ka kuthlir ɗa, na mdərthlentərhyel ar ku na zurang kula vəi datari. Thləmari akwa mnya Ibrani an Abaddon, akwa mnya Helleni thləmari an Apolliyon, tsuwa karapwari an “Mdər Hilantə Su.”

¹²Bwani na ntangkəma ku təramta, tsuwa ku mbil suɗa tsu akwa lakur si.

¹³Antə mdərthlentərhyel na ngkwakur ku mbur təmbələrni. Antə I nggatə kuraku laga akwa səɓəla akwa kuɗəmayeri nfwar ar bagaɗi tə mdə nam ka dinar na akəma Hyel ni.

¹⁴Kuraku ni akwa pəla aka mdərthlentərhyel na ngkwakur na ka təmbəl ni abbər, “Psi mjirthlentərhyel na nfwar tə mdə mbwi adzə Thlyagha Yufiretis ni!”

¹⁵Antə mdə ku psi mjirthlentərhyel na nfwar ni, natə mdə ɗəmhə kamnyar awur ngəni na ar vir ngəni, ka thliya ngəni, ka məva ngəni ni abbər ka da tsəgəi bwa pal akwa makər ar shanga mji ni.

¹⁶Antə I nggatə hangkur sojayeri ar fəl taku ni abbər da milliyan aru suɗa.

¹⁷Tsuwa akwa wulsu ni, I ku wutə takwayeri ka mji ata hila ɗa ka ləptər liya na mamza apa u'u, ka zarkina zarkina apa sapfiya, ka huɓaka huɓaka. Kəra takwayeri ni tsuwa an apa kəra tsəngiyayeri, antə u'u ka ɗer, ka u'u mwapu akwa səɓəla akwa mnya ɗa.

¹⁸Antə mdə ku tsəgəi bwa pal akwa makər ar mji ka bwaniyayeri ngəni makər ni, watau ka u'u, ka ɗer, ka u'u mwapu na akwa səɓəla akwa mnya takwayeri ni.

¹⁹Kamnyar duna takwayeri ni akwa mnya ɗa, ka akwa kura ɗa. Kura ɗa an apa pwapwayeri ka kər ata, antə da ana dəkəi mji kəgari.

²⁰Antə mambila mji natə mda aɗi tsi ɗa akwa bwani ngəni wa ni, aɗi tubi ka zhar suayeri tə da namtə ka tsiya ɗa nə wa. Watau da aɗi zhar vəngkər səli aka shatanayeri wa, wala haptayeri ar dinar, wala adzərfa, wala əmza, wala pela, wala udzəm wa, haptayeri na amzhi wutə su, wala nggatə su, wala mwa wa.

²¹Tsuwa da aɗi tubi ata kəra mji tə da ku tsəgəi nə wa, wala ata kəra hakdzi, wala karwakur, wala ɗimikur, wala həla wa.