Read bura-pabir Ruth 2 Bible Online

Ruth 2 - bura-pabir bible

Ruth 2

¹Yangkura salər Naomi laga aɗi ka thləmari Bowaz. Tsa mdə na ka gəna akwa nyarmbwar salngkiɗa Elimelek.

²Təng vir laga Ruth pəla aka Naomi, “Ndzi kəi ləkwa mtakəu kəi ra hwilkə mthli ata dəlpa mji. I tamata abbər I ata wutə mdə na ata hir kəi hwilkə su aghəlari.” Antə Naomi pəla alari, “Mwari ngkwarna.”

³Antə Ruth təra ləkwa mtakəu akwa hwilkə su aghəla mjir kəthlər.Tsa akwa ləkəma ka hwilkə su ni har tə tsa sə ləkwa fakər Bowaz na yangkura Elimelek.

⁴Aghəla nda raka antə Bowaz ku thlata ahar Bethlelehem ka si kamnyar usar mjir kəthlər na akwa fakərni. Antə tsa pəla ala ɗa, “Usama giri akwa kəthlər. Ka MTHLAKU vədza ala giri barka!” Antə da shinau abbər, “Ka MTHLAKU hara ala gə barka tsuwa!”

⁵Antə Bowaz yu olər mjir kəthlər ni abbər, “Wan ɓzərngkwa ndagə ri?”

⁶Antə mdə ni shinau abbər, “Tsa an ngkwar Mowab na si ka Naomi ni.”

⁷Tsa kiɗə ra kəi zhar ni ka tsa nu dəlpa mjir kəthlər kamnyar hwilka alkama na ata dəlpa da. Tsa akwa hara kəthlər ni təng ɗəɗəpə mbing, tar kulini tə tsa haɗa ndzəndzi kamnyar ghərəmtaghəra akira səva.

⁸Antə Bowaz pəla aka Ruth abbər, “Ga aɗiya ra hwilkə su akwa vəi damwa wa. Ka gə ndzi tsu akwa fakə ngəni adzə maɗangkwi ni.

⁹Ka gə wul vəi tə da ata kəthlər ata, ka gə nu bwahila ɗa. I ku tsawa aka mji shili ni abbər da aɗiya damitə ngə wa. Antə ma ga ku nggatə thləli, ka gə mwari ra sa yimi akwa tughumayeri natə da nghyantə ni.”

¹⁰Antə Ruth zuzuri ka dləri kəmari ata di, ka pəla aka Bowaz, “Kamnyar mə tə wala tə I mətəpi ga akwa ndzi ali ka hangkal apani ri?”

¹¹Bowaz shinau abbər, “Mji ku pəla ali shanga su tə gə hara aka mama' salngkiri təng sakatə salngkiri mta. Tsuwa, har ga ku zhar mjir yar nga ka tsəɗiyir nga ka sə ndzi akwa nca mji tə ga aɗi tsəli ka ndzi akwa nca ɗa wa.

¹²I akwa kiɗa abbər ka MTHLAKU na Hyelər Israila na gə watsəɓər su tə gə hara. Ka MTHLAKU natə gə si kamnyar ka tsa ɓəlatə ngə ni ntəmta ala gə ghərər nga.”

¹³Ruth shinau ka pəla, “Usa ala ga, zanuwa. Ga akwa gari na msəra ali ka dunautə ra wala tə I aɗi pal akwa nca buɗayeri ar ngə wa.”

¹⁴Antə akwa sakar susəma na tahaku Bowaz pəla aka Ruth, “Asəra ka mburu səm susəma. Nthləi ɗəvə ni ka gə citə səkwar.” Antə tsa ku ndzəndzi adzə mjir kəthlər ni, antə Bowaz ku ha alari mthli ptsaptsa. Antə tsa ku səm ka ndli, har tə susəm ni mbila.

¹⁵Aghəla tə Ruth jaktə thlatə ka ləkəma ka hwilkə su antə Bowaz pəla aka mjirni abbər, “Ka giri zhari ka tsa hwilkə wala adzə julangayeri ni. Giri aɗiya mpa alari wa.

¹⁶Ka giri ntsuɓəla sanggamayeri akwa julangayeri ni ka giri pwi ɗa alari ka tsa fata. Giri aɗiya mpa alari wa.”

¹⁷Antə Ruth ku ləkəma ka hwilkə su akwa vəi ni har tahaku. Antə tsa ku dəkəmta barli ni ka wuta apa tasa kuma.

¹⁸Antə tsa kətə ka ləha ka ncanta aka mama' salngkiɗa su tə tsa tsapta. Tsuwa Ruth ku na alari susəma na mbila tə tsa səm ka zhari ni.

¹⁹Mama' salngkiɗa yu ni abbər, “Ashina gə ra hwilkə su ni ama ri? Fakər wa tə gə hwilka akwa ri? Ka Hyel vədzə barka aka mdə na dlar ngə ni!” Antə Ruth pəla, “I hwilka akwa fakər mdə laga ka thləmari Bowaz.”

²⁰Naomi pəla, “Ka MTHLAKU vədzə barka aka Bowaz! MTHLAKU ana kəsi alkawal arni tə tsa hara aka mji na ka mpika ka na ku mti! Ai mdə ndaga yangkura mburu na kudzəha, pal akwa nca mji na kalkal ka da wul mwa.”

²¹Ruth pəla, “Har ma tsa pəla parang kəi mwari ra hwilkə su adzə mjir kəthlər ni tar ma da ku kuri thli sur fakə ni.”

²²Naomi pəla aka Ruth, “Ngəni kalkal, ngkwarna, nu ghəla mwankir kəthlər na akwa fakərni ni. Mji ata sə damitə nga ma gə mwari akwa fakər mdə damwa.”

²³Antə Ruth ku ləkəma ka nu ghəla mwanki ni akwa hwilkə su har tə mdə kuri thla barli ka alkama. Akwa saka ngəni shang tsa ata vəi duku ka mama' salngkiɗa.