Read bura-pabir Ruth 3 Bible Online

Ruth 3 - bura-pabir bible

Ruth 3

¹Təng vir laga Naomi pəla aka Ruth, “Kulini saka ku hara tə I ata bara kəi wuta abbər ga ku kəl sal, ka gə wutə mbwar nga ka hangkala gə pəpəi.

²Ga ata mzhi ɗangta abbər Bowaz an yangkura mburu na kudzəha. Tsuwa tsa mdə na ka hangkal, har tsa ku zhar nga ka gə hwilkə su ata vəi duku kəga mjir kəthlər arni. Ashina tahaku tsa ata ra puhəɓəla barli ni ata lali.

³Ka gə pəra, ka ra pudza sur shiwur na msəra, ka ra hatə kari nga na ɓɗakta shang. Ka gə ra wutə ni akwa vəi dəka alkama ni. Amma ga aɗiya hir ka tsa sənda abbər ga anda wa, tar ma sakatə tsa ku kuri səm susəma.

⁴Ma sakar pəpəi ku hara, ka gə wul vəi tə tsa ata ra pəpəi ata. Ma sakatə tsa ku heni, ka gə mwari kara haptə sur pudzərni ka gə pəpəi adzə səlari. Antə tsa ata pəla ala gə su tə ka gə hara.”

⁵Antə Ruth shinau ka pəla, “I ata ra hara shanga su tə gə pəla.”

⁶Antə Ruth ku təra mwari ata lali ni, ka hara tsu apatə mama' salngkiɗa ku pəla alari.

⁷Antə sakatə Bowaz ku kuri səm susəma, tə ɗəffari ku ndzi msəra alari, antə tsa mwari ata vəi tə mdə tsapta alkama ata ka pəpəi ka heni. Antə Ruth nggwar mwari ka hangkal, ka haptə sur pudzərni, ka pəpəi adzə səlari.

⁸Apa kərathlər viri antə Bowaz thlatə ka shinardzi. Tsa ndatədzi tə tsa wutə mwala laga apəpəi adzə səlari ni!

⁹Tə tsa yu ni abbər, “Gə wa ri?” Antə mwala ni shinau alari abbər, “I an Ruth, zanuwa. Kamnyar tə gə yangkura salngkəya na kudzəha, ga an mdə natə kalkal ka gə wul ra. Antə usa ka gə puta ali mbwa.”

¹⁰Antə Bowaz pəla, “Ka MTHLAKU vədza ala gə barka ngkwarna. Ga akwa vərvər ncantə hirkur aka kutakəyir nga kulini ta natə ga ana hara aka mama' salngkiri. Ma apani wa sakani ga ku nu maɗadakwi na ka gəna wala na ngguɗi.

¹¹Antə ga aɗiya damitədzi wa, I ata hara shanga su tə gə yuwa. Ai shanga mjir kutadi asənda abbər gə mwala na pwa.

¹²Jiri I an yangkur na kudzəha, ka tsuwa kalkal kəi wul nga. Amma mda aɗi na yangkurari kudzəha ta iya.

¹³Pi azi, antə ma vir ku kuri mwa ata nggaɓəla ko tsa ata hir wul nga. Ma tsa ku kələngkər ata ndzi ɓɗaku. Ma tsa aɗi hir wa, akwa thləma Hyel na ka mpika I ata wul nga. Antə pəpəi ka vir kura.”

¹⁴Antə Ruth ku pəpəi adzə səlari, amma tsa thlatə kwabə vir akura ka təra, kamnyar Bowaz aɗi hir ka mdə sənda abbər mwala ni pi adzə ni wa.

¹⁵Bowaz pəla alari, “Pshari gyalleyir nga azi.” Antə tsa pshari. Antə Bowaz puta alari barli apa retar bufu, ka mbwahə ka vəngkər alari. Antə Ruth ku ngka akwa kutadi kəgari.

¹⁶Sakatə tsa ku ngka avəi antə mama' salngkiɗa yu ni abbər, “Ngkwarna apa madi ja?” Antə Ruth ngkərɓəla alari shanga su tə Bowaz hara alari.

¹⁷Ruth pəla, “Tsa ni barli ngəni, kamnyar tsa pəla aɗi kalkal kəi ngka adzə nga kula su akwa tsi wa.”

¹⁸Antə Naomi pəla, “Ruth, peri hangkala ga, ka gə wul su na ata hara. Hangkala Bowaz aɗi ata pəpəi wa tar ma tsa kuri wujir ngəni tsu ashina.”