Read bura-pabir 1 Samiwal 1 Bible Online

1 Samiwal 1 - bura-pabir bible

1 Samiwal 1

¹Mdə laga aɗi akwa durər Zuf ahar Rama, akwa tsəɗi gar ar Ifrayim. Thləma mdə ni an Elkana, ɓzər Yeroham. Tsa an kəkar Elihu na ɓzər Tohu, na ɓzər Zuf na akwa nyarmbwar Ifrayim.

²Elkana ni ka mwanki suɗa, na pal thləmari Hannatu, na dukwari tsuwa thləmari Penina. Penina ka maɗangkyar, amma Hannatu aɗi ka ɓzər wa.

³Kəlara məva Elkana ana thlata ahar Rama, ka mwari ahar Shilo kamnyar vəngkər səli, ka hamta saɗaka aka MTHLAKU na ka Duna ta Shang. Akwa saka ndaga Hofni ka Finehas na maɗashilər Eli an pristayeri ar MTHLAKU ahar Shilo ni.

⁴Kəlara sakatə Elkana ku hamta saɗaka, tsa ana hamta bwa pal ar kum ni aka mwalankiɗa Penina, ka hamta bwa pal pal aka maɗa'ni shili ka mwanki.

⁵Amma ar Hannatu, wala tə tsa hir ni, tsa ana hamta alari bwa pal daci, kamnyar MTHLAKU aɗi nar ɓzər wa.

⁶Penina na marərni ana nggamnyari tədəku kamnyar ka ɗəffari ɓza, kamnyar tə MTHLAKU aɗi nar ɓzər wa.

⁷Su ngəni ku ləkəma tədək məva. Antə kəlara sakatə Hannatu ku mwari akwa mbwar MTHLAKU, Penina ata thlentə hangkalari, har ka tsa tuwa ka nggəlar səm susəma.

⁸Antə Elkana na salngkiɗa ana yu ni abbər, “Hannatu, kamnyar mə tə ga akwa tuwa ri? Tsuwa kamnyar mə tə ga aɗi akwa səm susəm wa ri? Kamnyar mə tə ga akwa damitədzi apani ri? I aɗi təramta ala gə maɗashili kum wa ya?”

⁹Vir laga aghəla tə da ku kuri səm susəma akwa mbwar MTHLAKU ahar Shilo, antə Hannatu thlatə ka ɗəffari ɓzəɓzari, ka hara adduwa akwa tuwa ka duna aka MTHLAKU. Sakanda Eli na prist ni andzəndzi anyarmbwar vəngkər səli.

¹¹Antə Hannatu hara alkawal ka kahyel abbər, “MTHLAKU na ka Duna ta Shang, ma ga an ata wutə bwani tə I na ngkwar nga akwa ni, ka ɗangtə ra. Ma ga aɗi fwari ata kəri wa, tə gə ni ɓzər sal, to, I ata hamta ni kamnyar kəthlər ala ga, MTHLAKU, akwa shanga ndzəndziyir mpikari. Tsuwa ba saka madi mda aɗi ata shi kərari wa.”

¹²Sakatə Hannatu akwa ləkəma ka adduwa ni, Eli akwa wul mnyari akwa kənggəra.

¹³Tsa akwa hara adduwa ni akwa ɗəffari, antə mnyari daci an akwa kənggəra. Antə Eli kəta abbər Hannatu ku wika.

¹⁴Antə Eli pəla alari, “Kamnyar mə tə ga akwa wika apani ri? Tar gə zhar sa yimər anap ni!”

¹⁵Amma Hannatu shinau ka pəla, “Awa, zanuwa, I aɗi akwa wikə wa. I an mwala na ka damitedzi ka duna. I aɗi sa yimər anap wa, wala sur sa laga na ana wikantə mdə wa. I akwa ngkərɓəla su na akwa damitə ra akwa ɗəffi aka MTHLAKU.

¹⁶Ga aɗiya dzama abbər I ngkwa na hilhilari wa. I ku kətə saka saɓəl akwa hara adduwa kamnyar mwavərkur damitədzi tə I kəgari.”

¹⁷Antə Eli pəla alari, “To, ma apani, ka Hyel mwantə ngə lapiya. Ka Hyelər Israila na gə su tə gə kiɗa akəlari.”

¹⁸Antə mwala ni pəla, “Ka Hyel hara kəi wutə mdəkur ata nca ga.” Antə mwala ni ku təra ka ra səm susəma, tsa aɗi ndzi ka ɗəffari ɓzəɓzari kəra wa.

¹⁹Antə səɓəla ɗəpari Elkana ka mjir kutakəyirni ku dli thlatə ɗəɗəpə mbing ka vəngkər səli aka MTHLAKU, kambəla da ngka avəi ahar ɗa ahar Rama. Elkana ku pi ka mwalankiɗa Hannatu, antə MTHLAKU ku amsa adduwarni.

²⁰Antə Hannatu ku kətə hur ka yaɓəla ɓzər sal. Antə tsa vəta alari thləm Samiwal, natə karapwari an, “I kiɗə ni akəla MTHLAKU.”

²¹Antə səɓəla məvari Elkana kəga mjir kutakəyirni ku jaktə mwari ahar Shilo kamnyar hamta saɗakar məva aka MTHLAKU, ka tsuwa ka tsa nghyaɓəla alkawal tə tsa kəta.

²²Amma akwa saka ngəni Hannatu aɗi mwari wa, kamnyar tsa pəla aka salngkiɗa, “Tar ma I ku kəli ɓzər ni antə I ata mwantə ni akəma MTHLAKU, kamnyar ka tsa ndzəndzi anda har kurər mpikari.”

²³Antə Elkana na salngkiɗa pəla alari, “Hara su tə gə wuta abbər təramta ala ga. Ndzəndzi, tar ma sakatə ga ku kəli ni. Tsuwa ka Hyel hara ka MTHLAKU nghyaɓəla alkawalərni.” Antə Hannatu ku ndzəndzi avəi ka wul ɓzərni, har tə tsa kəli ni.

²⁴Aghəla tə tsa ku kəli ɓzər ni, antə tsa kətə ni təng tə tsa tsu ngkyar, ka kətə gyal na ka məvari makər, ka mpwa tasa kuma, ka yimər anap zamzamiya pal, ka paktə alari, ka mwantə ni ahar Shilo.

²⁵Aghəla tə da ku thlamta wulya gyal ni, antə da mwantə ɓzəngkyar ni aka Eli.

²⁶Antə Hannatu pəla aka Eli, “Zanuwa! Ga amzhi ɗangtə ra kəra pwa! Ai I an mwala tə gə wuta athləthlata azi akwa hara adduwa aka MTHLAKU nda.

²⁷Ngəni an ɓzər tə I kiɗa akəla MTHLAKU ni. Tsa ku na ali su tə I kiɗa akəlari ni.

²⁸Antə kulini I ata hamta ni aka MTHLAKU. Akwa shanga ndzəndziyirni tsa ata ndzi ar MTHLAKU.” Antə da ku vəngkər səli aka MTHLAKU anda.