Read bura-pabir 1 Samiwal 10 Bible Online

1 Samiwal 10 - bura-pabir bible

1 Samiwal 10

¹Antə Samiwal kətə kwalɓar mal zaitun ka ɗangkər ata kəra Shawulu, ka vədza kəsəm mnyari alari, ka pəla, “Baɗitə ka ashina MTHLAKU ku carɓəla nga ka gə ndzi kuthlir mjirni Israila.”

²Ma sakatə ga ku təra kazhar ra ashina, ga ata kəɓa ka mji suɗa adzə kulər Rahila ahar Zelza akwa tsəɗi Benjamin. Da ata pəla ala giri abbər mdə ku wutə kwarayeri tə giri akwa pakari ni, antə baba' nga aɗi akwa damitədzi kamnyar kwarayeri ni kəra wa, amma tsa akwa damitədzi kamnyar nga abbər, “Man tə kəi hara ata kəra ɓzərna nə ri?”

³“Antə ga ata ləkəma har ka ra mzhitə nfur ok na ola ahar Tabor ni. Anda antə ga ata kəɓa ka mji laga makər akwa lakur ra hara saɗaka aka Hyel ahar Bethlel. Mdə pal ka maɗa' kwi makər akwa tsiyari, mdə duku ka buradi kər makər, antə mdə na makərkur ka zamzamiya nghyinghyari ka yimər anap.

⁴Da ata thlawar nga, ka na ala gə buradi kər suɗa, antə ga ata dluwari.

⁵Aghəla nda ka gə təra mwari ata Garər Hyel akwa Gibeya, vəi tə mjir Filistiya pwi sojayeri arɗa. Antə ma sakatə ga akwa ləvəi akwa kutadi, ga ata kəɓa ka naɓiyayeri na thlata akwa vəi vəngkər səli akwa səghəi ata kəma duku. Tsuwa ga ata wutə mji laga akəma ɗa akwa mwa ka tsa guləm kəga yakandi, ka kəcaikəcai, ka liyar ɓu tsi, ka mbur shwala ar aduta. Ar naɓiyayeri ni da akwa mwa ka hara naɓikur ka dza ɗa akwa kədza.”

⁶“Antə təkəma mambələr MTHLAKU ata si ata kəra ga ka duna. Antə ga ata palidzi ka ndzi mdə damwa zum, ka baɗitə hara naɓikur ata kəma duku kəga da.

⁷Aghəla tə seɗayeri ngəni ku wutə nga antə ga ata hara kəlara su tə gə wutə kalkal, kamnyar Hyel ata ndzi adzə nga.”

⁸“Aghəla nda ka gə təramta ləhar Gilgal kwabə I asi. I akwa si aghəla ga kamnyar hamta saɗaka mbamba ka saɗakar jakə mwardzi. Antə ga ata sə səkə ra anda har vir murfa. Antə ma sakatə I ku si, I ata ngkər ala gə su tə ga ata harari akəmazi.”

⁹Sakatə Shawulu shinardzi ata zhar Samiwal, təng Hyel pali ɗəffa Shawulu tə tsa ndzi mdə laga zum. Antə shanga seɗayeri tə Samiwal pəla ni ku nghyaɓəladzi vir nda.

¹⁰Sakatə Shawulu ka buɗarni ku mzhitə Gibeya antə naɓiyayeri na tsaptədzi ku kəɓa ka tsa. Antə mambələr Hyel ku si ata kərari təkəma, tə tsa baɗitə hara naɓikur ata kəma duku kəga da.

¹¹Sakatə shanga mji na asəndə ni hwatu ku wutə ni akwa hara naɓikur kəga naɓiyayeri ni antə da yu nvwa ɗa abbər, “Man wutə ɓzər Kish nə ri? Shawulu ku ndzi naɓi tsu ya?”

¹²Amma mdə laga anda shinau ka pəla, “Tsuwa wan maləmər ɗa ri kwang?” Ngəni an su na hara tə mda ana tsa karapu abbər, “Shawulu ku ndzi naɓi tsu ya?”

¹³Sakatə Shawulu ku kuri hara naɓikur, antə tsa təra mwari akwa vəi vəngkər səli na ata gar ni.

¹⁴Sakatə tsa mzhitə kəi ni, antə ɓzərma' baba' Shawulu ni yu Shawulu ka buɗarni abbər, “Giri ləma shang ri?” Antə Shawulu pəla, “Yeru mwari ra pakə kwarayeri ni. Sakatə yeru aɗi wutə ɗa wa antə yeru ra yu sauri akəla Samiwal.”

¹⁵Antə ɓzərma' baba' Shawulu ni jaktə pəla, “Pəla giri ali su tə Samiwal pəla ala giri ni.”

¹⁶Antə Shawulu shinau alari abbər, “Tsa pəla ala yeru abbər mdə ku wutə kwarayeri ni.” Amma Shawulu aɗi pəla aka ɓzərma' baba'ni su tə Samiwal pəla alari ata kəra kuthlikur ni wa.

¹⁷Antə Samiwal tsaptə mjir Israila akəma MTHLAKU ahar Mizpa,

¹⁸ka pəla ala ɗa, “Nggədza su tə MTHLAKU na Hyelər Israila pəla, ‘I ku fwaɓəla giri akwa Masar ka msərantə giri akwa tsiya mjir Masar, ka akwa tsiya shanga kuthlikurayeri na akwa hara bwani ala giri.

¹⁹Amma ashina giri ku nggəlar ra, I na Hyel, na msərantə giri ta asarayeri kəga matsifayeri ar giri. Giri ku nggəlar ra ka pəla tar kəi vəi ala giri kuthli!’ Antə kulini pu girdzi akwa layi akəma MTHLAKU ata nyarmbwa ata nyarmbwa, ka kutakəi kutakəi.”

²⁰Antə Samiwal səntə shanga mjir Israila ata nyarmbwa ata nyarmbwa, antə car ku kətə nyarmbwar Benjamin.

²¹Antə Samiwal ku səntə nyarmbwa Benjamin, antə car ku kətə kutakəyir Matiri. Akwa tsikərari mdə ku səntə mjir kutakəi Matiri antə car ku kətə Shawulu na ɓzər Kish. Amma sakatə da ləkwa pakə ni, da aɗi wutə ni wa.

²²Antə da yuɓəla akəla MTHLAKU abbər, “Mdə ni aɗi si ba kulini wa ya?” Antə MTHLAKU shinau alari abbər, “I, tsa ku si. Ai ndaga ni ɗuwarɗuwarari akwa nca kari tə mdə tsaptə ni.”

²³Antə da hwi mwari ka səntə ni. Sakatə Shawulu thləthlatə təng mdə wuta abbər tsa saɓəl ta shanga mji.

²⁴Antə Samiwal pəla aka mji abbər, “Ngəni an mdə tə MTHLAKU ku carɓəla! Mda aɗi akwa nca mburu azi tə mda agira ka tsa wa.” Antə shanga mji ku haptə kuraku ka pəla, “Ka far kuthli fəi!”

²⁵Antə Samiwal ngkərɓəla aka mji suayeri tə kalkal ka mdə hara aka kuthlikur ka kəthlərayeri tə kalkal ka kuthlikur hara aka mji. Antə tsa rəbuta akwa kakaɗu, ka vəi akəma MTHLAKU akwa Vəi na Ɓɗakkarkara. Antə tsa salamtə mji ka da ləha.

²⁶Antə tsa na Shawulu ni tsuwa ngka avəyarngkiɗa akwa Gibeya ata kəma duku kəga mji shili laga na ka ɗəffər salkur, natə Hyel ku tsəkwar ɗəffa ɗa.

²⁷Amma mji laga na hilhilari pəla, “Apa madi tə mdə ngəni ata mzhi msərantə mburu ri?” Antə da ku rutə Shawulu har ka nggəlar ta hamta alari cauta. Amma Shawulu aɗi ndəra ata kər wa.