Read bura-pabir 1 Samiwal 11 Bible Online

1 Samiwal 11 - bura-pabir bible

1 Samiwal 11

¹Aghəla nda antə Nahash na kuthlir Ammon ku mwari kəga sojayeri arni ka kalaktə Yabesh Gileyad kamnyar dlər ɗa. Antə mjir Yabesh pəla aka Nahash abbər, “Mbwi wadi ka yeru, antə yeru ata hara kəthlər ala ga apa mafa.”

²Antə Nahash shinau ka pəla, “I ata mbwi waadi ka giri ata kəra su pal, an abbər tar ma I ata tuhurɓəla shanga nca giri na abwa mazəm. Kamnyar atar ngəni antə I ata vu shanga mjir Israila akwa səli.”

³Antə mji ol'olər Yabesh pəla alari, “Na ala yeru vir murfa ka yeru thlentə mji akwa shanga tsəɗi Israila. Ma yeru aɗi wutə mdə na ata dlar yeru wa, yeru ata hamta kər yeru ala ga.”

⁴Sakatə mjir thlentə ni ku mzhitə Gibeya, diyir Shawulu, ka ngkər labar ni, təng mji putə tuwa ka kuraku.

⁵Təng Hyel hara tsuwa təkəma Shawulu akwa səvəi akwa fakə ka thlar tsuhurni. Antə tsa yuwa abbər, “Man hara tə mji akwa tuwa apani nə ri?” Antə da jikata alari labar ata kəra mjir Yabesh.

⁶Sakatə Shawulu nggatə labar ni, təng təkəma mambələr Hyel si ata kərari antə ɗəffari ku mbwi ka duna.

⁷Antə Shawulu fatə gyal suɗa ka thləthlau kumər ɗa raka raka, ka ndəkəmta aka mji ka da mwanta akwa shanga tsəɗi Israila. Tsa pəla ala ɗa abbər akwa kəlara di tə da ku mwari akwa, ka da ncanta ala ɗa kum ni ka pəla, “Kəlara mdə na aɗi səɓəla ka nu Shawulu ka Samiwal akwa mpa wa, apani antə mda ata hara aka gyalayeri arni!” Sakatə da nggatə labar ni antə mjir Israila ləkwa thlivər MTHLAKU ka duna. Antə shanga mji shilər Israila ku səɓəla ata kəma duku.

⁸Antə Shawulu tsaptə ɗa ahar Bezek ka ɗəmhə ɗa kamnyar mpa, tsa wutə mji dəpu aru makər akwa Israila, ka dəpu makkumari akwa Yahuda.

⁹Antə da pəla aka mjir thlentə na thlata ahar Yabesh ni abbər, “Pəla giri aka mjir giri abbər ɗəpa akwabə pci ahara tekateka mda ata msərantə ɗa.” Sakatə mjir Yabesh nggatə labar ni antə ɗəffa ɗa ndzi msəra ala ɗa ka duna.

¹⁰Amma mjir Yabesh ni pwaktəmta mjir Ammon ni abbər, “Ɗəpə yeru ata hamta kər yeru ala giri ka giri hara su tə giri hir ala yeru.”

¹¹Səɓəla ɗəpari ɗəɗəpa antə Shawulu ndəkəi mjirni ka bwa makər, antə da mwantə dləra ata kəra mjir Ammon tsu ɗəɗəpə nda. Antə da ləkwa tsəgəi mjir Ammon ni har tə pci hara tekateka. Mji na mbila ka mpika akwa nca ɗa ku titiləmtadzi ka hwi waskəi ka bwarni.

¹²Antə mjir Israila pəla aka Samiwal, “Ama mji na pəla abbər, ‘Shawulu amzhi ndzi kuthlir mburu wa nə ri?’ Fwaɓəla ɗa ala yeru ka yeru tsəgəi ɗa.”

¹³Amma Shawulu pəla, “Awa! Mda aɗi ata tsi mda ashina wa! Kamnyar ashina antə MTHLAKU msərantə mjir Israila.”

¹⁴Antə Samiwal pəla aka mji ni, “Ndzi ka mburu jaktə mwari ahar Gilgal ka mburu psəmnya aka mji abbər Shawulu an ata hara kuthlikur ata kəra mburu.”

¹⁵Antə shanga ɗa ku təra mwari ahar Gilgal ka bartə kəra Shawulu akəma MTHLAKU. Antə da hamta saɗakar jakə mwardzi aka MTHLAKU, antə Shawulu ka shanga mjir Israila ku hara kucali ka duna.