Read bura-pabir 1 Samiwal 12 Bible Online

1 Samiwal 12 - bura-pabir bible

1 Samiwal 12

¹Vir laga Samiwal pəla aka mjir Israila, “I ku hara su tə giri pəla kəi hara, ka vəi ala giri kuthli.

²Antə kulini tsa an akwa pwar giri. Arna I ku hali, shishir kəri ku hara mwapu, amma maɗashilərna ata kəma duku kəga giri. I ku pwar giri təng akwa kustakurərna har ka vədza ka ashina.

³Nggədza ra akəma giri. Ma I ku hara su laga na aɗi kalkal wa, ka giri pəla ali akəma MTHLAKU, ka akəma kuthli tə tsa carɓəla. I ku ɗar dlutsə thlar mdə laga wala kwarar mdə laga ya? Nənga I ku ɗar zambatə mdə laga wala hara bwani aka mdə laga ri? I ku ɗar dlu sur dzəɓə mnya akəla mdə laga ya? Ma I ku ɗar hara pal akwa nca suayeri ngəni, ka giri pəla ali, antə I ata ntəmtari.”

⁴Antə mji ni pəla, “Awa, ga aɗi ka ɗar zambatə yeru wala hara bwani ala yeru wa. Tsuwa ga aɗi ka ɗar dlutsə su akəla yeru wa.”

⁵Antə Samiwal shinau ka pəla, “Kulini MTHLAKU, ka kuthli tə tsa an vəi ku ndzi seɗarna ashina abbər giri aɗi wutə ra ka biku wala raka wa.” Antə mji ni pəla, “I, MTHLAKU an seɗar mburu.”

⁶Antə Samiwal gari aka mji ni abbər, “MTHLAKU an carɓəla Musa ka Haruna na fwaɓəla kəkayeri ar giri akwa Masar.

⁷Antə kulini psi giri thləma giri ɓɗaku, kamnyar I ata pəlangkər ala giri vəi shar giri ata kəra kəthlər ar mbantədzi tə MTHLAKU hara kamnyar giri kəga kəkayeri ar giri.”

⁸“Aghəla tə Yakub ka mjir kutakəyirni ku mwari ahar Masar, antə mjir Masar ku hara bwani ala ɗa. Sakatə kəkayeri ar giri ku tuwa aka MTHLAKU ka tsa dlar ɗa antə tsa ku thlentə Musa ka Haruna na ku fwaɓəla ɗa akwa Masar ka səntə ɗa akwa tsəɗi ngəni.

⁹Amma sakatə kəkayeri ar giri ku fwari ata kəra MTHLAKU na Hyelər ɗa, antə tsa hamta ɗa aka Sisera na olər sojayeri ar mjir Hazor, ka aka mjir Filistiya, ka aka kuthlir Mowab, antə da ku səm ɗa akwa mpa.

¹⁰Antə kəkayeri ar giri ku jaktə mwantə tuwar ɗa aka MTHLAKU ka pəla, ‘Yeru ku hara biku təng tə yeru ku zhar vəngkər səli aka MTHLAKU ka vəngkər səli aka Baal ka Ashtaroth. Amma kulini ka gə msərantə yeru akwa tsiya dawayeri yeru, antə yeru ata vəngkər səli ala ga.’

¹¹Antə MTHLAKU ku thlentə Yerubbaal, ka Bedan, ka Yefthla, ka sə thlentə ra I na Samiwal akwa tsikərari. Antə MTHLAKU ku msərantə giri akwa tsiya dawayeri ar giri akwa kəlara bwa har tə giri ku sə ndzəndzi akwa msərakur.

¹²Amma sakatə giri wuta abbər Kuthli Nahash ar Ammon akwa bara si ata kəra giri ka dləra, antə giri pəla ali abbər, ‘Yeru ata bara kuthli na ata hara kuthlikur ata kəra yeru,’ wala tə MTHLAKU na Hyelər giri an kuthlir giri.”

¹³“To, kulini nggədza giri kuthli tə giri ku carɓəla, giri an bara, antə MTHLAKU ku hamta ni ala giri.

¹⁴Ma giri ata thlivər ɗəffa MTHLAKU, ka hara kəthlər alari, ka kələngkər alari, kula zhar ɓəla tsawurni, ma har giri kəga kuthlir giri ni ata nu MTHLAKU na Hyelər giri, to, shanga su ata ndzi lapiya.

¹⁵Amma ma giri ku nggəlar ngga ndərər MTHLAKU, tə giri ku zhar nu tsawurni, antə tsa ata nggəlar giri apatə tsa ku hara aka kəkayeri ar giri.

¹⁶Antə kulini, thləthlatə giri tsəkəm ka giri wutə surndatə tə tsa ata haratari ata nca giri.

¹⁷Kulini aɗi an sakar thla alkama wa ya? Ai aɗi kulini antə yimi ana tər wa. Amma I ata hara adduwa aka MTHLAKU, antə tsa ata thlentə dləra ka yimi. Ma su ngəni ku hara antə giri ata sənda abbər giri ku hara biku na ola aka MTHLAKU, tə giri ku yu ka mdə vəi ala giri kuthli ni.”

¹⁸Antə Samiwal ku hara adduwa aka MTHLAKU, antə MTHLAKU ku thlentə dləra ka yimi tsu vir nda. Antə shanga mji ku thlivər MTHLAKU ka Samiwal.

¹⁹Antə da pəla aka Samiwal, “Usa dlar yeru kara hara ala yeru adduwa aka MTHLAKU na Hyelər nga, ta yeru asə mta. Kamnyar yeru ku jaktə hara biku, tə yeru ku yu ni ka tsa na ala yeru kuthli ni.”

²⁰Antə Samiwal pəla, “Giri aɗiya thlivər wa. Jiri, giri ku hara su na ɗimi, amma giri aɗiya shinadzə bwahili aka MTHLAKU wa. Ka giri vəngkər səli alari ka ɗəffa giri shang.

²¹Giri aɗiya nu haptayeri wa, kamnyar ampaniyir ɗa aɗi wa. Da aɗi ata mzhi dlar giri wa, wala mzhi mbantə giri wa, kamnyar da su gapani.

²²MTHLAKU aɗi ata nggəlar mjirni wa, kamnyar olkur səli ar thləmari. Kamnyar tsa ka kərari an carɓəla giri ka giri ndzi mjirni.

²³Arna tsuwa, ka Hyel ngkatə ta I ahara biku alari atar zhar hara adduwa kamnyar giri. Ata vəya ndaga I ata thlipa ala giri laku na ɓɗaku ka na kalkal.

²⁴Ar giri, ka giri thlivər ɗəffa MTHLAKU, ka giri kəthlər alari ka jirkur, ka ɗəffa giri shang, ka giri ɗangtə suayeri na ol'ola tə tsa hara ala giri.

²⁵Amma ma giri ku ləkəma akwa hara biku, antə mda ata tsartə giri kəga kuthlir giri.”