Read bura-pabir 1 Samiwal 13 Bible Online

1 Samiwal 13 - bura-pabir bible

1 Samiwal 13

¹Shawulu ka məvari makkumari sakatə tsa ndzi kuthli. Aghəla tə tsa hara məva suɗa akwa kuthlikur ata kəra mjir Israila,

²antə tsa carɓəla sojayeri dəpu makər akwa nca mjir Israila. Antə tsa pwi mji dəpu suɗa adzə ni ahar Mikmash, ka tsuwa akwa tsəɗi gar ar Bethlel. Tsuwa tsa ku pwi sojayeri dəpu pal adzə ɓzərni Jonathlan ahar Gibeya na akwa tsəɗi nyarmbwar Benjamin, ka salamtə mambila sojayeri, tə waskəi ku ngka avəyarngkiɗa.

³Jonathlan ku mwari ka dlər vəi fəliyir sojayeri ar Filistiya na akwa Geba, antə shanga mjir Filistiya ku nggata. Aghəla nda antə Shawulu thlentə mjirni akwa shanga Israila ka da ra mbur təmbəl ar kəga mjir Ibrani ka da səɓəla kamnyar mpa.

⁴Sakatə shanga mjir Israila ku nggata abbər Shawulu ku dlərəmta sojayeri ar Filistiya ni, antə mjir Filistiya nggəlar nca ɗa ka duna. Antə mjir Israila ku nggatə kəga ni, ka səɓəla hang ka tsaptədzi adzə Shawulu ahar Gilgal.

⁵Antə mjir Filistiya tsaptədzi kamnyar ka da mpa mjir Israila. Da səɓəla ka wagən ar mpa dəpu makkumari, ka mjir fəl taku dəpu ngkwa, ka sojayeri hang apa wuyakər mnya manda. Antə da mwari ahar Mikmash abwar raghəi ka Bethlaven, ka fəli anda.

⁶Sakatə da pwa ata kəra mjir Israila ka mpa na mwavər, ka vu ɗa akwa damitədzi na mwavər, antə bwadukwa mjir Israila hwi ka ra ɗuwamtadzi akwa ku, ka akwa dlədləkwayeri, ka akwa kər garayeri, ka akwa kuayeri kəga jiɓayeri.

⁷Antə mji bwadukwa ɗa fəlɓəla Thlyagha Jodan, ka ləkwa tsəɗi nyarmbwar Gad ka Gileyad. Ar Shawulu tsa ndzi tsu akwa Gilgal ka shanga mji na adzə ni akwa kədza kamnyar thlivəra.

⁸Tsa hara vir murfa akwa sək Samiwal apatə Samiwal tsawa alari ka tsa hara, amma Samiwal aɗi si ahar Gilgal wa. Antə mjir Shawulu baɗitə titila kazhar ni.

⁹Antə Shawulu pəla aka mjirni, “Səntə gir ali mwaɓiyir saɗaka mbamba ka saɗakar jakə mwardzi ni.” Antə mdə sənta alari, antə tsa hamta saɗaka mbamba kəgari.

¹⁰Tsa akwa kuriyari təkəma təng Samiwal si. Antə Shawulu ləɓəla kamnyar hara ali alari.

¹¹Amma Samiwal pəla, “Ngəni man tə gə hara nə ri?” Antə Shawulu shinau ka pəla, “Mji akwa hwi kazhar ra, tsuwa ga aɗi si akwa sakatə gə pəla ni wa. Nggədza tsuwa mjir Filistiya ku tsaptədzi ahar Mikmash akwa ɗəmhədzər mpa.

¹²Antə I dzama abbər ta mjir Filistiya asə pwa ata kəri ka mpa akwa Gilgal, nggədza I aɗi kiɗə dlara akəla MTHLAKU wa. Antə I wuta abbər ku ndzi ali dwali kəi hamta saɗaka mbamba kwabər ga asi.”

¹³Antə Samiwal pəla, “Ngəni shashakur antə gə hara! Ga aɗi kələngkər aka tsawur MTHLAKU na Hyelər ngə wa. Ma ga an kələngkər alari sakani MTHLAKU ata vu ka durər nga hara kuthlikur ata kəra Israila ba saka madi.

¹⁴Amma kulini kuthlikurər nga aɗi ata ləkəma wa. MTHLAKU ku kurtə paktə mdə na ku kəɓatə kərari, har ka bartə kərari tə tsa ku ndzi kuthlir mjirni, kamnyar tə ga ku nggəlar ta ɓəla tsawurni.”

¹⁵Antə Samiwal ku thlatə ka təra kazhar Gilgal. Antə Shawulu ku jikatə hangkur sojayeri na mbila adzə ni ahar Gibeya na akwa tsəɗi Benjamin, ka wuta abbər da ku mwanta aru ngkwa.

¹⁶Antə Shawulu, ka ɓzərni Jonathlan, ka sojayeri na adzə ni ku fəli akwa Gibeya, na akwa tsəɗiyir nyarmbwar Benjamin. Antə sojayeri ar Filistiya ni fəli akwa Mikmash.

¹⁷Antə sojayeri ar Filistiya zumzum ka bwa makər ku səɓəla akwa vəi fəliyir ɗa kamnyar mwantə dləra. Bwa pal ku mwari təbwar Ofra akwa tsəɗi Shuwal,

¹⁸bwa damwa tsuwa ku mwari təbwar Beth Horon, antə bwa na makərkur ni ndləɓəla akwa tsəɗi na akwa wul Mular ar Zeboyim akwa mtakəu.

¹⁹Akwa saka ngəni mjir ɓdla aɗi akwa Israila wa kamnyar mjir Filistiya ku ngkatə mjir Ibrani ta da aɓdlə katsakar ka mwasu.

²⁰Antə tar ka mjir Israila ləghəi adzə mjir Filistiya tədəku kamnyar tsələmta mnya garma, ka məndzəha, ka kəma, kəga thlahur ɗa.

²¹Tsuwa kəlara sakatə da ata tsələmta mnya garmar ɗa wala məndzəhər ɗa tar ka da ntəmta ka liyar adzərfa suɗa. Tsu apani tsuwa ma da ata nam mnya kəma wala mnya sur kədlə thla da ata ntə liyar adzərfa pal, antə da akwa ntə su hang kamta.

²²Antə apani sakatə mpa ni ku thlatə mda aɗi akwa nca sojayeri ar Israila na ka katsakar wala mwasu wa, tar Shawulu ka ɓzərni Jonathlan daci.

²³Antə vir laga mjir Filistiya ku thlentə sojayeri laga ka da sək kəra lakur ləvəi akwa Mikmash.