Read bura-pabir 1 Samiwal 14 Bible Online

1 Samiwal 14 - bura-pabir bible

1 Samiwal 14

¹Təng vir laga Jonathlan na ɓzər Shawulu ni pəla aka ɓzərdakwi na ana kəsi alari kari mparni ni abbər, “Sər ka mwa ntamta kuta mular ni, ka mwa mwari akwa vəi fəliyir sojayeri ar Filistiya.” Amma Jonathlan aɗi pəla aka baba'ni Shawulu wa.

²Ata saka nda Shawulu andzəndzi akwa shanggur nfur rumman akwa Migron, akwa hildi ar Gibeya. Tsa ka sojayeri apa aru ngkwa adzə ni,

³ka Ahija pristər MTHLAKU anda tsuwa, ka efod ar nggaɓəla nufiyir Hyel ni akwa tsiyari. Ahija an ɓzər Ahitub, ɓzərma' Ikabod na ɓzər Finehas na akwa nyarmbwar Eli na pristər MTHLAKU akwa Shilo. Tsuwa mda aɗi na sənda abbər Jonathlan ku təra wa.

⁴Ata lakur mwari akwa vəi fəli sojayeri ar Filistiya na ahar Mikmash ni garayeri laga aɗi na nal nal suɗa natə tar ka Jonathlan təramta akwa daɓwa ɗa. Duku thləmari Bozez, dukwari tsuwa thləmari Sene.

⁵Gar na təbwar yala ni akwa wul Mikmash, antə na təbwar anəm ni tsuwa akwa wul Geba.

⁶Antə Jonathlan pəla aka ɓzərdakwi na ana kəsi alari kari mparni ni abbər, “Sər ka mwa ntamta kuta mular ni ka mwa mwari akwa vəi fəliyir sojayeri ngəni kərɗi kula kaciya ni. Wa ana səndə ri, nuhum MTHLAKU adlar mwa ka mwa səm ɗa. Kamnyar su aɗi na amzhi ngkatə MTHLAKU ta tsa ahara ka mwa səm ɗa wa, wala atar mji hang, wala atar mji raka.”

⁷Antə ɓzərdakwi ni shinau ka pəla, “Hara su tə gə wutə kalkal ala ga. I ata vəi duku ka ga akwa shanga su tə gə wutə kalkal.”

⁸Antə Jonathlan pəla, “To, mwa ata ntamta kuta mular ni ka mwa mwari təbwar mjir Filistiya ni, tsuwa mwa ata harari akwa laku tə da ata wutə mwa.

⁹Ma da pəla, ‘Sək giri yeru har tar ma yeru ku mwari adzə giri,’ to təng mwa ata thləthlatə tsəkəm.

¹⁰Amma ma da pəla, ‘Ndləɓəla giri azi,’ təng mwa ata ra wutə ɗa, kamnyar ngəni an seɗa na ata ncanta abbər MTHLAKU ku hamta ɗa ala mwa.”

¹¹Antə da ncantə kərɗa aka sojayeri ar Filistiya. Antə mjir Filistiya ni pəla, “Wul giri! Mjir Ibrani ni akwa səɓəla akwa ku tə da ɗuwardzi akwa ni!”

¹²Antə sojayeri ni ku kəga Jonathlan ka mdər kəsi alari kari mpa ni abbər, “Ndləɓəla giri azi, ka yeru ngkərta ala giri su!” Antə Jonathlan pəla aka ɓzərdakwi ni abbər, “Nu ra, kamnyar MTHLAKU ku hamta ɗa akwa tsiya mjir Israila.”

¹³Antə Jonathlan ku pwa akəma ka mdər kəsi alari kari mpa ni akwa nu ni abwahili, ka ndləɓəla ka tsiya ɗa ka ɓunja ɗa ata di. Sakatə da ku mzhitə ɗa antə Jonathlan pwa ata kəra sojayeri ar Filistiya ni ka mpa ka nthlənthlətə ɗa ka pumta ɗa ata di. Mdər kəsi alari kari mpa ni tsuwa akwa nu bwahilari akwa tsəgəi ɗa.

¹⁴Akwa kəɓar ɗa na ntangkəma Jonathlan ka mdər kəsi alari kari mpa ni ku tsəgəi mji apa sərkumari akwa bəbal natə baukurari ku mwanta apa retar vəi tə thla ata kukultari akwa pci pal.

¹⁵Antə shanga sojayeri ar Filistiya na akwa vəi fəli ni, ka na aɓəla, har kəga mji na akwa bəbal ni, kəga mji na ləɓəla akwa mpa ni shang ku thlivər ka duna. Shanga ɗa ku yakata ka ndəndatədzi, tə wala di ku kənggərantədzi. Hyel an thlentə sur thlivər ngəni ni.

¹⁶Antə mjir sək kəra Shawulu na ahar Gibeya akwa tsəɗi nyarmbwar Benjamin ni wutə sojayeri ar Filistiya ndəndandəndari akwa hwi kəlara bwa.

¹⁷Antə Shawulu pəla aka mjirni, “Jikatə giri sojayeri ni ka giri nggaɓəla mji na aɗi azi wa.” Sakatə da jikatə ɗa təng da nggaɓəla abbər Jonathlan ka mdər kəsi alari kari mpa ni aɗi wa.

¹⁸Antə Shawulu bara abbər ka Ahija na prist ni yuɓəla su ata kəra mpa ni akəla MTHLAKU. Antə Shawulu pəla aka Ahija ka tsa səntə Akwatiyir Hyel ni. Kamnyar sakanda Akwati Alkawal ni akəla mjir Israila.

¹⁹Sakatə Shawulu akwa gari aka prist ni təng sojayeri ar Filistiya vərvər ndəndatədzi ka duna. Antə Shawulu pəla aka prist ni, “Zhar daci, ka mwa təra ndzang.”

²⁰Antə Shawulu ku tsaptə sojayeri arni tə da təra ra dlər sojayeri ar Filistiya akwa vəi fəli arɗa. Mwarər ɗa təng da wuta abbər hangkala mjir Filistiya ni ku ndəndatədzi har tə da akwa nthlənthlə kərɗa ka katsakar.

²¹Wala mjir Ibrani na ata kəma duku kəga mjir Filistiya, na nu mjir Filistiya ba akwa vəi fəli arɗa ni, ku ngka adzə Shawulu ka Jonathlan sakatə mpa ni thlata.

²²Sakatə shanga mjir Israila na ra ɗuwardzi akwa garayeri ar tsəɗi nyarmbwar Ifrayim nggata abbər mjir Filistiya ni akwa hwi, antə da səɓəla ka pungkərdzi ata kəra mjir Filistiya ni ka kədləmta ɗa.

²³Antə mdə ku ləkəma akwa mpa ni har ka təramta Bethlaven. Antə MTHLAKU ku mbantə mjir Israila vir nda.

²⁴Vir nda sojayeri ar Israila ku ɗar bwani ka duna, kamnyar Shawulu ku thləmnya abbər, “Ka Hyel shuwumta kəlara mdə na ku səm susəma ashina akwabə pci atəri, təng akəmata I antəmta ɗimikur ata dawayeri arna.” Antə apani soja aɗi na səm susəma vir nda wa.

²⁵Sakatə shanga ɗa ku ləkwa kuɓər nfwa təng da wutə cirməma apumta ata di.

²⁶Jiri, sojayeri ni ku wutə cirməma akwa pugəmtadzi ata di, amma mda aɗi na nggitə nciu kulengari ka ɗari wa, kamnyar da akwa thlivər thləmnya tə Shawulu hara ni.

²⁷Amma Jonathlan aɗi sənda abbər baba'ni ku thləmnya apani wa, antə tsa ku ha zwal na akəlari ni ka njakwi kangkang məma ni ka hamnya, təkəma təng tsa wutə duna.

²⁸Antə pal akwa nca sojayeri arni pəla, “Ai, baba' nga ku thləmnya abbər kəlara mdə na ku səm susəma ashina ka Hyel shuwumta ni. An su na hara tə shanga sojayeri ni kula duna ni.”

²⁹Antə Jonathlan pəla, “Baba'na ku səntə damitədzi akwa tsəɗi ni. Ai wala gə ka kəra ga ku wutə laku tə məma ngəni raka tə I ɗar ni ku ni duna akwa.

³⁰Ka ma abbər mda an zhar ka kəlara soja səm susəma tə mdə dlutsa akəla dawayeri ni, ndərari ata ndzi məmi shang ri? Ai sakani mshiyir mjir Filistiya ata ndzi hangta ni!”

³¹Antə vir nda mjir Israila ku ləkəma ka tsəgəi mjir Filistiya baɗita akwa Mikmash har ka mwari akwa Ayalon. Aghəla nda antə da ku ghəri swaiswai kamnyar mi na akwa kətə ɗa,

³²har tə da pungkərdzi ata kəra su tə da dlutsa akwa mpa ni, su apa təma, kəga thla, kəga kənayeri. Da tsəgəi mwaɓiyayeri ni kula shamta saka ka ɓɗəmnya kumari ka mamshi tsu akwa.

³³Antə mdə laga pəla aka Shawulu abbər, “Wul sojayeri ngəni akwa hara biku aka MTHLAKU, da akwa ɓɗə kum ka mamshi akwa!” Antə Shawulu pəla ala ɗa, “Jiri, giri ku ɓəli alkawal tə giri hara aka Hyel ni!” Takəltə giri pela na ol ni ka giri sənta ali azi.

³⁴Antə tsa ləkəma ka pəla, “Ləkwa giri nca mji ka giri pəla ala ɗa ka kəlara mdə səntə thlarni ka təmarni azi, ka tsa thlamta wulya mwaɓi ni ata pela ngəni ka tsa ɓɗa. Tsuwa da aɗiya hara biku aka MTHLAKU atar ɓɗə kum ka mamshi wa.” Antə vir nda aviri shanga ɗa ku səntə thlar ɗa ka tsi ɗa anda.

³⁵Apani antə Shawulu ku həntə bagaɗi aka MTHLAKU, ngəni an bagaɗiyir hamta saɗaka na ntangkəma tə tsa hənta.

³⁶Antə Shawulu pəla aka mjirni, “Ndzi ka mburu ləghəi ata kəra mjir Filistiya aviri ka mpa, ka mburu kurəmta ɗa, ka ləkəma ka fa kariyir ɗa har ka vir kura. Mburu aɗiya zhar mdə wala duku ka mpikə wa!” Antə da shinau ka pəla, “Hara kəlara su tə gə wuta abbər kalkal.” Amma prist ni pəla, “Ndzi ka mburu yutə Hyel katagu.”

³⁷Antə Shawulu ku yutə Hyel abbər, “Kəi ra dlər mjir Filistiya ya? Ga ata hara ka yeru səm ɗa ya?” Amma Hyel aɗi shinau alari vir nda wa.

³⁸Antə Shawulu pəla aka mji na ol'olər sojayeri ni abbər, “Sər giri azi, ka mburu pakɓəla ka səndə biku na hara tə mburu aɗi wuta amsa ashina wa ni.

³⁹Kamnyar I ku kahyel akwa thləma MTHLAKU na ka mpika na ana nar nggyari su aka Israila, abbər wala ma Jonathlan na ɓzərna an hara biku ni, mda ata tsi ni!” Amma mda aɗi akwa nca ɗa na ndər wa.

⁴⁰Antə Shawulu pəla ala ɗa, “Ka shanga giri thləthlata abwanda, antə yeru ka Jonathlan ata thləthlata abwani.” Antə mji ni shinau alari ka pəla, “Hara kəlara su tə gə wuta abbər kalkal.”

⁴¹Antə Shawulu hara adduwa ka pəla, “MTHLAKU na Hyelər Israila, yeru akwa kiɗə nga ka gə ncaɓəla ala yeru mdə na hara biku ni.” Antə ku ncantədzi abbər Shawulu ka Jonathlan an hara biku ni atar kəthlər ka Urim ka Thlummim. Shanga mji na mbila, mda aɗi wutə ɗa ka biku wa.

⁴²Antə Shawulu pəla, “Ka gə carɓəla akwa daɓwa Iya ka ɓzər na Jonathlan.” Antə ku ncantədzi abbər Jonathlan.

⁴³Antə Shawulu yu Jonathlan ka pəla, “Pəla ali, man tə gə hara ri?” Antə Jonathlan shinau ka pəla, “I njakwi cirməma ni ka zwal na akəli ni, ka ngyari. Antə nggədza ra ɗəmhəɗəmhari kamnyar kəi mta.”

⁴⁴Antə Shawulu pəla alari, “Mda ata tsi nga! Ka Hyel kəl farna, ma mda aɗi tsi ngə wa!”

⁴⁵Amma sojayeri ni pəla aka Shawulu, “Awa! Kamnyar mə tə mda ata tsi Jonathlan ri, tə ku ndzi atar ni antə mburu mzhi səm akwa mpa ni? Yeru ku kahyel akwa thləma MTHLAKU na ka mpika abbər wala shishir kərari, mda aɗi na ata tsəkwarari wala duku wa. Kamnyar su tə tsa hara ashina ni, ka dlarər Hyel antə tsa mzhi haratari ni.” Apani antə mji ku msərantə Jonathlan ta mta.

⁴⁶Aghəla nda antə Shawulu ku zhar nu mjir Filistiya, antə mjir Filistiya ni ku ngka akwa tsəɗiyir ɗa.

⁴⁷Aghəla tə Shawulu ku ndzi kuthlir Israila, antə tsa ku mpa dawayeri arni na kalaktə ni. Tsa ku mpa ka mjir Mowab, ka Ammon, ka Edom, ka kuthlyayeri ar Zoba ka Filistiya. Kəlara vəi tə Shawulu ku ra mpa akwa, tsa ku səma.

⁴⁸Tsa ku mpa ka katsalakur ka səm wala mjir Amalek, antə tsa ku msərantə mjir Israila akwa tsiya mjir dlutsə kariyayeri arɗa.

⁴⁹Maɗashilər Shawulu an Jonathlan, ka Ishvəi ka Malkishuwa. Tsuwa tsa ka maɗangkwi suɗa, da an Merab natə tsa an yarakəma, ka Mikal natə tsa an rakari.

⁵⁰Thləma mwalankiɗa an Ahinowam na ngkwar Ahimaaz. Olər sojayeri arni an Abner na ɓzər Ner, ɓzərma' baba' Shawulu.

⁵¹Baba Shawulu na an Kish ni, ka baba' Abner na an Ner ni, japwa ɗa an maɗa' Abiyel.

⁵²Shawulu ku mpa ka duna ka mjir Filistiya akwa shanga ndzəndziyir mpikari. Kəlara sakatə Shawulu ku wutə mdə na gurjam ka katsala, tsa ata kətə ni ka vu ni akwa nca sojayeri arni.