Read bura-pabir 1 Samiwal 16 Bible Online

1 Samiwal 16 - bura-pabir bible

1 Samiwal 16

¹Vir laga MTHLAKU pəla aka Samiwal, “Nawa antə ga ata sə zhar damitədzi ata kəra Shawulu nə ri? I ku kurtə nggəlar ni ta ndzi kuthlir Israila. Kulini, kətə təmbəl kara nghyantə ka mal zaitun, ka gə mwari ahar Bethlelehem, avəyar mdə laga ka thləmari Yesse, kamnyar I ku carɓəla pal akwa nca maɗashilərni ka tsa ndzi kuthli.”

²Amma Samiwal pəla, “Apa madi tə I ata mzhi hara su apani ri? Ai, ma Shawulu nggata tsa ata tsi ra!” Antə MTHLAKU shinau ka pəla, “To, kətə kəna ka gə təra mwari kəgari, ma sakatə ga ku mzhitə ka gə pəla abbər gə si sə hamta saɗaka aka MTHLAKU.

³Ka gə kəga Yesse ka tsa si akwa vəi saɗaka ni. Anda antə I ata pəla ala gə su tə ka gə hara. Ga ata ɗangkər mal ar barkər ata kəra mdə tə I ku pəla ala ga.”

⁴Antə Samiwal ku hara su tə MTHLAKU ku pəla alari. Sakatə tsa mzhitə Bethlelehem təng mji ol'olər di ni lalitə ni ka dza ɗa akwa kədza. Da yu ni ka pəla, “Gə si azi ni lapiya, mdə ragai?”

⁵Antə tsa pəla, “I, lapiya. I si sə hamta saɗaka aka MTHLAKU. Namtə gir kər giri ka giri ndzi kəcəkəcari akəma Hyel, ka giri si ka mburu mwari akwa vəi saɗaka ni.” Antə tsa namtə Yesse kəga maɗa'ni, tə da ndzi kəcəkəcari, ka pəla ala ɗa ka da paktə mwari akwa vəi saɗaka ni kəga tsa.

⁶Sakatə Yesse kəga maɗa'ni ku mzhitə vəi saɗaka ni, təng Samiwal wutə Eliyab na ɓzər Yesse. Təng Samiwal dzama akwa ɗəffari abbər, “I tamatə mdə ngəni athləthlata akəma MTHLAKU ni an ata ndzi mdə tə MTHLAKU ku carɓəla ni.”

⁷Amma MTHLAKU ku pəla alari, “Ga aɗiya wul saɓəlkurərni wala dakwikurərni wa, kamnyar I ku nggəlar ni. Laku tə MTHLAKU ana wutə su akwa, aɗi apani antə mda ana wutə wa. Mda ana wul mda atar dzari, amma MTHLAKU ana wul ɗəffu.”

⁸Antə Yesse ku kəga ɓzərni Abinadab ka səntə ni akəma Samiwal. Amma Samiwal pəla, “Wala ngəni ma, MTHLAKU aɗi carɓəla ni wa.”

⁹Antə Yesse pəla aka Shamma ka tsa sə təramta akəma Samiwal. Amma Samiwal pəla, “Wala ngəni ma, MTHLAKU aɗi carɓəla ni wa.”

¹⁰Apani Yesse ku vu tə maɗa'ni murfa ku si ka təramta akəma Samiwal. Amma Samiwal pəla alari, “MTHLAKU aɗi carɓəla wala pal akwa nca nayeri ni wa.”

¹¹Antə Samiwal pəla, “An kura maɗa' ngə ya?” Yesse shinau ka pəla, “Awa, gajirna aɗi, amma tsa akwa ɓəla təma akwa mtakəu.” Antə Samiwal pəla, “Thlenta alari ka tsa si, kamnyar mburu aɗi ata hamta saɗaka ni wa tar ma tsa ku si.”

¹²Antə Yesse ku thlentə ka mdə kəga ni, antə tsa ku si. Ɓzər ni dakwi ka duna, lapiya ndəlang, ka ncari tsərək tsərəku. Antə MTHLAKU pəla aka Samiwal, “Thlata, kara ɗangkər mal ar hamta mda aka Hyel ni ata kərari, kamnyar tsa antə I carɓəla.”

¹³Antə Samiwal kətə mal na akwa təmbəl ni, ka ɗangkər aka Dauda akəma maɗama'ni. Tsu vir nda antə mambələr MTHLAKU baɗitə si ata kəra Dauda, ka dunautə ni swaiswai. Antə Samiwal ku thlatə ka ngka ahar Rama.

¹⁴Akwa saka ngəni mambələr MTHLAKU ku kurtə zhar Shawulu, antə mambəl na ɗimi ku thlata akəla MTHLAKU ka ləkwa ɗar bwani alari.

¹⁵Antə buɗayeri arni pəla alari, “Nggədza mambəl na ɗimi ku thlata akəla Hyel akwa ɗar bwani ala ga.

¹⁶Ka barkar nga! Ma ga hira, yeru ata mwari ra bara mdə na asəndə tsa yakandi, natə kəlara sakatə mambəl na ɗimi ni ku thlata, tsa ata tsa yakandi ni kamnyar ka hangkala gə pəpəi.”

¹⁷Antə Shawulu pəla aka mjir kəthlər alari, “To, paktə giri ali mdə na asəndə tsa yakandi msəra, ka giri səntə ni ali.”

¹⁸Duku akwa nca mjir kəthlər alari ni pəla, “I ku ɗar wutə ɓzər Yesse na mdər Bethlelehem, ɓzərni ana tsa su msəra. Tsuwa tsa katsala ka masəku akwa mpa. Ɓzər ni dakwi, tsa asəndə gari, tsuwa MTHLAKU ata vəi duku ka tsa.”

¹⁹Antə Shawulu ku thlentə mji adzə Yesse abbər, “Thlenta ali ɓzər nga Dauda, na ana ɓəla təma ni.”

²⁰Antə Yesse ku ɗəmhə kwara ka mbwata alari susəma, ka mpəla ar yimər anap, ka ɓzər kwi, ka thlentə Dauda kəgari aka Shawulu.

²¹Antə Dauda ku si ka ləkwa kəthlər aka Shawulu. Shawulu hir ni ka duna ka namtə ni mdər kəl alari kari mparni.

²²Antə Shawulu ku thlentə kuraku aka Yesse abbər, “Zhar ka Dauda ndzəndzi azi ka tsa hara kəthlər ali bu, kamnyar I akwa nggatə msərakur ni.”

²³Təng akwa sakatə nda, kəlara sakatə mambəl na ɗimi tə Hyel ana thlentə ni ku si ata kəra Shawulu, Dauda ana kətə yakandi ka tsa tsa alari. Antə mambəl na ɗimi ni ana zhar ni, apani antə Shawulu ana wutə lapiyakur.