Read bura-pabir 1 Samiwal 17 Bible Online

1 Samiwal 17 - bura-pabir bible

1 Samiwal 17

¹Vir laga sojayeri ar Filistiya ku tsaptədzi kamnyar mpa akwa vəi laga tə mda ana kəga Efes Dammim akwa daɓwa Soko ka Azeka.

²Antə Shawulu ka mjir Israila tsuwa ku tsaptədzi ka ndzəndzi akwa Mular Ela, ka ɗəmhədzi kamnyar mpa ka mjir Filistiya.

³Mjir Filistiya ku ntəhəmtadzi ata kəra gar na pal aɓəla bwanda, antə mjir Israila ku ntəhəmtadzi ata kəra gar na dukwari aɓəla bwani, ka mular ni akwa daɓwa ɗa.

⁴Antə mdə laga ka thləmari Goliyath ahar Gath ku səɓəla akwa vəi tə mjir Filistiya fəli akwa ni abbər tsa ata mpa mjir Israila. Saɓəlkurərni ku hara apa dzartsi ngkwa ka mandaɓa tsi pal.

⁵Tsa hatə dzakwar liya tə mdə nam ka əmza, ka ləptər liya natə kəgəɓkurari kilogram ntəfkumari ka murfa.

⁶Tsa hartə nggilangari ka liyar əmza, ka hahəi katsakar ar əmza ata thlimbəlari.

⁷Bitkur zwal mwasərni apa dəla, kəgəɓkur kəra mwasərni tə mdə nam ka liya mənggəl tsuwa ku hara kilogram murfa. Tsuwa mda aɗi pal na akwa kəl alari partauwurni akəmari.

⁸Antə Goliyath ku thləthlatə ka hara kuraku aka sojayeri ar Israila na ntəhəmtadzi ni abbər, “Man su tə giri akwa səkari ri? I na wuta apa giri səɓəla ni kamnyar mpa pwa ya? I mdər Filistiya, ar giri, giri mjir Shawulu! Carɓəla giri mdə pal akwa nca giri, ka tsa si ka yeru mpa ka tsa.

⁹Ma tsa ku mzhi mpa ka iya har ka tsi ra, yeru ata ndzi mafar giri. Amma ma I ku nggyari ni ka tsi ni, giri ata ndzi mafar yeru, ka giri hara kəthlər ala yeru!

¹⁰Ashina I ku rutəmta shanga sojayeri ar Israila. Ma giri amzhi ka giri carɓəla mdə pal tə ka yeru mpa ka tsa.”

¹¹Sakatə Shawulu kəga mjirni ku nggatə gariyir mdər Filistiya ni, antə da ku thlivəra ka yakata.

¹²Dauda an ɓzər Yesse na mdər Efrathla akwa Bethlelehem ar Yahuda. Yesse ka maɗashili ncisu. Sakatə Shawulu akwa hara kuthlikur Yesse ku kurtə hali.

¹³Maɗashilərni na ol'ola makər ni ku nu Shawulu ka mwari akwa vəi mpa. Ɓzər na olta shang an Eliyab, na ata nu ni an Abinadab, ka na makərkur an Shamma.

¹⁴Dauda an gajir ɗa. Antə maɗashili na ol'ola makər ni ku təra kəga Shawulu.

¹⁵Antə ar Dauda tsa ana mwari akwa vəi fəliyir sojayeri ar Shawulu ka ngka ahar Bethlelehem kamnyar wul təmar baba'ni.

¹⁶Antə Goliyath ku ləkəma ka nggənggəl mjir Israila ɗəɗəpa ka tahaku har vir nfwarkumari.

¹⁷Vir laga Yesse pəla aka Dauda, “Kara hara taktar ka gə kətə mthli ptsaptsa kilogram kuma ka kər buradi kuma ka gə mwanta aka maɗama' nga akwa vəi mpa ni.

¹⁸Tsuwa ka gə kətə ɗəvər mal thla ngəni ka gə mwanta aka olər sojayeri ni. Ka gə yutə lapiyakur maɗama' nga, ka gə ngka ka su na ata ncanta abbər ga ku wutə ɗa, tsuwa da lapiya.

¹⁹Kamnyar Kuthli Shawulu, ka maɗama' nga, ka shanga mjir Israila akwa mpa mjir Filistiya akwa Mular Ela.”

²⁰Səɓəla ɗəpari ɗəɗəpa sakatə Dauda thlata, antə tsa zhar mdə damwa adzə təmayeri ni, ka kətə susəm ni, ka təra kəgari apatə Yesse ku pəla alari. Antə Dauda ku mzhitə vəi fəliyir ɗa akwa sakatə kalkal sojayeri ar Israila akwa ləɓəla kamnyar mwari akwa vəi thləthlatə ka mpa ni, tsuwa da akwa ləɓəla ka kuraku ar mpa.

²¹Antə sojayeri ar Filistiya ka sojayeri ar Israila ku ntəhəmtadzi kamnyar mpa, ka bwakəma ɗa akwa wuldzi.

²²Antə Dauda zhar kariyirni ni adzə mdər wul susəmər sojayeri, ka hwi mwari akwa vəi tə sojayeri ntəhəmtadzi kamnyar mpa ni. Antə tsa mwari adzə maɗama'ni ka thlawar ɗa.

²³Sakatə tsa akwa gari kəga da, təng Goliyath səɓəla akwa vəi fəliyir mjir Filistiya ni, ka ləkwa nggənggəl mjir Israila apatə tsa ana hara hwatu. Tsuwa Dauda ku nggatə ni.

²⁴Sakatə mjir Israila wutə Goliyath, antə da ngka ka bwahili kamnyar thlivəra.

²⁵Da pəla aka nvwa ɗa, “Wul giri mdə ngənda akwa si ni! Tsa ana səɓəla kamnyar ka tsa nggəl mjir Israila! Diya har kuthli pəla abbər tsa ata nar watsəɓə na ola aka kəlara mdə na ku mzhi tsi mdə ngəni, tsuwa tsa ata nar ngkwarni ka tsa kəla. Tsuwa mjir kutakəyir baba'ni aɗi ata ntə tsəma wa.”

²⁶Antə Dauda ku yu sojayeri na kudzəha adzə ni abbər, “Man su tə mda ata nar aka mdə na ku tsi mdər Filistiya ngəni ka msərantə mjir Israila akwa sur səli ngəni? Amma shang mdər Filistiya ni mə laga ri? Mdə ngəni kərɗi kula kaciya ni an ata nggələmta sojayeri ar Hyel na ka mpika?”

²⁷Antə mdə pəla alari su tə mda ata hamta aka mdə na ku tsi Goliyath.

²⁸Sakatə Eliyab na ɓzərma Dauda nggatə Dauda akwa gari ka sojayeri ni, antə ɗəffari ku ɓzi adzə ni, tə tsa pəla, “Man su tə gə sə harari azi ri? Gə təra kazhar təmayeri na akwa mtakə ni aka wa ri? I asəndə mulmulkurər nga ka kər ɓəɓalkurər ngə ni. Gə si ndzang kamnyar wul mpa!”

²⁹Antə Dauda shinau ka pəla, “Man su tə I hara ri? I amzhi yu su wa ya?”

³⁰Antə Dauda ku shinardzi abwar mdə damwa ka jaktə yutə su tə tsa yu nda, antə mdə ku hamta alari amsa tsu apa na ntangkəma ni.

³¹Tsuwa Sojayeri laga ku nggatə su tə Dauda pəla ni, antə da pəla aka Shawulu. Antə Shawulu thlenta abbər ka mdə kəga ni alari.

³²Sakatə Shawulu yu Dauda, antə Dauda pəla alari, “Ka far ngə fəi, mda aɗiya thlivər mdər Filistiya ngəni wa, kamnyar I na mafar nga ata mwari kəi mpa ka tsa.”

³³Amma Shawulu pəla aka Dauda, “Awa, ga amzhi mpa ka mdər Filistiya ngəni wa, kamnyar gə tsu ɓzəngkyar, arni tsa ku tsəli ka mpa təng tə tsa ɓzəngkyar.”

³⁴Amma Dauda pəla aka Shawulu, “Ka far ngə fəi! Ai, I ana ɓəla təmar baba'na. Antə kəlara sakatə tsəngi wala mwaɓəlu ku ngkaɓəla ɓzər təma akwa ciɓa,

³⁵I ana nu ni, kəi dlaɓu ni, kəi dlutsə ɓzər təma ni akwa mnyari. Ma tsəngi ni wala mwaɓəlu ni ku shinangkərdzi ali, I ata tamtə shishir kumiyari kəi dlaɓu ni har kəi tsi ni.

³⁶I na mafar nga ku tsəgəi tsəngiyayeri kəga mwaɓəlayeri, antə tsu apani antə I ata hara ka mdər Filistiya na kərɗi kula kaciya ni, təng tə tsa ku nggəl sojayeri ar Hyel na ka mpika.”

³⁷“MTHLAKU na msərantə ra akwa tsiya tsəngi ka mwaɓəlu ni, ata msərantə ra akwa tsiya mdər Filistiya ni.” Antə Shawulu pəla aka Dauda, “To, mwari kara mpa ni, ka MTHLAKU ndzi adzə nga.”

³⁸Antə Shawulu fatə kariyir mpa arni ka hadza aka Dauda. Tsa tsangkər alari dzakwar mpa tə mdə nam ka əmza, ka hadza alari ləptər liya.

³⁹Antə Dauda ku hadzə katsakarər Shawulu ata kəra ləptər liya ni, ka ngkərtə mwa, amma tsa amzhi wa, kamnyar tsa aɗi tsəli ka ha ɗa wa. Antə tsa pəla aka Shawulu, “I amzhi mpa ka kariyayeri ngəni wa, kamnyar I aɗi tsəli ka ha ɗa wa.” Antə Dauda fəi kariyayeri ni.

⁴⁰Antə tsa kətə zwal ɓəla arni, ka cartsə pelayeri laga na lələɓu ntəfu akwa zərkəu, ka puwa akwa thləvur ɓəla arni. Antə tsa kətə mavinding arni ka mwari kudzəhə ka mdər Filistiya ni.

⁴¹Antə mdər Filistiya ni shahədzi kudzəhə ka vəi tə Dauda ata, ka mdər kəsi alari partauwurni ni akwa mwa akəmari.

⁴²Sakatə Goliyath wulɓəla abbər Dauda dakwi gapani mi wa tsa tsu ngkyar, antə tsa rutəmta ni.

⁴³Tsa pəla aka Dauda, “Ga ana wuta apa I kila ya tə ga ata si adzə ra ka zwal ni?” Antə tsa nggəl Dauda ka thləma haptayeri ar Filistiya.

⁴⁴Tsa pəla aka Dauda, “Ar ngə sər azi bu! Antə I ata hamta kumər dza ga aka mwaɓi mtakəu kəga ɗika ka da səməmnya.”

⁴⁵Antə Dauda shinau alari ka pəla, “Ga akwa si adzə ra ka katsakar, ka mwasu, ka gali, amma arna I ata mwari adzə nga akwa thləma MTHLAKU na ka Duna ta Shang, Hyelər sojayeri ar Israila natə gə nggəl ni.

⁴⁶Ashina ngəni MTHLAKU ata hamta nga akwa tsi. I ata tsi nga kəi nthləmta kəra ga. Tsuwa tsu ashina antə I ata hamta mshiyir sojayeri ar Filistiya aka ɗika ka mwaɓi mtakəu ka da səma. Antə duniya shang ata sənda abbər jiri Hyel aɗi akwa Israila.

⁴⁷Antə shanga mji na azi ata sənda abbər MTHLAKU aɗi ata tur katsakar wala mwasu kamnyar mbantə mjirni wa. Mpa ngəni an ar MTHLAKU, antə tsa ata hamta giri shang akwa tsiya yeru.”

⁴⁸Sakatə Goliyath jaktə shahədzi kudzəha kamnyar ka da kəɓa ka Dauda, antə Dauda kəli hwi akwa mwari adzə layi mpa ni ka da kəɓa ka tsa.

⁴⁹Antə Dauda hau tsiyari akwa thləvurni ka kəɓəla pela, ka vu akwa mavinding ni, ka ndzəhə Goliyath kəgari. Antə pela ni pwa ata murkəma Goliyath har ka sha akwa kəmari ni. Antə tsa ndla ka mnya ɗəffari ata di.

⁵⁰Apani antə Dauda ku nggyari Goliyath na mdər Filistiya ni ka mavinding ka pela daci! Tsa ndzəhə ni ka pela, ka tsi ni kula katsakar akwa tsiyari.

⁵¹Antə tsa tsəkwar hwi ka mwari ka thləthlata abwa kərari, ka kətə katsakarər Goliyath ni, ka ntsuɓəla akwa kəyari, ka tsi ni, ka nthləi kərari kəgari. Sakatə mjir Filistiya wuta abbər mdə na katsalar mpa arɗa ku mti, antə thlivər ku ngkəi ɗa har tə da hwi.

⁵²Antə sojayeri ar Israila ka na ar Yahuda ku thlatə ka kuraku ka kədlə mjir Filistiya ni har ka mwari adzə nyarfur bərni Gath ka bərni Ekron. Antə mjir Filistiya natə mdə ku dəkəi ɗa ku ləkəma ka ndla ata kər ata kər ata lakur Shaarayim har ka mwari ahar Gath ka Ekron.

⁵³Sakatə mjir Israila ku ngka akwa kədlə mjir Filistiya, antə da famnya shanga su tə da wuta akwa vəi fəliyir mjir Filistiya ni.

⁵⁴Antə Dauda ku kətə kəra Goliyath ka mwanta ahar Urushalima, ka pwi kari mpa ar Goliyath akwa tentərni, tsa na Dauda ka kərari ni.

⁵⁵Sakatə Shawulu wutə Dauda akwa ləɓəla ra mpa Goliyath, antə tsa yu Abner na olər sojayeri ni abbər, “Abner, ngəni ɓzər wa ri?” Antə Abner pəla alari, “Ka far ngə fəi, Bundi! Jiri, I asəndə wa.”

⁵⁶Antə kuthli pəla alari, “To, mwari ka ra yuɓəla ali mdə na ya ni.”

⁵⁷Apani sakatə Dauda ku ngka aghəla tə tsa ku tsi Goliyath, antə Abner ku mwantə Dauda ka kəra Goliyath akwa tsiyari akəma Shawulu.

⁵⁸Antə Shawulu yu Dauda abbər, “Ɓzər dakwi, gə ɓzər wa ri?” Antə Dauda hamta amsa abbər, “I ɓzər buɗar nga Yesse na ahar Bethlelehem.”