Read bura-pabir 1 Samiwal 19 Bible Online

1 Samiwal 19 - bura-pabir bible

1 Samiwal 19

¹Vir laga Shawulu pəla aka ɓzərni Jonathlan ka kwakunayeri arni abbər ka da tsi Dauda. Amma Jonathlan ku hir Dauda ka duna.

²Antə Jonathlan pəla aka Dauda, “Baba'na akwa bara tsi nga. Antə ka gə hara hangkal ɗəpə ɗəɗəpa, ka gə ra bara vəi tə ga ata ɗuwardzi akwa.

³Arna I ata ləɓəla ata kəma duku ka baba'na akwa mtakə tə ga ata ɗuwardzi akwa ni. I ata gari ka baba'na ata kəra ga, antə kəlara su tə I wuta, I ata pəla ala ga.”

⁴Antə Jonathlan ku gari na ɓɗaku ata kəra Dauda aka Shawulu ka pəla, “Ka far ngə fəi! Ga aɗiya hara su na ɗimi aka buɗar nga Dauda wa. Tsa aɗi ɗar hara su na ɗimi ala gə wa. Ata vəya ndaga, shanga su tə tsa hara ku ndzi sur dlara ala ga.

⁵Tsa psəmta mpikari sakatə tsa tsi Goliyath, antə MTHLAKU ku səntə mbantədzi na ola aka Israila. Wala gə ma, sakatə gə wutə su ngəni ga ku hara kucali. Kaha, kamnyar mə tə ga akwa bara hara su na ɗimi aka mdə na kula biku apa Dauda ri? Kamnyar mə tə ga ata bara kəl mpikari kula suari aɗi ri?”

⁶Antə Shawulu ku nggatə ndərər Jonathlan ni, antə Shawulu kahyel akwa thləma MTHLAKU na ka mpika abbər tsa aɗi ata tsi Dauda wa.

⁷Antə Jonathlan ku kəga Dauda ka pəla alari shanga su tə Shawulu pəla. Antə tsa mwantə Dauda aka Shawulu. Antə Dauda ku ləkəma ka kəthlər aka Shawulu tsu apa na hwatu.

⁸Aghəla nda antə mpa ku jaktə thlata akwa daɓwa Israila ka Filistiya. Antə Dauda ku pwa ata kəra ɗa ka mpa ka mula ala ɗa har tə da ku hwi alari.

⁹Vir laga sakatə Shawulu andzəndzi avəyarngkiɗa ka mwasu akwa tsiyari, təng mambəl na ɗimi thlata akəla MTHLAKU ka si ka ləkwa dzari. Sakanda Dauda adzə ni ambwa akwa tsa yakandi.

¹⁰Antə Shawulu thləl Dauda ka mwasu ni abbər ka tsa paktə ni ka banggwa, amma Dauda ku guɗəmta, antə mwasu ni ku pwa aka banggwa. Antə Dauda ku hwi ka msərəmta tsu vir nda aviri.

¹¹Tsu tahaku nda antə Shawulu thlentə mjirni ka da ra sək kəyir Dauda, kamnyar ka da sə tsi ni səɓəla ɗəpari. Amma Mikal na mwala' Dauda ku tsaktə ni ka pəla, “Ma ga aɗi hwi ashina aviri ni wa, ɗəpa mda ata tsi nga.”

¹²Antə Mikal haɓəla Dauda ata windau, antə Dauda ku hwi ka msəra.

¹³Antə Mikal kətə haptər kutakəyir ɗa na dludzi ka mdə ni, ka peri ata dəkəl, ka səntə shishir kwi ka puta ata bwa kərari, ka pungkər alari zhaɓi.

¹⁴Sakatə Shawulu thlentə mjirni abbər ka da ra ngkəi Dauda, antə Mikal pəla ala ɗa abbər tsa aɗi lapiya wa.

¹⁵Antə Shawulu jaktə thlentə mji ni adzə Dauda ka da wutə Dauda ka nca ɗa sur ɗa. Tsa tsawa ala ɗa abbər, “Ka giri səntə ni ata dəkələrni kəi tsi ni.”

¹⁶Sakatə mji ni ləmbwar Dauda, təng da wutə haptu an ata dəkəl ni ka shishir kwi abwa kərari.

¹⁷Antə Shawulu pəla aka Mikal, “Kamnyar mə tə gə pwaktəmta ra apani ka zhar tə dawarna msər ri?” Antə Mikal shinau alari ka pəla, “Tsa pəla tsa ata tsi ra ma I aɗi dlar ni ka tsa msər wa.”

¹⁸Sakatə Dauda ku msəri, antə tsa hwi ka mwari adzə Samiwal ahar Rama, ka jikata alari shanga su tə Shawulu hara alari. Antə tsa ka Samiwal ku təra mwari akwa zarar naɓiyayeri ka ndzəndzi anda.

¹⁹Antə labar ku mzhitə Shawulu abbər kulini Dauda akwa zarar naɓiyayeri na akwa Rama.

²⁰Antə Shawulu ku thlentə mji ka da ra ngkəi ni. Amma sakatə da mwari təng da wutə naɓiyayeri ni akwa hara naɓikur, ka Samiwal athləthlata akwa nca ɗa akwa pwar ɗa. Kula səndər ɗa təng mambələr Hyel səghəi ka ləkwa dza mjir thlentər Shawulu ni, tə da ləkwa hara naɓikur tsuwa.

²¹Sakatə Shawulu ku nggatə labar ni, antə tsa thlentə mji damwa. Amma wala da ma sakatə da ku mzhitə zarar naɓiyayeri ni təng da baɗitə hara naɓikur tsuwa. Antə tsa jaktə thlentə mji na makərkur, antə da ku hara naɓikur tsuwa.

²²Antə Shawulu baɗitə mwari ahar Rama ni ka kərari surni. Sakatə tsa mzhitə jiɓa na ola na akwa Seku antə tsa yu vəi tə Samiwal ka Dauda ata. Antə mdə laga pəla alari abbər da akwa zarar naɓiyayeri akwa Rama.

²³Sakatə tsa akwa lakur mwari ata vəi ni, təng mambələr Hyel səghəi ka ləkwa dzari tsuwa, antə tsa baɗitə hara naɓikur har tə tsa mzhitə zarar naɓiyayeri ni.

²⁴Tsa ma tsa ntsumta kariyirni, ka hara naɓikur akəma Samiwal. Tsa pəpəi dura vir nda, ka ɓukci, ka pi har tə viri kura. Vir nda aviri antə mdə baɗitə tsa karapu ngəni abbər, “Shawulu ku ndzi naɓi tsu ya?”