Read bura-pabir 1 Samiwal 2 Bible Online

1 Samiwal 2 - bura-pabir bible

1 Samiwal 2

¹Antə Hannatu ku hara adduwa ka pəla, “MTHLAKU ku nghyantə ɗəffi ka kucali. MTHLAKU ku vu tə I ku ndzi ɓəɓal ka duna. I ku kəlar mnyi akwa kumshi dawayeri arna. Jiri, I ka kucali kamnyar ga ku mbantə ra!

²Mda aɗi na kəcəkəcari apa MTHLAKU wa. Aɗi apa tsa wa, tar tsa shini, Pelar Ɗuwardzi aɗi na apa Hyelər mburu wa.

³Zhar giri gari ar hirkər ni, ka giri zhar gari ar haptə kər. Kamnyar MTHLAKU an Hyel na asəndə shanga su, tsa andər ngkərtə shanga su tə mda ana hara.”

⁴“Mdə ku ɓəgələmta layir sojayeri na katsala, amma mji na ku tsamta səla ɗa ka ndla ku jaktə wutə duna ka ndzi ɓəɓal.

⁵Mji natə sakanda da ka susəma hang kulini tar ka da bara kəthlər kambəla da wutə susəma. Amma mji na ka məi sakanda kulini da ndləndlari. Mwala natə tsa mwala ciri sakanda kulini tsa ku yaɓəla maɗa' murfa. Amma mwala na ka maɗangkyar hang sakanda, kulini tsa ata sə ndzi ka ɗəffari ɓzəɓzari.

⁶MTHLAKU andər kəl mpika mda, tsuwa tsa andər hamta mpika aka mda. Tsa andər mwantə mji akwa kula, ka tsa jaktə thlentə ɗa.

⁷MTHLAKU andər namtə mji laga ngguɗi, ka namtə mji laga ka da ndzi ka gəna. Tsa ana tərghəi kəra mji laga, ka haptə mji laga ka da ndzi su.

⁸Tsa ana kətə mda akwa bərbər ka kəcimta ni, ka kəgaɓəla mjir mtir susəma akwa vəi pumta su, ka vu ɗa səm susəma ata vəi duku ka mainayeri, ka pu ɗa akwa vəyayeri ar olkur. Kamnyar zhimbwala duniya an ar MTHLAKU, tsuwa ata kəra ɗa antə tsa nci duniya.

⁹Tsa ana ɓəlatə mpika mjirni na ka jirkur, amma mda ata kurəmta mji na ɗimi akwa kuthlu, kamnyar aɗi atar duna antə mda ana nggyari su wa.

¹⁰MTHLAKU ana hukthləmta dawayeri arni, tsa ana mpa ɗa ka dləra akwa kutar amtazi. MTHLAKU an ata hara shariya aka duniya, tsa ata vu ka kuthli tə tsa an carɓəla ndzi ka duna, ka vu ka kuthli tə tsa an vəi wutə səli ka olkur.”

¹¹Antə Elkana ka Hannatu ku ngka avəi ahar Rama. Amma ɓzər ni ku ndzəndzi ahar Shilo ka hara kəthlər aka MTHLAKU akira prist Eli.

¹²Akwa saka nda Hofni ka Finehas na maɗa' Eli ni maɗa' shambar. Su aɗi na damitə ɗa ka wujir ar MTHLAKU wa.

¹³Nggədza laku tə pristayeri ana nuwa kəlara sakatə mdə ku səntə saɗaka. Ma mdə ku səntə saɗaka, sakatə kum ni tsu akwa ɓwa akwa tughum, antə buɗar prist ata si ka cagwali na ola ar njwak su na ka thlirari makər,

¹⁴ka tsa hau cagwali ni akwa tughumər kum ni. Antə kəlara su tə tsa ku mzhi səɓəla kəgari ata cagwali ni ata ndzi ar prist. Amma nggədza su tə da ana hara aka shanga mjir Israila na ku səntə saɗaka ahar Shilo.

¹⁵Təng akəmata mda afəi malkum ni ka mbamta, buɗar prist ni ana si adzə mdə na səntə saɗaka ni ka pəla alari, “Nar kum aka prist ka tsa ptsata. Kamnyar tsa aɗi ata dlu kum ɓwaɓwa akəla gə wa tar hadluwari.”

¹⁶Ma mdə ni pəla, “Ndzi ka mdə mbamta malari katagu, kambəla gə kəta apatə ga ata barari”, buɗar prist ni ata pəla, “Awa! Na ali kulini, ma apani wa I ata kətari ka dwali!”

¹⁷Apani antə bikər maɗashilər Eli ku hara ɗimi kamta akəma MTHLAKU, kamnyar da ku rutəmta sur hamta aka MTHLAKU.

¹⁸Amma Samiwal, wala tə tsa tsu ɓzəngkyar ni, ku ləkəma ka hara kəthlər aka MTHLAKU. Antə tsa ana hatə ləptu laga ar lilin apa jili ləptər prist ni.

¹⁹Tsuwa kəlara məva mama'ni ana thli ləptu laga raka alari, ka tsa ka mwanta alari akwa kəlara sakatə da ka salngkiɗa akwa mwari ahar Shilo kamnyar hamta saɗakar məva.

²⁰Tsuwa Eli ana vədzə barka aka Elkana ka mwalankiɗa Hannatu. Eli ana pəla, “Ka MTHLAKU jaktə na ala giri maɗa' damwa ka mwala ngəni, ata vəya ɓzəngkyar ngəni tə giri hamta aka MTHLAKU ni.” Aghəla nda antə Elkana ka Hannatu ata ngka ka ləha.

²¹Antə MTHLAKU ku vədzə barka aka Hannatu, antə tsa jaktə yaɓəla maɗashili makər ka maɗangkwi suɗa. Antə Samiwal na ɓzəngkyar ku kəla akwa kəthlər aka MTHLAKU.

²²Aghəla nda antə Eli ku hali swaiswai. Amma tsa ana nggatə shanga su tə maɗa'ni ana hara aka mjir Israila, ka apatə da ana pi ka mwanki na ana hara kəthlər akwa nyarfur Tentər Kəɓa.

²³Antə Eli pəla aka maɗashilərni ni, “Kamnyar mə tə giri ana hara su apani ri? I ana nggatə labar ɗimikur tə giri akwa harari akəla mji zumzum.

²⁴Aiyi, maɗa'na! Zhar giri su ngəni! Kamnyar labar tə mjir MTHLAKU akwa ngkərari ata kəra giri ni aɗi labar na msəra wa.

²⁵Ma mdə hara biku aka nvwani, Hyel ata shwalatə ɗa, amma wan ata shwalatə daɓwa mdə ka MTHLAKU ri?” Amma da aɗi psi thləm aka su tə baba' ɗa pəla ala ɗa wa, kamnyar MTHLAKU ku ɗəmha abbər tsa ata tsi ɗa.

²⁶Antə Samiwal na ɓzəngkyar ni ku ləkəma ka kəla tsuwa tsa ku wutə mdəkur ata nca MTHLAKU ka tsuwa akəla mji.

²⁷Vir laga naɓi laga ku si adzə Eli ka pəla alari, “MTHLAKU pəla, ‘I ku ncantə kərna aka kəkar nga Haruna, ka mjir kutakəyirni akwa tsəɗi Masar, sakatə da akwa mafakur aka kuthli.

²⁸Tsuwa I ku carɓəla nyarmbwarni akwa nca shanga nyarmbwayeri ar Israila, ka da ndzi pristayeri arna, ka da hara kəthlər ata bagaɗi, ka da mba tulari ɗuza, ka kətə efod ar bara nggaɓəla su na kalkal akəli. Tsuwa I ku hamta aka kəkar nga ka mjir kutakəyirni bwar ɗa na akwa shanga saɗaka mbamba ar mjir Israila.

²⁹Kamnyar mə tə giri aɗi akwa nar daraja aka saɗakayeri ka sur hamta natə I tsawa aka mji ka da səntə wa nə ri? Gə na Eli, kamnyar mə tə ga akwa nar səli aka maɗa' nga ka təramta ra ri? Ai giri akwa təksa kamnyar tə giri akwa səm bwa na ɓɗakta shang akwa saɗaka tə mjirna sənta ali ri.’ ”

³⁰“Kamnyar ngəni, MTHLAKU na Hyelər Israila akwa pəla, ‘Waci I ku hara alkawal ala gə ka nyarmbwar nga abbər giri an ata hara kəthlər pristkur ali ba saka madi, amma kulini I aɗi ata hirari kəra wa! Kamnyar I ata wutə səliyir mji na ana nar olkur ali, amma mji na ana rutə ra I ata kəli səliyir ɗa.

³¹Kamnyar saka akwa si tə I ata tsi shanga maɗashili na akwa nyarmbwar nga, ka na yangkura ga. Mda aɗi na akwa nyarmbwar nga na ata sə fəi har ka hal wa.

³²Ga ata ndzi ka damitədzi ka səlka swaiswai ma sakatə ga ku wutə hangkur barkayeri tə I ata pungkər aka mjir Israila, amma akwa nyarmbwar nga mda aɗi na ata fəi har ka hal wa.

³³I aɗi ata kurəmta shanga mji na akwa nyarmbwar ngə wa. Amma mdə tə I ata mbilarari kamnyar hara kəthlər pristkur ali ata sə vu ka shimwi hartə nca ga, ka ɗəffa gə ɓza ka duna. Tsuwa shanga mji na mbila akwa nyarmbwar nga ata sə mta akwa sakar dakwikurər ɗa.

³⁴Nggədza su na ata ncanta ala ga abbər suayeri ni ata sə hara jiri. Maɗashilər nga na suɗə ni Hofni ka Finehas ata mtə vir duku.

³⁵I ka kəri surna an ata sə thlentə prist na ata ndzi ka jirkur ali, antə tsa ata hara shanga su tə I ata bara ka tsa hara. I ata na alari kəkayeri na ata hara kəthlər tədəku aka kuthli tə I ku vəi.

³⁶Antə kəlara mdə na ku mbili akwa nyarmbwar nga ata sə si ka zuzuri akəmari ka kiɗə kwaba ka susəma. Tsuwa da ata kiɗə ka mdə zhar ɗa ka da hara kəthlər pristkur kamnyar ka da wutə susəma tə ka da səma.’ ”