Read bura-pabir 1 Samiwal 21 Bible Online

1 Samiwal 21 - bura-pabir bible

1 Samiwal 21

¹Antə Dauda ku təra ləhar Nob adzə Ahimelek na prist. Antə dza Ahimelek baɗitə kədza sakatə tsa səɓəla ka wutə Dauda. Antə tsa yu Dauda abbər, “Apa madi tə gə duku shingə ri? Kamnyar mə tə mda aɗi adzə ngə wa ri?”

²Antə Dauda shinau aka Ahimelek na prist ni abbər, “I sə hara wujir aka kuthli, tsuwa tsa tsawa ali abbər I aɗiya zhar ka mdə damwa səndə su tə tsa thlentə ra kəi sə harari ni wa. Tsuwa ata kəra mjirna ni, I ku pəla ala ɗa vəi tə ka da ra wutə ra ata.

³Kulinari ni, man susəma tə gə kəgari ri? Na ali kər buradi ntəfu, wala kəlara su tə gə kəgari.”

⁴Antə prist ni shinau aka Dauda abbər, “I aɗi ka buradi na ndzang wa, tar buradi na ɓɗakkarkara. Ga ata mzhi kətari ka giri kwasa ma sojayeri ar nga aɗi haɗa pi ka mwala wa.”

⁵Antə Dauda shinau abbər, “Jiri, mdə ku ngkata ala yeru mwari adzə mwanki tsu apatə mdə tsəli ka harari. Mjirna ana ɓəlatə dza ɗa ɓɗaku ka da ndzi kəcəkəcari tədəku, kula dlimburkur, wala ma yeru an akwa ləɓəla na ndzangari, zhar ka ləɓəla na ola apa ngəni wa!”

⁶Antə prist ku nar buradi na ɓɗakkarkar ni aka Dauda təng tə buradi damwa aɗi wa, tar buradi tə mdə vəi akəma MTHLAKU. Apani antə prist ku kətə buradi na ata kəra tebər akəma MTHLAKU ni ka paltə ka na tsu gərgər tə mdə haɗa ɓwatari, ka hamta buradi na ɓɗaku ni aka Dauda.

⁷Tsuwa vir nda pal akwa nca mjir kəthlər aka Shawulu na ka thləmari Doweg na mdər Edom ni aɗi anda akəma MTHLAKU. Tsa an katsala ta shanga akwa nca mjir ɓəla mwaɓiyir Shawulu. Antə mdə ku kəsi ni kamnyar tsa an olər mjir ɓəla mwaɓiyir Shawulu.

⁸Antə Dauda yu Ahimelek na prist ni abbər, “Gə ka mwasu wala katsakar tə ga ata mzhi ni ya? Kamnyar wujirər kuthli ni akwa bara ka mdə hara ka huva, antə I aɗi mzhi ndzi ka kətə katsakarərna wala kari mpa laga wa.”

⁹Antə prist ni shinau alari abbər, “I ka katsakarər Goliyath na mdər Filistiya tə gə tsi akwa Mular Ela ni. I pərtə ni akwa zhaɓi, ka vəi ni abwahila efod na ar yuɓəla su akəla Hyel. Ma ga ata barari, kəta. Kamnyar an kura kariyir mpa na azi.” Antə Dauda pəla, “Ai, katsakar aɗi damwa na təramta ni wa! Antə na ali ni.”

¹⁰Antə vir nda Dauda ku hwi ta Shawulu ka mwari adzə Kuthli Akish ahar Gath.

¹¹Amma kwakunayeri ar kuthli pəla alari, “Ngəni aɗi an Dauda na kuthlir tsəɗiyirni ni wa ya? Aɗi tsa antə mwanki hu ni ka ɓathla ka ha alari abbər, “ ‘Shawulu ku tsi mji dəpu, Ar Dauda dəpu ata kəra dəpu’ nəng?”

¹²Antə Dauda ku dzama ata kəra ndərayeri ngəni ka ləkwa thlivər su tə Kuthli Akish ata mzhi hara alari.

¹³Antə tsa baɗitə hara su akəma ɗa apa mdə tə kərari ku tsa, tə kəlara sakatə tsa adzə ɗa tsa ana namtə kərni apa tsa ka cicu. Tsa ana ɗaha su kəlara kəlara ata tapərar nyarfur bərni, ka zhar mtili akwa hwi ka səghəi ata kumiyari.

¹⁴Antə akwa tsikərari Kuthli Kish pəla aka kwakunayeri arni abbər, “Azha mdə ni ka cicu! Kamnyar mə tə giri səntə ni ali ri?

¹⁵I pəla ala giri abbər I akwa tur mji na ka cicu ya, tə giri ata sənta ali mdə ngəni ka tsa hara cicukur akəmi ni? Mdə ngəni antə giri ata zhar ni ka tsa si aharngkəya?”