Read bura-pabir 1 Samiwal 22 Bible Online

1 Samiwal 22 - bura-pabir bible

1 Samiwal 22

¹Antə Dauda ku hwi kazhar bərni Gath ka ləkwa ku laga akwa tsəɗi Adullam. Sakatə maɗama'ni ka mjir kutakəyir ɗa nggata abbər tsa anda, antə da hwi ka ra wutə ni.

²Antə mji natə mda akwa na ɗa bwani, ka mji natə mda akwa nu ɗa təmbəl, ka mji na ka damitədzayeri, shanga ɗa ata kəma duku an apa mji aru nfwar. Antə tsa ku ndzi ola ata kəra ɗa.

³Antə Dauda ku thlatə kazhar Adullam ka təra mwari ahar Mizpa na akwa tsəɗi Mowab, ka gari aka kuthlir Mowab. Tsa pəla alari, “Usa, zhar ka baba'na ka mama'na sə ndzəndzi adzə nga akwabə I anggaɓəla su tə Hyel ata hara ka iya.”

⁴Antə Dauda ku zhar mjir yarni akwa tsiya kuthlir Mowab. Antə da ku ndzəndzi anda akwa shanga sakatə Dauda akwa vəi ɗuwardzərni akwa ku ni.

⁵Antə naɓi laga ka thləmari Gad si ka pəla aka Dauda, “Ga aɗiya ndzi azi wa, mwa taktar, ka ra mwari akwa tsəɗi Yahuda.” Antə Dauda ku təra mwari akwa kuɓər nfwa laga akwa Hereth.

⁶Vir laga Shawulu andzəndzi ka mwasərni akwa tsiyari akira nfur mbula laga ata kəra gar ahar Gibeya, ka shanga kwakunayeri arni tsuwa ku kalaktə ni. Antə mdə laga si ka pəla alari abbər mdə ku wutə vəi tə Dauda ka mjirni ata.

⁷Antə tsa pəla aka kwakunayeri arni, “Psi gir thləma giri, giri na mjir Benjamin! Giri tamata abbər Dauda ata mzhi na giri fakayeri kəga fakər anap ya? Nənga giri tamata abbər tsa ata na giri olkur ata kəra sojayeri arni na dəpu dəpu kəga na aru aru nə ri?

⁸Kamnyar mə tə giri akwa ɗəmhə ɗimikur ata kəri ri? Mda aɗi akwa nca giri na pəla ali abbər ɓzərna ku paktə kər ka ɓzər Yesse wa, tsuwa mda aɗi na damitədzi ata kəri wa. Mda aɗi na pəla ali abbər ɓzərna ku hatkər aka Dauda na buɗarna ka tsa həla ra ashina wa.”

⁹Akwa saka ndaga Doweg na mdər Edom athləthlata anda kəga kwakunayeri ar Shawulu. Antə tsa pəla, “I ku wutə Dauda sakatə tsa mwari adzə Ahimelek na ɓzər Ahitub ahar Nob.

¹⁰Antə Ahimelek ku kiɗə MTHLAKU ata kəra Dauda, ka na alari susəma ka katsakarər Goliyath na mdər Filistiya.”

¹¹Antə Kuthli Shawulu ku thlentə ka mdə ra kəga alari Prist Ahimelek ka shanga yangkurari na pristayeri ahar Nob. Antə shanga ɗa ku si adzə kuthli ni.

¹²Antə Shawulu pəla aka Ahimelek na ɓzər Ahitub abbər, “Psi thləma ga, Ahimelek.” Antə Ahimelek pəla, “I akwa nggari, ka far ngə fəi!”

¹³Antə Shawulu pəla alari, “Kamnyar mə tə giri ka Dauda ɗəmhə ɗimikur ata kəri ri? Kamnyar mə tə gə na alari susəma, ka katsakar, ka kiɗa alari Hyel ri? Nggədza kulini tsa akwa hara kər ɓəɓalkur ali, tsa akwa həla ra!”

¹⁴Antə Ahimelek shinau aka kuthli abbər, “Akwa nca shanga kwakunayeri ar nga, wan ka jirkur apa Dauda ri? Tsa an salngkwar nga, ka olər mjir sək kəra ga, natə shanga mji ana nar səli akwa kəyir nga.

¹⁵Jiri, I ku kiɗa alari Hyel, tsuwa aɗi ngəni an na ntangkəmari wa. Tsuwa ata kəra ɗəmhə ɗimikur ata kəra ga, ka far ngə fəi, usa ga aɗiya vəngkər ali biku wa, wala aka mdə laga akwa kutakəyirna wa. Kamnyar I aɗi səndə su ata kəra su ngəni wa!”

¹⁶Antə kuthli pəla alari, “Ahimelek, jiri ga ata mta, ga kəga shanga mjir kutakəyir nga.”

¹⁷Antə kuthli ni pəla aka mji na akwa sək kərari na kalaktə ni ni abbər, “Tsi giri pristayeri ar MTHLAKU! Kamnyar da ku mbwa kir aka Dauda. Kamnyar wala tə da ku sənda abbər tsa akwa hwi dzi, da aɗi pəla ali wa.” Amma mjir sək kərari ni aɗi hir tsəkwar pristayeri ar MTHLAKU ni wa.

¹⁸Antə Shawulu pəla aka Doweg, “Tsəgəi pristayeri ni!” Antə Doweg ku tsəgəi ɗa shang. Vir nda Doweg tsi pristayeri nciskumari ka ntəfu na ku mzhi ka da ha ləptər efod tə mdə tsa ka lilin.

¹⁹Tsuwa Shawulu ku vu tə mdə tsəgəi shanga mji na ahar Nob na bərniyir pristayeri. Mdə ku tsəgəi shili ka mwanki, maɗangkyar kəga ngkyar na ata hili, kəga thla kəga kwara, shang kəga təma.

²⁰Amma Abiyathlar na ɓzər Ahimelek na akwa nyarmbwar Ahitub ku msəri ka hwi ka ra wutə Dauda,

²¹ka pəla alari abbər Shawulu ku kurəmta pristayeri ar MTHLAKU.

²²Antə Dauda pəla alari, “Sakatə I wutə Doweg anda vir nda, I ku sənda abbər tsa ata ra pəla aka Shawulu. Antə apani kamnyarna antə mdə tsəgəi shanga mjir kutakəyir nga.

²³Ndzəndzi adzə ra. Ga aɗiya thlivər wa, kamnyar mdə na akwa bara tsi ngə ni akwa bara tsi ra tsuwa. Ga ata ndzəndzi lapiya adzə ra.”