Read bura-pabir 1 Samiwal 23 Bible Online

1 Samiwal 23 - bura-pabir bible

1 Samiwal 23

¹Vir laga Dauda nggata abbər mjir Filistiya akwa mpa ka mjir Keyila, tsuwa da akwa famnya mthlir ɗa ata lali.

²Antə tsa yu MTHLAKU abbər, “Kəi mwari ra dlər mjir Filistiya nə ya?” Antə MTHLAKU shinau ka pəla, “Mwari ka gə dlərəmta ɗa, ka gə mbantə mjir Keyila.”

³Amma mjir Dauda pəla alari, “Wula, azi ma akwa Yahuda yeru akwa thlivər sojar Filistiya, zhar ka ma sakatə yeru ku mwari ahar Keyila kamnyar dlər ɗa ya?”

⁴Antə Dauda jaktə bara nggaɓəla su ngəni akəla MTHLAKU. Antə MTHLAKU pəla alari, “Mwari ahar Keyila, kamnyar I ata hara ka giri səm mjir Filistiya.”

⁵Antə Dauda ka mjirni ku təra mwari ahar Keyila, ka dlər mjir Filistiya, ka tsəgəi ɗa hang ka famnya mwaɓiyir ɗa. Apani antə Dauda ku mbantə mjir Keyila.

⁶Sakatə Abiyathlar na ɓzər Ahimelek ku msər ka hwi ra wutə Dauda ahar Keyila, tsa mwari ka efod na ar nggaɓəla su akəla Hyel ni.

⁷Tsu akwa saka nda antə Shawulu nggata abbər Dauda ku mwari ahar Keyila, antə tsa pəla, “Barka! Hyel ku ngkəi ni ali. Kamnyar tsa ku ngkəi kərni, təng tə tsa ku ləkwa di na akwa katangga, natə liya an zwalər tsau nyarfayerari.”

⁸Apani antə Shawulu ku kəgatə sojayeri arni kamnyar ləkwa mpa, antə da ku ləghəi ahar Keyila, kamnyar ka da kalaktə Dauda kəga mjirni.

⁹Sakatə Dauda nggata abbər Shawulu akwa ɗəmha alari ɗimikur, antə tsa pəla aka Prist Abiyathlar, “Səntə efod ar nggaɓəla nufiyir Hyel ni azi.”

¹⁰Antə Dauda hara adduwa ka pəla, “MTHLAKU na Hyelər Israila, I ku nggata abbər Shawulu akwa ɗəmhədzər si ahar Keyila ka tsa ɓdləmta bərni ni kamnyarna, I na mafar nga.

¹¹Antə mjir Keyila ata sə hamta ra aka Shawulu ya? Shawulu ata si jirjiri apatə I nggatə ni ya? MTHLAKU na Hyelər Israila, I akwa kiɗa akəla ga ka gə pəla ali!” Antə MTHLAKU shinau alari ka pəla, “Shawulu ata si.”

¹²Antə Dauda jaktə yu MTHLAKU abbər, “Mjir Keyila ni ata sə hamta ra kəga mjirna aka Shawulu ya?” Antə MTHLAKU amsa abbər, “I, da ata hamta giri.”

¹³Antə Dauda ka mjirni na ku mwanta apa mji aru ngkwa ku zhar Keyila, ka mwari akwa kəlara bwa tə da ata mzhi ɗuwardzi. Sakatə Shawulu nggata abbər Dauda ku hwi kazhar Keyila, antə tsa ɓəlta.

¹⁴Antə Dauda ku ɗuwardzi akwa gar akwa mtakər Zif. Antə tədəku Shawulu akwa pakə ni, amma Hyel aɗi hamta ni akwa tsiyari wa.

¹⁵Sakatə Dauda ahar Horesh akwa mtakər Zif, antə tsa nggata abbər Shawulu akwa pakə ni ka tsa tsi ni.

¹⁶Antə Jonathlan ku təra mwari adzə Dauda ahar Horesh kamnyar dunautə ni ka tsa mbərsa ka Hyel.

¹⁷Jonathlan pəla alari, “Ga aɗiya thlivər wa, kamnyar baba'na Shawulu aɗi ata mzhi hara ala gə su wa. Tsa ka kərari asənda abbər ga an ata ndzi kuthlir Israila, antə I ata ndzi mdə na ata nu nga akwa olkur.”

¹⁸Antə japwa ɗa ku mbwi alkawal ar pazhikur aka nvwa ɗa, tə MTHLAKU an seɗar ɗa. Antə Jonathlan ku ngka avəi, tə Dauda ku ndzəndzi ahar Horesh.

¹⁹Antə mji laga ku thlata ahar Zif ka mwari adzə Shawulu ahar Gibeya ka pəla alari abbər, “Nggədza Dauda ku si ka ɗuwardzi akwa nca yeru azi akwa vəi ɗuwardzi na akwa Horesh, akwa Gar Hakila abwar anəmər mtakər Yeshimon.

²⁰Antə kulini, ka far ngə fəi, ka gə səghəi adzə yeru akwa kəlara sakatə gə hira. Yeru ɗəmhəɗəmhari ka yeru hamta ni ala ga.”

²¹Antə Shawulu shinau alari ka pəla, “Ka Hyel vədza ala giri barka kamnyar giri ku damitədzi ka iya.

²²Mwar giri ka damwa ka giri nggaɓəla vəi tə tsa ana mwari ata tədəku, ka mdə na ku wutə ni anda. Kamnyar I nggata abbər tsa ɗəɗu ka duna.

²³Nggaɓəla gir vəi tə tsa ana ɗuwardzi akwa, ka giri si ali ka ndər na jirari. Antə I ata nu giri. Antə ma tsa tsu akwa bwa ndaga, I ata pakə ni akwa kəlara vəi, wala I an ata dlarhə shanga kutakəi na akwa Yahuda.”

²⁴Antə da ku thlatə ka təra mwari akwa mtakər Zif kəma ta Shawulu. Tsuwa Dauda kəga mjirni anda akwa mtakər Mawon, təbwar mular Araba na akwa anəmər Yeshimon.

²⁵Antə Shawulu kəga mjirni ku ləɓəla akwa pakə Dauda, amma sakatə Dauda nggata antə tsa hwi ləghəi akwa gar laga ola akwa mtakər Mawon ka ndzəndzi anda. Sakatə Shawulu nggata apani antə tsa ku nu Dauda har anda.

²⁶Antə Shawulu ka mjirni ku ndzi abwanda gar ni, tə Dauda ka mjirni tsuwa abwana gar ni, ka gar ni akwa daɓwa ɗa. Antə da ku mwa ka huva kamnyar hwiyimta Shawulu, kamnyar Shawulu ka mjirni akwa hara kudzəhə ka da ngkəi Dauda.

²⁷Antə mdər thlentə laga ku si adzə Shawulu ka pəla alari, “Mwa taktar kara si! Kamnyar mjir Filistiya ku si ka pungkərdzi ala yeru na mjir Israila.”

²⁸Antə Shawulu ku zhar nu Dauda, ka ngka kamnyar ka tsa ra mpamta mjir Filistiya. An su na hara tə mda ana kəga vəi ndaga abbər Gar ar Ndəkəmtadzi.

²⁹Antə Dauda ku zhar vəi ngəni ka mwari ka ɗuwardzi akwa Engedi.