Read bura-pabir 1 Samiwal 24 Bible Online

1 Samiwal 24 - bura-pabir bible

1 Samiwal 24

¹Sakatə Shawulu ku ngka akwa mpa mjir Filistiya, antə mdə pəla alari abbər Dauda akwa mtakər Engedi.

²Antə Shawulu carɓəla sojayeri dəpu makər na masəku ta shang, antə da təra ra pakə Dauda ka mjirni kudzəhə ka Gagəmar Kwimtaku.

³Sakatə Shawulu mzhitə ku laga ata mnya laku, kudzəhə ka ciɓə laga, antə tsa pəra ka ləkwa ku ni kamnyar ka tsa samta yimi. Azha Dauda kəga mjirni tsuwa ku ɗuwardzi aghəla nda ciju akwa ku ni.

⁴Antə mjir Dauda pəla alari, “Ashina an vir tə MTHLAKU pəla ala ga abbər, ‘I ata hamta dawar nga ala ga, ka gə hara su tə gə hir ka tsa.’ ” Antə Dauda thlatə ka nggwar mwari ka thli mnya ləptər Shawulu kula tsa sənda.

⁵Amma aghəla nda Dauda ku damitədzi kamnyar tsa wuta abbər aɗi kalkal tə tsa thli mnya ləptər Shawulu ni wa.

⁶Antə tsa pəla aka mjirni, “Ka Hyel ngkatə ta I ahara su na ɗimi apani aka mdərkəyirna! Kamnyar Shawulu an kuthli tə MTHLAKU an carɓəla! Antə aɗi kalkal kəi hara ɗimikur alari wa, kamnyar tsa an kuthli tə MTHLAKU carɓəla.”

⁷Apani antə Dauda ku mnya aka mjirni abbər da aɗiya tsəkwar Shawulu wa. Antə Shawulu ku thlatə ka ləɓəla akwa ku ni ka təra.

⁸Antə Dauda ləɓəla aghəlari ka kəga ni ka kuraku abbər, “Bundi! Ka far ngə fəi.” Sakatə Shawulu shinardzi ka wutə Dauda, antə Dauda nggyarghəidzi ka kəmari ata di, ka nar səli,

⁹ka pəla aka Shawulu, “Kamnyar mə tə ga ana psi thləm aka mji na ana pəla abbər I akwa bara hara ɗimikur ala gə nə ri?

¹⁰Nggədza ashina gə ka kəra ga ku wutə laku tə MTHLAKU ku hamta nga ali akwa ku ni. Har mjirna laga pəla kəi tsi nga, amma I aɗi hir wa. Kamnyar I pəla ala ɗa abbər, ‘Tsi aɗi ata tsəkwar mdərkəyirna wa, kamnyar ga antə MTHLAKU carɓəla ka gə ndzi kuthli.’

¹¹Baba, wulhə mnya ləptər nga akəli. Təng tə I ku mzhi thli mnya ləptər nga kula I tsi nga, ka gə sənda abbər I aɗi ka ɗimikur ata kəra gə wa. Tsuwa I aɗi ka wuyimkur ata kəra gə wa. Amma ba kulini ga akwa bara kara kəl mpikəi.

¹²Ka MTHLAKU an ndzi akwa daɓwa mwa. Ka tsa ntəmta ɗimikur tə gə hara ali, amma arna kam I aɗi ata tsəkwar ngə wa.

¹³Apatə mdə ku tsa karapu waci abbər, ‘Akəla mjir hara ɗimikur antə suayeri na ɗimi ɗimi ana wutədzi.’ Apani arna I aɗi ata tsəkwar ngə wa.

¹⁴Amma gə na kuthlir Israila, wa kwang antə gə səɓəla kamnyar mpa ka tsa ni? Wa antə ga akwa kədlari nə ri? Kalkal ya ka gə shamta sakar nga akwa kədlə ra, I na aɗi suma wa apa mshiyir kila wala mafilkwi?

¹⁵Ka MTHLAKU an ndzi alkali na ata hara shariya akwa daɓwa mwa ka ncaɓəla mdə na ka biku. Ka MTHLAKU thləthlata ali ka tsa ncanta abbər I aɗi ka biku wa, ka tsa msərantə ra akwa tsiya ga.”

¹⁶Sakatə Dauda ku kuri gari ni antə Shawulu pəla, “Ngəni kuraka gə jiri ya ɓzərna Dauda?” Antə Shawulu pthləngkər tuwa.

¹⁷Tə tsa pəla aka Dauda, “Ga ku təramta ra ka jirkur. Ga ku hara ali ɓɗakkur, amma arna ɗimikur antə I akwa hara ala ga.

¹⁸Kulini ga ku ngkər ɓɗakkur tə gə hara ali. Kamnyar wala tə MTHLAKU ku hamta ra ala ga, ga aɗi hir tsi ra wa.

¹⁹Ai ma mdə na ku wutə dawarni, tsa aɗi ana zhar ni ka tsa təra kula tsa dəkəi ni wa. Ka MTHLAKU vədza ala gə barka kamnyar ɓɗakkur tə gə hara ali ashina ni.

²⁰Kulini I ku nggaɓəla abbər jiri ga ata sə ndzi kuthlir Israila, antə Israila ata sə ləkəma akwa sakar kuthlikurər nga.

²¹Amma ka gə kamtahyel ali akwa thləma MTHLAKU abbər ga aɗi ata tsi mjir kutakəyirna wa, wala shamta thləmi kəga mjir kutakəyirna wa.”

²²Antə Dauda ku kahyel aka Shawulu. Antə Shawulu ku təra ləha, amma Dauda kəga mjirni ku ngka akwa vəi ɗuwardzər ɗa.