Read bura-pabir 1 Samiwal 25 Bible Online

1 Samiwal 25 - bura-pabir bible

1 Samiwal 25

¹Samiwal ku mti, antə shanga mjir Israila ku tsaptədzi ka tuwa ni. Antə da ku ra harəmta ni akwa kəyirni ahar Rama. Aghəla nda antə Dauda thlatə ka ləghəi akwa Mtakər Paran.

²Mdə laga aɗi ahar Mawon na ka gəna hang ka duna. Tsa ka təmayeri arni dəpu makər ka kwi dəpu pal ahar Karmel. Antə tsa ana pamta shishir təmayeri ni.

³Tsuwa thləma mdə ni an Nabal ka mwalankiɗa Abigyal. Mwala ni dakwi, tsuwa tsa ɗəɗu, amma salngkiɗa na səɓəla akwa nyarmbwar Kaleb ni ana huni, tsuwa tsa kula kətadza.

⁴Sakatə Dauda akwa mtakəu antə tsa nggata abbər Nabal akwa pa shishir təmayeri arni.

⁵Antə Dauda carɓəla maɗadakwi kuma ka thlentə ɗa ahar Karmel ka da ra thlawar alari Nabal,

⁶ka pəla alari, “Ka far ngə fəi, Ka Hyel na giri lapiyakur kəga kutakəyir nga, ka tsa ɓəlatə shanga su tə gə kəgari!

⁷I nggata abbər ga akwa pa shishir təmar nga. Sakatə mjir ɓəla təmar nga akwa kadla akwa bwa tə yeru kəga mjirna akwa kadla, yeru aɗi hara ala ɗa ɗimikur wa. Akwa shanga ndzəndziyir ɗa akwa Karmel həla aɗi ɗar tsəkwar sur ɗa wa.

⁸Yu buɗayeri ar nga bu, da ata pəla ala ga. Antə usa ka gə hara ɓɗakkur aka maɗadakwiyirna ni, təng tə yeru ku si ata vir kucali na ola. I akwa kiɗa abbər ka gə hamta aka maɗadakwiyirna natə da an mafar nga, ka I na Dauda na ɓzər ngə ni, kəlara su tə gə wuta abbər ga ata mzhi na ɗa.”

⁹Sakatə mjir Dauda ku mwantə labar ngəni aka Nabal akwa thləma Dauda, antə da thləthlata akwa sək su tə Nabal ata shinau ala ɗa ata kər.

¹⁰Antə Nabal shinau ka pəla, “Dauda ni, tsa wa ri? Wan ɓzər Yesse nə ri? Mafayeri aɗi hang akwa virayeri ni na akwa hwi kazhar mthlakər ɗa.

¹¹I aɗi ata kətə ɗəvərna, ka yimi, ka kum tə I ɗəmha aka mjir pa shishir təmarna, kəi na aka mji na thlata akwa vəi tə I aɗi asəndə wa wa!”

¹²Antə mjir Dauda ku ngka ka jikata alari shanga su tə Nabal pəla.

¹³Antə Dauda pəla aka mjirni, “Ka kəlara mdə kətə katsakarərni ka tsa hata!” Antə shanga ɗa ku hata, tə Dauda tsuwa ku hadzə katsakarərni. Antə tsa fatə mjir apa aru nfwar ka təra ka da, ka zhar mji aru suɗa aghəli adzə kariyir ɗa.

¹⁴Antə pal akwa nca mjir kəthlər aka Nabal ni mwari ka pəla aka Abigyal na mwala' Nabal abbər, “Diya Dauda ku thlentə mji laga tə da thlata akwa mtakəu, ka da sə thlawar mdərkəyir yeru, amma təng tsa nggənggəltə ɗa.

¹⁵Mər diya mji ni ku hara ala yeru ɓɗakkur. Da aɗi ɗar hara ɗimikur ala yeru wa. Tsuwa təng tə yeru akwa mtakəu kəga da, sur yeru aɗi ɗar sha wa.

¹⁶Pci ka viri da akwa wul kəra yeru akwa shanga sakatə yeru akwa ɓəla təmar yeru ata vəi duku kəga da.

¹⁷Antə usa, dzam ɓɗaku ata kəra su ngəni, ka gə səndə su tə ga ata harari. Kamnyar diya su ngəni ata mzhi sənta asar aka mdərkəyir yeru kəga kutakəyirni. Nggədza tsa mdə laga na kwafa tə mda ana mzhi gari alari wa.”

¹⁸Antə Abigyal thlatə ka huva ka tsaptə buradi kər aru suɗa, ka thləvur yimər anap nghyinghyari suɗa, ka təma ntəfu tə mdə tsi ka ɗəmha, ka mthli ptsaptsa balang suɗa, ka gwandzal anap na ul'ulari aru pal, ka yar kamndə na ul'ulari tə mdə ɓwata kər aru suɗa, antə tsa puta ata kwarayeri.

¹⁹Antə tsa pəla aka buɗayeri arni, “Mwa giri, I aghəla giri.” Amma tsa aɗi pəla aka Nabal na salngkiɗa wa.

²⁰Sakatə tsa ata kwararni akwa mwa, ka si adzə kusara gar, təng tsa wutə Dauda kəga mjirni akwa səghəi təbwarni. Antə tsa mwari tə da kəɓa.

²¹Akəmata ni Dauda ku ləkwa dzama abbər, “Azha shang I akwa ɓəlatə sur Nabal akwa mtakə tə wala surni duku aɗi sha wa ni gapani ya? I hara alari ɓɗakkur, amma nggədza tsa akwa ntəmta ali ka ɗimikur.

²²Ka Hyel kəl mpikəi, ma har I ku zhar mjirni wala duku ka mpika akwabə ɗəp ɗəɗəpa.”

²³Sakatə Abigyal wutə Dauda, antə tsa fəlghəi kazhar kwara ni ka huva, ka mwari, ka ndla ka kəmari ata di akəmari.

²⁴Tsa ndla ka vətə kəmari ata hil səlari ka pəla, “Zanuwa, I ku dlu biku ni shang ata kəri. Psi thləma ga ali bu kəi pəla ala gə su.

²⁵Zanuwa, ga aɗiya nggar Nabal wa, kamnyar tsa mdə na kəmanggar. Kamnyar thləmari ni ku kəɓa ka tsa. Thləmari an Nabal, natə karapwari an caku, antə jiri tsa caku. Amma arna I na mafar nga, I aɗi wutə buɗayeri ar nga tə gə thlentə ni wa.

²⁶Antə kulini təng tə MTHLAKU ku ngkata ala gə tsi mda wala ntə dawa, I kahyel ka thləma MTHLAKU na ka mpika, ka apatə ga aɗi, abbər ka shanga dawayeri ar nga na akwa bara hara ɗimikur ala gə sə ndzi apa Nabal!

²⁷Antə kulini I akwa kiɗa akəla ga zanuwa, abbər ka gə dlu cautə ngəni tə I sənta ala gə ni, ka gə na aka maɗadakwi na akwa nu ngə ni.

²⁸I akwa kiɗə nga ka gə tifəmta ali bikərna, I an mafar nga. Kamnyar jiri MTHLAKU ata nci kutakəyir nga ka tsa ndzi ɓəɓal ba saka madi, kamnyar mpayeri tə ga akwa harari ni da ar MTHLAKU. Antə ka Hyel ngkatə ta ga ahara su na ɗimi akwa shanga ndzəndziyir mpika ga.

²⁹Ma mdə laga ku thlata abbər tsa ata bara kəl mpika ga, to ka MTHLAKU na Hyelər nga ɓəlatə mpika ga ɓɗaku ta su atsəkwar nga. Ka Hyel ndzəhəmta mpika dawayeri ar nga apatə mda ana hara ka pela akwa mavinding.

³⁰Antə ma sakatə MTHLAKU ku haratə shanga ɓɗakkur tə tsa kətə alkawalari ala ga, ka namtə nga kuthlir Israila,

³¹ga aɗi ata ndzi ka damitədzi wala ka hyala gə nthlə nga abbər ga ku tsi mdə laga kula suari aɗi wa, wala ntə dawa ka kəra gə sur ngə wa. Tsuwa ma sakatə MTHLAKU ku hara tə ga ku səma, usa ka gə ɗangtə ra bu zanuwa.”

³²Antə Dauda pəla alari, “Hu MTHLAKU na Hyelər Israila, na thlentə nga ka gə si ka mwa kəɓa ashina!

³³Ka Hyel hara ala gə barka kamnyar dzamər ngə ngəni na ɓɗaku ni, ka tsuwa kamnyar ga ku ngkatə ra ta tsi mda, ka ntə dawa ka kəri surna.

³⁴Kamnyar jiri I ku kahyel akwa thləma MTHLAKU na Hyelər Israila na ka mpika, abbər ma ga an aɗi si taktar ka mwa kəɓa wa, akwabə ɗəpə ɗəɗəpa mjir Nabal aɗi na ata mbila ka mpikə wala duku wa!”

³⁵Antə Dauda ha tsiyari ka dlu su tə tsa sənta alari ni, ka pəla, “Ngka avəi. I ku nggatə su tə gə pəla, antə I ata hara su tə gə kiɗə ni.”

³⁶Antə Abigyal ku ngka avəi ka wutə Nabal ku ɗəmhə susəmər kucali na ola apa ar kuthli. Tsa akwa ngga msəra har tə tsa ku wika tələsu. Antə mwala ni aɗi gari alari wa tar səɓəla ɗəpari.

³⁷Səɓəla ɗəpari ɗəɗəpa sakatə wikə ni ku ɗəwula, antə mwalankiɗa Abigyal ni ngkər alari shanga su nayeri ni. Antə hyalari ku nthlə ni har tə tsa ku thləvamtadzi.

³⁸Aghəla vir kuma antə MTHLAKU ku tsa Nabal antə tsa ku mti.

³⁹Sakatə Dauda nggata abbər Nabal ku mti, antə tsa pəla, “Usa aka MTHLAKU na ku ntəmta ali sur səli tə Nabal hara ali ni. Tsuwa MTHLAKU ku ngkatə ra ta hara ɗimikur, ka ngka ka ɗimikurər Nabal ata kərari surni.” Antə Dauda thlentə ndər aka Abigyal abbər tsa ata bara ka tsa kəl ni.

⁴⁰Sakatə buɗayeri arni ni mzhitə Karmel antə da pəla aka Abigyal abbər, “Dauda an thlentə yeru ka yeru sə kətə nga, ka gə ndzi mwalankiɗa.”

⁴¹Antə Abigyal zuzuri ka kəmari ata di ka pəla, “I an mafarni, antə I ɗəmhəɗəmhari wala I an ata ndzi mdər kəcimta səla buɗayeri arni.”

⁴²Antə Abigyal thlatə ka huva ka lətə kwara, ka fatə ngkwarkəmayeri ntəfu tə da təra ata kəma duku shang kəga mji tə Dauda thlentə ni. Antə tsa ku ndzi mwala' Dauda.

⁴³Tsuwa Dauda ku kəl mwala laga ka thləmari Ahinowam ahar Yezireyel, antə japwa ɗa ku ndzi mwankirni.

⁴⁴Tsu akwa saka ngəni antə Shawulu hamta ngkwarni Mikal na mwala' Dauda aka Palti na ɓzər Layish na mdər Gallim, ka tsa ndzi mwalankiɗa.