Read bura-pabir 1 Samiwal 26 Bible Online

1 Samiwal 26 - bura-pabir bible

1 Samiwal 26

¹Antə mji laga ku thlata ahar Zif ka si adzə Shawulu ahar Gibeya, ka pəla alari, “Dauda ku ɗuwardzi akwa Gar Hakila na awul mtakər Yahuda.”

²Antə Shawulu ku thlatə təkəma ka fatə sojayeri dəpu makər na katsala akwa Israila, ka mwari kəga da akwa mtakər Zif kamnyar pakə Dauda.

³Antə Shawulu pwi sojayeri arni kudzəhə ka mnya laku ata Gar Hakila ka kəma ɗa akwa wul Yeshimon. Amma ar Dauda tsa tsu akwa mtakə ni. Sakatə tsa nggata abbər Shawulu akwa bara ni,

⁴antə tsa thlentə mjir wul ashir. Antə da mwari ka nggaɓəla abbər Shawulu anda jiri.

⁵Antə Dauda ku mwari təkəma akwa vəi tə Shawulu pwi sojayeri arni ata, ka wutə vəi tə Shawulu, ka Abner na ɓzər Ner olər sojayeri ar Shawulu ni pi ata. Shawulu pəpəi akwa vəi fəliyir sojayeri ni, tə da kalaktə ni ata ɗəffu akwa heni.

⁶Antə Dauda yu Ahimelek na mdər Hitti, ka Abishai na ɓzərma' Yowab, natə mama' ɗa an Zeruwiya abbər, “Wan akwa nca giri tə yeru ata mwari akwa vəi fəliyir Shawulu ni ka tsa ri?” Antə Abishai pəla, “I ata mwari.”

⁷Antə vir nda aviri Abishai ka Dauda ku ləkwa vəi fəliyir Shawulu, ka wutə ni akwa heni ata ɗəffa vəi fəliyir sojayeri ni, ka mwasərni athləli akwa di abwa kərari. Tsuwa Abner ka sojayeri ku kalaktə ni akwa heni.

⁸Antə Abishai pəla aka Dauda abbər, “Ashina Hyel ku hamta ala gə dawar nga. Kulini ndzi kəi kukwamta kərari ni ata di ka mwasə ni. Tsi pal daci I ata ntsəvəmta ni, aɗi ata tur kəi ntsəvə ni ka suɗə wa!”

⁹Amma Dauda pəla aka Abishai, “Ga aɗiya tsəkwar ni wa! Kamnyar mda aɗi na ata tsəkwar kuthli tə MTHLAKU an vəi har ka tsa msər wa.

¹⁰I kahyel akwa MTHLAKU na ka mpika, abbər MTHLAKU surni an ata sə tsi Shawulu, wala tsuwa ma sakarni kuri tsa ata mta, wala tsuwa ka tsa mta akwa mpa.

¹¹Ka MTHLAKU ngkatə ta I ahara su na ɗimi aka mdə tə MTHLAKU an vəi ni kuthli! Ndzi ka mwa kətə mwasərni, ka mpəlarni, ka mwa təra.”

¹²Apani antə Dauda ku kətə mwasə ni, ka mpəlar yimi na abwa kəra Shawulu ni, antə da təra. Mda aɗi na wutə ɗa wa, wala səndə su na hara wa, tsuwa mda aɗi na thlata ata heni wa, kamnyar shanga ɗa ku heni. Kamnyar MTHLAKU ku pu ɗa shang akwa heni na zurang.

¹³Antə Dauda ku ntamta kuta mular ni ka ləɓəla abwanda, ka lətə kəra gar ciju kazhar vəi tə Shawulu kəga sojayeri arni ata. Antə daɓwa ɗa ku ndzi tau raka.

¹⁴Antə Dauda ku kəga sojayeri ar Shawulu ka Abner ka kuraku abbər, “Abner ga ata mzhi nggatə ra ya?” Antə Abner shinau ka pəla, “Ngəni wan akwa hara kuraku na akwa damitə kuthli nə ri?”

¹⁵Antə Dauda shinau abbər, “Abner, gə jili mdə məmə ri? Aɗi ga an soja na katsala ta shang akwa Israila wa ya? Kamnyar mə tə ga aɗi ɓəlatə kuthli na mdərkəyir ngə ɓɗaku wa ri? Kamnyar mda aɗi na ku ləkwa nca giri kamnyar ka tsa tsi kuthli na mdərkəyir nga!

¹⁶Antə Abner, su tə gə hara ni aɗi kalkal wa. I kahyel akwa thləma MTHLAKU na ka mpika, abbər kalkal ka mdə tsi nga kəga mjir nga təng tə giri aɗi mzhi ɓəlatə mdərkəyir giri ɓɗaku wa, mdərkəyir giri natə MTHLAKU an vəi ni kuthli. Kulini wulhə giri bu, mwasər kuthli ni ama ri? Tsuwa mpəlar yimərni na abwa kərari ni ama ri?”

¹⁷Təng Shawulu nggaɓəla kuraka Dauda ni, antə tsa pəla, “Dauda, ngəni kuraka gə ya ɓzərna?” Antə Dauda pəla, “I, kurakəi ka barkar dəkəl

¹⁸Kamnyar mə tə gə tsu akwa nu ra nə ri zanuwa? Man su tə I ɓzamtə ri? Man ɗimikur tə I hara ri?

¹⁹Psi thləma ga ali bu, ka barkar nga, kara nggatə su tə I ata pəlari. Ma MTHLAKU an vu tə ɗəffa ga ɓza adzə ra ni, to, ka tsa dlu saɗaka ngəni. Amma ma mji an vu nga, to, ka MTHLAKU shuwumta mji ndaga. Kamnyar da ku kədləɓəla ra kazhar tsəɗi na ar MTHLAKU, kəi mwari akwa tsəɗi damwa ka vəngkər səli aka haptu.

²⁰Antə kulini ga aɗiya hir ka mdə tsi ra akwa tsəɗi damwa ciju ka MTHLAKU wa. Kamnyar mə tə ga akwa bara tsi ra ri? Kamnyar I aɗi suma wa, kula daraja apa mafilkwi?”

²¹Antə Shawulu pəla, “I ku hara biku. Ngka, ɓzərna Dauda. I aɗi ata dəkəi ngə wa, kamnyar ga ku namtə mpikəi ka daraja ashina. Jiri, I ku hara cakukur ka sha ol ka duna.”

²²Antə Dauda shinau ka pəla, “To, nggədza mwasər ngə ni zanuwa. Thlentə pal akwa nca mjir nga ka tsa sə dluwari.

²³MTHLAKU ana nar watsəɓa aka mji na pwa ka mji na ka jirkur. Ashina tsa ku hamta nga ali, amma I aɗi hir hara ɗimikur ala gə wa, kamnyar MTHLAKU an vəi ngə kuthli ni.

²⁴Tsu apatə I ku wutə darajar mpika ga ashina, antə ka MTHLAKU wutə darajar mpikəi, ka tsa msərantə ra ta shanga bwaniyayeri!”

²⁵Antə Shawulu pəla aka Dauda, “Ka Hyel vədza ala gə barka ɓzərna! Ga ata sə hara suayeri na ol'ola hang, tsuwa ga ata səma akwa shanga ɗa.” Antə Dauda ku təra, tə Shawulu tsuwa ku ngka avəi.