Read bura-pabir 1 Samiwal 27 Bible Online

1 Samiwal 27 - bura-pabir bible

1 Samiwal 27

¹Antə Dauda ku dzama akwa ɗəffari abbər, “Jiri, vir laga Shawulu ata sə tsi ra, kamnyar ngəni su na təramta ali an tar kəi hwi ra ɗuwardzi ahar Filistiya. Apani Shawulu ata zhar pakə ra akwa Israila, antə I ata msəra.”

²Antə Dauda ka mjirni aru ngkwa ku thlatə ka hwi mwari adzə Akish na ɓzər Mawok na kuthlir Gath.

³Antə Dauda, ka mjirni, kəga mjir kutakəyir ɗa ku ndzəndzi ka Akish anda akwa Gath. Dauda ka mwankirni suɗa Ahinowam na ngkwar di Yezireyel ka Abigyal na akwa saka na təramta tsa mwala' Nabal na mdər Karmel.

⁴Sakatə Shawulu nggata abbər Dauda ku hwi ləhar Gath antə tsa zhar pakə ni.

⁵Antə Dauda pəla aka Akish, “Ma I awutə mdəkur ata nca ga, dlar ra bu ka gə na ali di laga raka kəi ra ndzəndzi akwa. Kamnyar aɗi kalkal ka mafar nga ndzi ka ga akwa di kuthlikur wa.”

⁶Tsu vir nda antə Akish na alari di laga Zigklag. Ngəni an su na hara tə Zigklag ku ndzi di kuthlyayeri ar Yahuda har ba ashina.

⁷Dauda ku ndzi akwa tsəɗi Filistiya məva pal ka thliya nfwar.

⁸Sakatə Dauda ahar Zigklag, tsa ka mjirni ana ra dlər mjir Geshur, ka mjir Girzi, ka mjir Amalek na akwa tsəɗi nda təng waci. Tsa ana dlər ɗa har ka mwantə ɗa ahar Shur ka tsəɗi Masar.

⁹Kəlara sakatə Dauda ku dlər ɗa tsa ana kurəmta ɗa shili ka mwanki, ka fatə thla, kəga təma, kəga kwara, kəga dləkəmau, kəga ləptər ɗa. Aghəla nda ka tsa jaktə ngka adzə Akish.

¹⁰Kəlara sakatə Akish ku yu Dauda abbər, “Ashina gə ra dlər mjir mə ri?” Antə Dauda ata pəla, “I ra dlər mji na akwa anəm ar Yahuda”, wala tsuwa, “I ra dlər tsəɗi nyarmbwar Yerameyel”, wala tsuwa, “I ra dlər mjir Keni na akwa anəm.”

¹¹Dauda aɗi ana zhar mji shili wala mwanki ka mpikə wa, ta da asə mwantə labar ahar Gath ka pəla, “Nggədza suayeri tə Dauda akwa harari.” Antə an su tə Dauda ləkəma ka harari sakatə tsa akwa tsəɗi Filistiya.

¹²Amma Akish ku mbərsa ka Dauda har tə tsa dzama abbər, “Mjirni Israila ku nggəlar ni antə tsa ata ndzi mafarna har ka tsa mta.”