Read bura-pabir 1 Samiwal 28 Bible Online

1 Samiwal 28 - bura-pabir bible

1 Samiwal 28

¹Tsu akwa saka ndaga antə mjir Filistiya tsaptə sojayeri arɗa ka da ra dlər mjir Israila. Antə Akish pəla aka Dauda, “Ka gə sənda abbər giri kəga mjir nga ata paktə kər ka yeru kəga mjirna, ka mburu ləkwa mpa ni ata kəma duku.”

²Antə Dauda shinau aka Akish ka pəla, “Ai ga ata wutə jili kəthlər tə I ata harari.” Antə Akish pəla aka Dauda, “Ɓɗaku, I ata namtə nga ka gə ndzi mdər sək kəri ba saka madi.”

³Samiwal ku sə mti, antə shanga mjir Israila ku tuwa ni. Antə da harəmta ni akwa diyirni, Rama. Tsuwa Shawulu ku kurtə kədləmta ɗeaghayeri kəga mjir ndzəlsu na akwa tsəɗi ni.

⁴Antə mjir Filistiya tsaptədzi ka fəli akwa Shunem. Antə Shawulu tsuwa ku tsaptə mjir Israila tə da fəli akwa Gilbowa.

⁵Sakatə Shawulu wutə sojayeri ar Filistiya antə tsa thlivər ka yakata ka duna.

⁶Antə Shawulu yu MTHLAKU su tə ka tsa hara. Amma MTHLAKU aɗi shinau alari wala akwa suni, wala atar Urim, wala atar naɓi laga wa.

⁷Antə Shawulu pəla aka kwakunayeri arni, “Bara gir ali mwala na ana hakdzi kəi ra yuɓəla su akəlari.” Antə kwakunayeri ni shinau alari abbər, “Ai mwala hakdzi laga aɗi akwa di laga tə mda ana pəla Endor.”

⁸Antə Shawulu ɗuwamta kəmari ta mda anggaɓəla ni atar hatə ləptu laga zum. Antə tsa ka mjirni laga suɗa ku thlata aviri ka təra mwari adzə mwala ni. Sakatə da ku mzhitə mwala ni, antə tsa pəla aka mwala ni, “Tsa di, kara səɓəla ali ka mdə tə I ata pəla ala gə thləmari.”

⁹Antə mwala ni pəla alari, “I mbərsa abbər ga asəndə su tə Kuthli Shawulu hara, apatə tsa kədləmta shanga mjir hakdzi na akwa Israila ni. Kamnyar mə tə ga ata bara ɓəli ra ka mdə tsi ra ri?”

¹⁰Antə Shawulu kahyel abbər, “Apatə MTHLAKU ka mpika, su aɗi na ata hara ala gə wa.”

¹¹Antə mwala ni pəla, “Kəi kəga ala gə wa ri?” Antə Shawulu pəla, “Səɓəla ali ka Samiwal.”

¹²Sakatə mwala ni wutə Samiwal antə tsa pthli kuraku ka duna ka pəla aka Shawulu, “Kamnyar mə tə gə pwaktə ra ri? Azha kwang ga an Shawulu ni!”

¹³Antə Kuthli ni pəla alari, “Ga aɗiya thlivər wa. Man su tə gə wutə ri?” Antə mwala ni pəla, “I wutə mambəl laga akwa səɓəla akwa di.”

¹⁴Antə tsa yu mwala ni abbər, “Tsa dludzi ka mə ri?” Antə mwala ni pəla, “Mdə halhala laga an akwa səɓəla ka ləptu na ola.” Təng təkəma Shawulu nggaɓəla abbər Samiwal, antə tsa zuzuri ka kəmari ata di ka nar səli.

¹⁵Antə Samiwal pəla aka Shawulu, “Kamnyar mə tə ga akwa damitə ra ka səɓəla ka i'i ri?” Antə Shawulu pəla, “Su an damitə ra! Mjir Filistiya ku si dlər ra, tsuwa Hyel ku təra kazhar ra. Kulini tsa aɗi ana hamta ali amsa, wala atar naɓi, wala akwa suni kəra wa. An su na hara tə I kəga nga ka gə pəla ali su tə kəi hara.”

¹⁶Antə Samiwal pəla, “Kamnyar mə tə ga ata kəga ra təng tə MTHLAKU ku shinadzə bwahili ala ga, ka ndzi dawar ngə ri?

¹⁷MTHLAKU ku hara ala gə su tə tsa pəla tsa ata hara ala gə ni. Kamnyar MTHLAKU ku dlutsə kuthlikur akəla ga ka nar aka Dauda.

¹⁸Ga aɗi nu su tə MTHLAKU pəla wa. Kamnyar ɗəffari ku ɓzi ka duna ata kəra mjir Amalek, amma ga aɗi kurəmta ɗa apatə tsa tsawa ala gə wa. An su na hara tə MTHLAKU akwa hara ala gə su ngəni kulini ni.

¹⁹Ata kəra ngəni ma MTHLAKU ata hamta nga kəga mjir Israila shang aka mjir Filistiya. Antə ɗəpa ga kəga maɗashilər nga ata sə wutə ra ka mburu ndzi ata kəma duku azi. MTHLAKU ata hamta shanga sojayeri ar Israila aka mjir Filistiya.”

²⁰Təng təkəma Shawulu ndla dlət ata di kamnyar thlivər na ngkəi ni ata kəra su tə Samiwal pəla alari ni. Tsuwa shang tsa aɗi ka duna vir nda wa kamnyar tsa aɗi səm su wa.

²¹Antə mwala ni mwari adzə ni ka wuta abbər tsa ku yakata, antə tsa pəla alari, “Zanuwa, I ku psəmta mpikəi ka hara su tə ga ku pəla.

²²Antə kulini psi thləma ga aka su tə I na mafar nga ata pəla ala ga. Ndzi kəi na gə susəma raka, ka gə səma kamnyar ka gə wutə dunar ngka avəi.”

²³Amma Shawulu nggəlari ka pəla, “I aɗi ata səm susəm wa.” Amma kwakunayeri arni ka mwala ni ku kiɗə kərari abbər ka tsa səm su. Antə tsa ku nggatə gariyir ɗa, ka thlata ata di, ka ndzəndzi ata vəi pəpəi.

²⁴Tsuwa mwala ni ka ɓzər thla laga tə tsa təksanta akwa kutakəi ni, antə tsa mwari taktar ka kətə thla ni ka tsi ka hənəmta. Antə tsa kətsə mpwa, ka hərta, ka ɓwatə buradi na kula yist kəgari.

²⁵Antə tsa mwantə buradi ni aka Shawulu kəga kwakunayeri arni, antə da səma. Kambəla da thlatə ka təra tsu aviri nda.