Read bura-pabir 1 Samiwal 30 Bible Online

1 Samiwal 30 - bura-pabir bible

1 Samiwal 30

¹Sakatə Dauda ka mjirni ku mzhitə kəyir ɗa na ahar Zigklag akwa vir na makərkur, antə da wuta abbər mjir Amalek ku mwari ka dlər anəmər Yahuda, ka tsuwa mjir Zigklag, har ka mbamta Zigklag ni.

²Tsuwa da ku ngkəgəi mwanki, ka shanga mji na anda, ol ka ntsaha. Da aɗi tsi ɗa wa amma da ku fatə ɗa ka təra ka da.

³Sakatə Dauda ka mjirni ku si, antə da wuta abbər mdə ku mbamta di ni, ka fatə mwankir ɗa kəga maɗa' ɗa shili ka mwanki akwa mpa ni.

⁴Antə Dauda kəga mjirni ku pthləngkər tuwa. Da tuwa ka tuwa har tə da ghəra.

⁵Tsuwa mdə ku fatə mwankir Dauda na suɗə ni, watau Ahinowam na thlata ahar Yezireyel ka Abigyal natə sakanda tsa an mwala' Nabal na mdər Karmel ni, ka təra ka da.

⁶Antə Dauda ku damitədzi ka duna, kamnyar mjirni ku baɗitə gari ata kərari abbər da ata ndzəndzəh ni ka pela. Kamnyar ɗəffa waskəi ku ɓzi ka duna ata kəra su na wutə maɗa' ɗa shili ka mwanki ni. Amma Dauda ku dunautə kərni kamnyar tsa ku mbərsa ka MTHLAKU na Hyelərni.

⁷Antə Dauda pəla aka Abiyathlar na prist na ɓzər Ahimelek abbər, “Səntə ali Efod ar nggaɓəla su akəla Hyel ni.” Antə Abiyathlar ku sənta alari.

⁸Antə Dauda yu MTHLAKU abbər, “Kəi nu mji na sə dlər nə ya? Tsuwa ma I nu ɗa, I ata kəli ɗa ya?” Antə MTHLAKU shinau alari abbər, “Nu ɗa, ga ata kəli ɗa, ka gə mbuli ɗa.”

⁹Antə Dauda ka mjirni aru ngkwa ku tamtə laku. Sakatə da mzhitə Zərkər Besor, antə mji bwa duku ku ɓəlta anda.

¹⁰Amma ar Dauda tsa ku ləkəma ka mji aru nfwar, kamnyar mji na aru suɗə ni ku ghəri ka duna, tə da amzhi ntamta zərkə ni wa.

¹¹Antə mji laga akwa nca mjir Dauda wutə mdər Masar laga akwa mtakəu, ka səntə ni aka Dauda. Antə da nar susəma ka yimi, antə tsa ku səməmnya ka sangkər yimi.

¹²Tsuwa da ku nar kər kek tə mdə hara ka mpur kamnda ul'ula, ka kər kek suɗa tə mdə hara ka gwandzal anap ul'ula. Antə tsa səma ka jaktə wutə duna, kamnyar tsa ku hara vir makər ka pci makər kula səm susəm wala sa yimi.

¹³Antə Dauda yu ni abbər, “Wan mdəkəyir ngə ri? Tsuwa gə thlata ama ri?” Antə tsa shinau ka pəla, “I mdər Masar, I mafar mdər Amalek laga. Kulini ka vir makər tə mdərkəyirna təra kazhar ra, kamnyar I aɗi lapiya wa.

¹⁴Yeru ku dlər tsəɗiyir mjir Kerethli na abwar anəm akwa Yahuda, ka tsəɗi nyarmbwar Kaleb, ka mbamta Zigklag.”

¹⁵Antə Dauda yu ni abbər, “Ga ata mzhi mwantə ra adzə mjir Amalek nə ya?” Antə tsa shinau ka pəla, “Ma ga ata kəta ali alkawal akwa thləma Hyel abbər ga aɗi ata tsi ra wa, wala hamta ra aka mdərkəyirna wa, I ata mwantə nga.”

¹⁶Antə tsa ku pwar Dauda ka mwantə ni adzə ɗa. Tsuwa da wutə mji ni ku titiləmtadzi akwa kəlara bwa akwa səm ka sa, ka ɓathla, kamnyar kucalər hangkur suayeri tə da fata akwa mpa akwa tsəɗi Filistiya ka Yahuda.

¹⁷Antə Dauda ka mjirni ku pwa ata kəra ɗa ka mpa vir nda tahaku har ka vədza aka səɓəla ɗəpari tahaku, ka tsəgəi ɗa. Mda aɗi wala duku na msər wa, tar maɗadakwi aru nfwar na fəltə dləkəmau ka hwi.

¹⁸Antə Dauda ku mbultsə mwankirni suɗa, ka dlutsə shanga su tə mjir Amalek fatə ni.

¹⁹Su aɗi na sha wala duku wa. Dauda ku ngka ka shanga mji, ol ka ntsaha, shili ka mwanki shang akwa diyir ɗa. Tsuwa tsa ku ngka ka shanga su tə mjir Amalek fata akwa mpa ni.

²⁰Dauda ku fatə shanga ciɓər thla, kəga ar təma, kəga kwiyir mjir Amalek akwa mpa ni. Antə mjirni ku pukəma mwaɓiyayeri ngəni akəma mwaɓiyayeri arɗa, akwa pəla, “Ngənayeri ni ar Dauda!”

²¹Antə Dauda ku ngka adzə mji na aru suɗa na aɗi mzhi nu ni wa kamnyar da ku ghər ni. Da antə mdə təra kazhar ɗa akwa Zərkər Besor ni. Da ku thlatə ka sə thlakəma Dauda kəga mjirni. Sakatə Dauda ku hara kudzəhə ka da, antə tsa thlawar ɗa.

²²Amma maɗashambar laga na kəmanggar akwa nca mjir Dauda na təra kəga tsa ni pəla, “Təng tə da aɗi mwari kəga mburu wa, mda aɗiya ata na ala ɗa su tə mburu fata akwa mpa ni wa. Da ata mzhi fatə mwankir ɗa kəga maɗa' ɗa tə mburu mbultsa ni, ka da təra.”

²³Amma Dauda pəla ala ɗa, “Maɗaməma, aɗi kalkal ka giri hara su apani ka su tə MTHLAKU hamta ala mburu wa! Tsa ku ɓəlatə mburu, ka hamta sojayeri ndaga ala mburu.

²⁴Mda aɗi na ata kələngkər aka su tə giri pəla ni wa! Kamnyar mdə na ndzəndzi azi akwa sək kəra kariyir mburu ka mdə na mwari akwa mpa ni, waskəi ata dlu watsəɓərni kalkal.”

²⁵Antə Dauda ku namtə gari ngəni tə tsa ndzi tsawa aka mjir Israila baɗitə ka vir nda har ba ashina.

²⁶Sakatə Dauda ku ngka akwa Zigklag, antə tsa thlentə bwadukwa su tə da fata akwa mpa kəga mjir Amalek ni aka pazhayeri arni, na an mji ol'ola ar Yahuda. Tsa pəla, “Nggədza cautər giri akwa su tə yeru fata akwa dlər dawayeri ar MTHLAKU ni.”

²⁷Tsa thlenta aka mji ol'ola na ahar Bethlel, ka aka na ahar Ramoth na akwa anəm ar Yahuda, ka na ahar Yattir,

²⁸ka na ahar Arower, ka Sifmoth, ka Eshtemowa,

²⁹ka Rakal, ka akwa diyayeri ar mjir nyarmbwar Yerameyel, ka mjir Keni,

³⁰ka aka mji na ahar Horma, ka Bor Ashan, ka Athlak,

³¹ka Hebron, ka tsuwa shanga diyayeri tə tsa na Dauda kəga mjirni ku dlarha.