Read bura-pabir 1 Samiwal 31 Bible Online

1 Samiwal 31 - bura-pabir bible

1 Samiwal 31

¹Vir laga təng mjir Filistiya mwari ka dlər mjir Israila har tə mjir Israila ku hwi. Antə mjir Filistiya ni ku tsəgəi mjir Israila hang ata Gar Gilbowa.

²Amma mjir Filistiya ni ku kalaktə Shawulu kəga maɗashilərni, ka tsəgəi maɗashilərni makər, watau Jonathlan, ka Abinadab, ka Malkishuwa.

³Mpa ni ku ntsəhədzi ka hara mwavər ata kəra Shawulu, antə sakatə mjir lali ar Filistiya ni si ata kərari, da ku dəkəi ni ka duna.

⁴Antə Shawulu pəla aka soja na ana kəsi alari kari mparni ni abbər, “Ntsuɓəla katsakarər ngə ni ka ra ntsəvəmta ra, ta mji na kula kaciya ni asə si ka mnya ɗimi ali, ka hara bwani ali ka ntsəvəmta ra.” Amma mdər kəsi alari kari mparni ni aɗi hir wa, kamnyar tsa ku thlivər ka duna. Antə Shawulu ntsuɓəla katsakarərni ni surni, ka nci ata di, ka ndla ata kər.

⁵Sakatə soja na ana kəsi alari kari mparni ni ku wuta abbər Shawulu ku mti, antə tsa ndla ata kəra katsakarərni ni tsuwa ka mta tsu adzə ni.

⁶Apani antə Shawulu ku mti, tsa ka maɗashilərni makər, ka ɓzərdakwi na ana kəsi alari kari mparni ni, ka shanga sojayeri arni ku mti vir nda.

⁷Sakatə mjir Israila na aɓəla bwanda Mular Yezireyel ka na aɓəla bwanda Thlyagha Jodan ni nggata abbər Shawulu kəga maɗashilərni ku mti, ka abbər sojayeri ar Israila ku hwi, antə da hwi tsuwa kazhar diyayeri arɗa. Antə mjir Filistiya ku si ka ndzəndzi akwa.

⁸Səɓəla ɗəpari sakatə mjir Filistiya ku si ka da fəi kariyir mshiyayeri ni, təng da wutə mshiyir Shawulu ka maɗashilərni makər ata Gar Gilbowa.

⁹Antə da fəi kariyirni, ka nthləi kərari, ka fatə kariyir mparni, ka thlentə mji akwa shanga tsəɗiyir Filistiya, ka da psəmnya labar na msəra ni akwa mbwar haptayeri arɗa ka aka mjir ɗa.

¹⁰Da mwari ka pwi kariyir mpa ar Shawulu ni akwa mbwar haptər ɗa Ashtaroth, ka kukwadzə mshiyirni aka banggwar bərni Beth Shan.

¹¹Sakatə mjir Yabesh Gileyad nggatə su tə mjir Filistiya hara aka Shawulu ni,

¹²antə shanga sojayeri na katsala thlatə ka ləɓəla aviri ka mwari ahar Beth Shan. Sakatə da mzhitə Beth Shan ni antə da fəi mshiyir Shawulu ka mshiyir maɗashilərni na ata banggwar Beth Shan ni. Antə da səntə mshiyir ɗa ni ahar Yabesh ka mbamta ɗa.

¹³Antə da fatə ɗethlər ɗa ka harəmta akira nfur mbula na ahar Yabesh ni, antə da hara asham ar vir murfa.