Read bura-pabir 1 Samiwal 5 Bible Online

1 Samiwal 5 - bura-pabir bible

1 Samiwal 5

¹Aghəla tə mjir Filistiya ku dlutsə Akwati Alkawal ni ahar Ebenezer, antə da mwanta akwa bərni Ashdod.

²Da mwantə Akwati ni akwa mbwar Dagon na haptər ɗa, ka vəi ni adzə haptu Dagon ni.

³Səɓəla ɗəpari təng mjir Ashdod ni wutə Dagon na haptər ɗa ni ku ndla ka bwa kəmari ata di akəma Akwati Alkawal ar MTHLAKU. Antə da haptə ni ka jaktə thləli ni akwa vəi ndzəndziyirni.

⁴Amma səɓəla ɗəpari sakatə da thlatə ɗəɗəpə mbing təng da jaktə wutə Dagon na haptər ɗa ni ku jaktə ndla akəma Akwati Alkawal ar MTHLAKU ni. Akwa saka ngəni kəra haptu ni kəga tsiyayerari shang ku ɓəgələmtadzi ka pumtadzi akwa nyarmbwa, təng dzari an mbila.

⁵An su na hara tə ba ashina pristayeri ar Dagon ka shanga mji na ana ləkwa mbwar Dagon, aɗi ana ntsari səla nyarmbwar Dagon na akwa Ashdod wa ni.

⁶Antə MTHLAKU ku ɗi mjir Ashdod ka mji na kalaktə ɗa. Tsa sənta ala ɗa bwani na mwavər ka duna atar hara tə kuɗu puɓəladzi ata dza ɗa.

⁷Sakatə mjir Ashdod ni wutə suayeri ngəni akwa hara ala ɗa antə da pəla, “Mda aɗiya zhar ka Akwatiyir hyelər Israila ni ndzi adzə mburu kəra wa, kamnyar tsa an akwa hara bwani ala mburu, ka aka Dagon na hyelər mburu ni.”

⁸Antə mjir Ashdod ni ku kəga shanga kuthlyayeri ar Filistiya, ka yu ɗa abbər, “Man su tə ka mburu hara ka Akwati Alkawal ar hyelər Israila nə ri?” Antə kuthlyayeri ni pəla, “Kətə giri Akwati ni ka giri mwanta ahar Gath.” Antə da ku kətə ni ka mwanta ahar Gath, pal akwa nca bərniyayeri ar mjir Filistiya.

⁹Amma aghəla tə da mwantə Akwati ni anda, təng MTHLAKU ɗi bərni ni. Tsa thlentə bwani ata kəra mjir di nda, tə kuɗu ku puɓəladzi ata dza shanga mji ol ka ntsaha na akwa di nda. Antə thlivər ku ngkəi ɗa ka duna.

¹⁰Apani antə da thlentə Akwati ni ahar Ekron, bərni laga tsuwa akwa Filistiya. Amma sakatə Akwati mzhitə Ekron, təng mjir di nda pthli tuwa akwa pəla, “Da ku səntə Akwatiyir hyelər Israila kamnyar ka tsa kurəmta mburu kəga mjir kutakəyir mburu!”

¹¹Apani antə da ku jaktə kəgatə shanga kuthlyayeri ar Filistiya ka pəla ala ɗa, “Ngka giri ka Akwatiyir Hyelər Israila ni akwa vəi tə mdə kətə ni akwa, ta tsa asə kurəmta mburu kəga mjir kutakəyir mburu.” Kamnyar tə thlivər na ola ku ndəndatə hangkala mjir di ni, kamnyar Hyel ku pungkər bwani na mwavər ata kəra mjir di ni.

¹²Antə mji na aɗi mtə wa, kuɗu ku ngkəi ɗa. Antə kəlara bwa akwa bərni Ekron ni mji akwa tuwa ka duna, har tə tuwar ɗa ku ləmta akwa vəi na amtazi.