Read bura-pabir 1 Samiwal 6 Bible Online

1 Samiwal 6 - bura-pabir bible

1 Samiwal 6

¹Aghəla tə Akwatiyir MTHLAKU ku hara thliya murfa akəla mjir Filistiya,

²antə mjir Filistiya ni kəga pristayeri ar haptər ɗa ka ɗeaghayeri, ka yu ɗa abbər, “Man tə ka mburu hara ka Akwatiyir MTHLAKU nə ri? Pəla giri ala mburu laku tə ka mburu ngka ka tsa akwa vəi tə tsa thlata akwa.”

³Antə da pəla, “Ma giri ata thlentə Akwatiyir hyelər Israila ni, giri aɗiya thlentə kula su wa. Ka giri pwarɓəla ni ka cautə laga ar kəcimta bikər giri. Antə apani giri ata jaktə hara lapiya, tsuwa giri ata nggaɓəla su na hara tə tsa ləkəma ka ɗi giri ni.”

⁴Antə mji ni yuwa abbər, “Jili cautə madi tə ka yeru pwarɓəla ni kəgari ri?” Antə ɗeaghayeri ni pəla, “Ka giri namtə dludzər kuɗayeri ntəfu ka dinar, ka dludzər kilangayeri ntəfu ka dinar, kəlara pal ata vəya kuthlyayeri ar giri. Kamnyar jili shilku duku an ngkəi giri kəga kuthlyayeri ar giri na ntəfu ni.

⁵Tar ka giri namtə dludzər kuɗu ka dludzər kilangayeri na ɓzamtə tsəɗiyir giri ni, ka nar səli aka hyel ar Israila. Nuhum atar ngəni tsa ata kələmta ala giri bwani na ata kəra giri, ka haptayeri ar giri, ka tsəɗiyir giri ni.

⁶Kamnyar mə tə giri ata namtə ɗəffa giri ɓəɓal apatə mjir Masar ka kuthlir ɗa ku hara ri? Kamnyar tar tə Hyel hara bwani na mwavər aka mjir Masar kambəla da zhar tə mjir Israila ləɓəla kazhar tsəɗi ni.

⁷Kulini ka giri namtə amalangke bilən na ar thla, ka giri baratə thlayeri suɗa na tsu akwa nar uwa aka maɗa' ɗa, tsuwa natə mda aɗi ɗar mbwau udzəm kukula akwa wulya ɗa wa. Antə ka giri mbwata ala ɗa amalangke ni, amma ka giri kədləghəli kənayeri arɗa akwa ciɓa.

⁸Ka giri kəta akwati damwa ka giri pu dludzər suayeri tə giri nam ka dinar ni akwa, natə da an ata ndzi cautayeri ar kəcimta bikər giri ni, ka giri vədza adzə Akwati Alkawal ar MTHLAKU ni. Aghəla nda ka giri kədlu thla ɗa akwa laku ka da təra.

⁹Ka giri wul bwa tə da ata nuwari. Ma da ku nu lakur Beth Shemesh, to ata ncanta abbər Hyelər Israila an thlenta asarayeri ni ata kəra mburu. Amma ma aɗi hara apani wa, antə mburu ata səndari abbər aɗi tsa an thlenta asar ni wa, təng asar an si ndzang.”

¹⁰Antə da ku hara apatə mdə pəla ala ɗa. Da fatə thla suɗa ka mbwata ala ɗa amalangke ni, ka hartə kənayeri arɗa akwa ciɓa.

¹¹Antə da kətə Akwatiyir MTHLAKU ni japu ka akwati tə mdə pu dludzər kilangayeri tə mdə nam ka dinar ni kəga suayeri na dludzər kuɗayeri ni, ka pu ɗa akwa amalangke ni.

¹²Antə thlayeri ni ku tamtə lakur Beth Shemesh akwa mwa dwaɗu ka di ni kula pəra. Thlayeri ni akwa mwa ka tuwa. Kuthlyayeri ar Filistiya na ntəfu ni ku nu ɗa har tə da mzhitə kəla ɗa ka Beth Shemesh.

¹³Ata saka nda mjir Beth Shemesh akwa thla alkama akwa mular. Sakatə da haptə nca ɗa ka wutə Akwati ni, antə da hara kucali ka duna.

¹⁴Sakatə amalangke ni ku mzhitə fakər mdər Beth Shemesh laga na ka thləmari Joshuwa, antə tsa thləthlata anda adzə pela laga ola. Antə mjir Lawi na ata vəi ni ku kəli Akwatiyir MTHLAKU ni, ka akwati na ka suayeri tə mdə nam ka dinar ni, ka pwi ɗa ata pela na ol ni. Antə mjir Beth Shemesh ni ku ntəntamta amalangke ni ka mbatə u'u kəgari, ka tsi thlayeri ni ka hamta ɗa saɗaka mbamba ka saɗakayeri damwa kəgari aka MTHLAKU vir nda.

¹⁶Sakatə kuthlyayeri ar Filistiya na ntəfu ni ku kuri wul ɗa akwa hara su ngəni, antə da ngka ahar Ekron tsu vir nda.

¹⁷Antə mjir Filistiya thlentə dludzər kuɗayeri na ntəfu tə mdə nam ka dinar ni apa cauta aka MTHLAKU apa saɗakar kəcə bikər ɗa. Kəlara pal ata vəya bərni pal na akwa Filistiya, natə da an Ashdod, ka Gaza, ka Ashkelon, ka Gath, ka Ekron.

¹⁸Tsuwa da ku thlentə dludzər kilangayeri na ntəfu tə mdə nam ka dinar ni kalkal ka hangkur bərniyayeri na akwa Filistiya, na akwa tsiya kuthlyayeri na ntəfu ni. Pela na ola tə mdə kəli Akwatiyir MTHLAKU ata na akwa fakər Joshuwa ahar Beth Shemesh ni tsu aɗi ba kulini apa sur seɗa.

¹⁹Ata saka nda mjir Beth Shemesh aɗi laga na ku pu nca ɗa akwa Akwatiyir MTHLAKU ni, antə MTHLAKU ku tsi mji murfəkumari akwa nca ɗa. Antə ɗəffa mji ku ɓzi ka duna kamnyar tə MTHLAKU ku kurəmta mji hang akwa nca ɗa.

²⁰Antə mjir Beth Shemesh pəla, “Wan ata mzhi thləthlata akəma MTHLAKU na Hyel ngəni ɓɗakkarkar nə ri? Ama antə ka mburu thlentə Akwati ni ka mburu ndəkə ka tsa ri?”

²¹Antə da thlentə ndər aka mjir Kiriyath Yeyarim abbər, “Mjir Filistiya ku ngka ka Akwatiyir MTHLAKU ni. Sər giri usa, ka giri kəta.”