Read bura-pabir 1 Samiwal 7 Bible Online

1 Samiwal 7 - bura-pabir bible

1 Samiwal 7

¹Antə mjir Kiriyath Yeyarim ku mwari ka kəta akwatiyir MTHLAKU ni ka mwanta avəyar mdə laga na ka thləmari Abinadab, na ka kəyirni ata gar. Antə da carɓəla ɓzərni Eleyazar ka tsan wul kəra Akwati ni.

²Antə Akwati ni ku ndzi ahar Kiriyath Yeyarim ka fəi anda, har apa məva sərkumari. Antə mjir Israila ku tuwa dlara akəla MTHLAKU.

³Antə Samiwal pəla aka shanga mjir Israila abbər, “Ma giri ata ngka adzə MTHLAKU ka ɗəffa giri duku jiri, to tar ka giri pumta haptər durayeri ka haptu ngəni Ashtaroth ni. Ka giri hamta kəra giri swakti aka MTHLAKU, ka vəngkər səli alari shini, antə tsa ata mbuli giri akwa tsiya mjir Filistiya.”

⁴Antə mjir Israila ku pumta haptayeri arɗa tə mda ana kəga thləma ɗa Baal ka Ashtaroth ni, ka vəngkər səli aka MTHLAKU duku shini.

⁵Antə Samiwal pəla, “Ka mdə tsaptə shanga mjir Israila ahar Mizpa, antə I ata hara adduwa aka MTHLAKU kamnyar giri.”

⁶Antə shanga ɗa ku tsaptədzi ahar Mizpa. Da ndəkərtsə yimi ka pumta ata di apa sur hamta akəma MTHLAKU. Tsuwa vir nda da ku kəl asham ka tubi akwa pəla, “Yeru ku hara biku aka MTHLAKU.” Anda ahar Mizpa antə Samiwal baɗitə hara kəthlər ar alkalikur akwa Israila.

⁷Sakatə mjir Filistiya ku nggata abbər mjir Israila ku tsaptədzi ahar Mizpa, antə kuthlyayeri ar Filistiya ni thlata abbər ka da ra pwa ata kəra mjir Israila ka mpa. Sakatə mjir Israila ku nggata abbər mjir Filistiya akwa si ni, antə da ku thlivər ka duna.

⁸Antə mjir Israila ni pəla aka Samiwal, “Ga aɗiya zhar hara adduwa aka MTHLAKU na Hyelər mburu wa. Kiɗə ni kamnyar nuhum tsa amsərantə mburu akwa tsiya mjir Filistiya ni.”

⁹Antə Samiwal kətə ɓzər təma laga ka hamta ni saɗaka mbamba swakti aka MTHLAKU. Antə tsa ku hara adduwa abbər ka MTHLAKU dlar mjir Israila, antə MTHLAKU ku dlu adduwarni.

¹⁰Sakatə Samiwal akwa hamta saɗaka ni, antə mjir Filistiya shahədzi abbər ka da pwa ata kəra ɗa ka mpa. Amma vir nda MTHLAKU ku dlər ka mpa su ka duna ata kəra ɗa. Antə mjir Filistiya ku thlivər ka ndəndatədzi ka hwi akəma mjir Israila.

¹¹Antə sojayeri ar Israila ku səɓəla akwa Mizpa ka nu mjir Filistiya akwa tsəgəi ɗa ata laku, har ka mzhitə Bethkar.

¹²Antə Samiwal kətə pela laga ola ka nci akwa daɓwa Mizpa ka Shen, ka vəta alari thləm Ebenezer, natə karapwari an, “Pela ar Dlara.” Kamnyar Samiwal pəla, “MTHLAKU ku dlar mburu har ka vədza aka saka ngəni.”

¹³Apani antə da ku səm mjir Filistiya. Antə mjir Filistiya aɗi jaktə ləkwa tsəɗi Israila kəra wa, kamnyar MTHLAKU akwa ɗi mjir Filistiya akwa shanga virayeri ar Samiwal.

¹⁴Antə mdə ku ngka aka mjir Israila ka shanga diyayeri natə mjir Filistiya dlutsa, watau diyayeri na thlata ahar Ekron ka mwanta ahar Gath. Apani antə mjir Israila ku jaktə dlu tsəɗiyayeri arɗa akəla mjir Filistiya. Tsuwa apani antə mdə ku wutə ndzəndzi lapiyakur akwa daɓwa mjir Israila ka mjir Amor.

¹⁵Antə Samiwal ku hara kuthlikur ata kəra Israila har tə tsa mta.

¹⁶Kəlara məva tsa ana dlarhə tsəɗi ni, akwa mwari ahar Bethlel, ka Gilgal ka Mizpa kamnyar hara shariya aka mji.

¹⁷Aghəla nda antə tsa ata ngka avəi akwa kəyirni ahar Rama, vəi tə tsa ana hara kəthlər alkalikur aka mjir Israila ata. Tsuwa anda ahar Rama ni tsa ku həntə bagaɗi aka MTHLAKU.