Read bura-pabir 1 Samiwal 8 Bible Online

1 Samiwal 8 - bura-pabir bible

1 Samiwal 8

¹Sakatə Samiwal ku hali, antə tsa pwi maɗashilərni ka da ndzi alkaliyayeri akwa Israila.

²Thləma ɓzərni na yarakəma an Yowel, thləma na suɗkur ni an Abija. Antə da ku ndzi alkaliyayeri ahar Beyersheba.

³Amma maɗashilərni ni aɗi nu surhararni wa. Hangkala ɗa ku shinardzi akwa bara gəna, antə da ana dlu sur dzəɓ mnya, ka ndwaləmta jirkur.

⁴Antə shanga mji ol'olər Israila ku tsaptədzi ka mwari adzə Samiwal ahar Rama,

⁵ka pəla alari, “Nggədza kulini ga ku hali, tsuwa maɗashilər nga aɗi na akwa nu surharar ngə wa. Antə vəi ala yeru kuthli na ata pwar yeru apa shanga tsəɗiyayeri damwa.”

⁶Amma ndər ngəni abbər ka mdə vəi ala ɗa kuthli ni aɗi kəskəra Samiwal wa. Antə tsa hara adduwa aka MTHLAKU.

⁷Antə MTHLAKU pəla alari, “Psi thləma ga aka shanga su tə mji akwa pəla ala ga. Kamnyar aɗi ga antə da nggəlari wa, amma iya antə da nggəlari ta I andzi kuthlir ɗa.

⁸Təng sakatə I fwaɓəla ɗa akwa tsəɗi Masar har ka vədza aka pci na ashina, da ku shinadzə bwahila ɗa ali, ka ləkwa nu haptayeri. Antə kulini tsuwa da akwa hara ala ga.

⁹Antə psi thləma ga ala ɗa, amma ka gə tsaktə ɗa ɓɗaku ka ngkərɓəla ala ɗa laku tə kuthli ni ata sə hara ka da.”

¹⁰Antə Samiwal jikatə shanga su tə MTHLAKU pəla ni aka mji na akwa bara ka mdə vəi ala ɗa kuthli ni.

¹¹Samiwal pəla ala ɗa abbər, “Nggədza laku tə kuthli ni ata sə hara ka giri. Tsa ata fatə maɗashilər giri ka da ndzi sojayeri, bwadukwa ɗa ata hara kəthlər ka wagənər mpa arni, bwa duku ata ndzi mjir fəl takwayeri arni, bwadukwa ɗa tsuwa mjir pwakəma ka ndəkər wagənayeri ar takur mpa ni.

¹²Tsa ata vu ka mji laga ndzi ola ata kəra sojayeri na dəpu dəpu, ka ata kəra sojayeri na ntəfkumari ntəfkumari. Maɗashilər giri ata sə tsuhwa akwa fakərni, ka fəi alari sur fakərni, ka ɓdləta alari kari mpa ka kari wagənayeri ar takur mparni ni.

¹³Tsuwa kuthli ni ata fatə maɗa' giri na maɗangkwi ka da ndzi mjir nam tulari, ka mjir ta, ka mjir ɓwa su alari.

¹⁴Tsa ata dlutsə fakayeri ar giri na ɓɗakɓɗakta shang, ka fakayeri ar anap ka na ar zaitun, ka tsa nar aka mjir kəthlər alari.

¹⁵Tsa ata dlu zakar mthlir giri, ka anapər giri, ka hamta aka kwakunayeri arni ka buɗayeri arni.

¹⁶Tsa ata dlutsə buɗayeri ar giri shili ka mwanki, ka kustayeri ar giri na carcarari, ka kwarayeri ar giri, kamnyar ka da hara kəthlər alari.

¹⁷Tsa ata dlu zakar mwaɓiyayeri ar giri. Antə giri ka kəra giri ata sə ndzi mafarni.

¹⁸Ata saka nda antə giri ata sə tuwa tə kuthlir giri natə giri kə kəra giri an carɓəla ni, amma MTHLAKU aɗi ata psi thləm ala giri wa.”

¹⁹Amma wala apani mji ni aɗi psi thləm aka sauriyir Samiwal ni wa. Da pəla, “Awa! Ar yeru kuthli antə yeru akwa barari,

²⁰kamnyar ka yeru ndzi apa mambila mjir tsəɗiyayeri. Tsuwa ka kuthlir yeru hara kuthlikur ata kəra yeru, ka pwa akəma yeru akwa mpayeri na ata wutə yeru.”

²¹Aghəla tə Samiwal ku psi thləm aka shanga su tə da pəla, antə tsa jikatə ndər ni aka MTHLAKU.

²²Antə MTHLAKU pəla alari, “Psi thləma ga aka su tə da akwa barari, ka gə vəi ala ɗa kuthli.” Antə Samiwal pəla aka mjir Israila, “To daci, kulini ka kəlara mda ngka avəi akwa diyirni.”