Read bura-pabir 1 Samiwal 9 Bible Online

1 Samiwal 9 - bura-pabir bible

1 Samiwal 9

¹Mdər gəna laga aɗi akwa nyarmbwar Benjamin na ka thləmari Kish, na ɓzər Abiyel, na ɓzər Zeror, na ɓzər Bekorath, na ɓzər Afiya na akwa nyarmbwar Benjamin.

²Kish ka ɓzər sal laga na ka thləmari Shawulu, ɓzərdakwi laga na dakwi ka duna. Mda aɗi akwa nca mjir Israila na təramta Shawulu ka dakwikur wa. Tsuwa tsa saɓəl ta kəlara mda akwa Israila.

³Vir laga kwarayeri ar Kish na baba' Shawulu ku sha. Antə tsa pəla aka ɓzərni Shawulu abbər, “Kəta pal akwa nca buɗayeri ni ka giri ra pakə kwarayeri ni.”

⁴Antə Shawulu ka buɗarni ku baɗitə mwa, tə da nu garayeri na akwa tsəɗi Ifrayim, ka təra akwa tsəɗi Shalisha, amma da aɗi wutə kwarayeri ni wa. Antə da ku mwari abwar Shaalim, amma kwarayeri ni aɗi anda tsu wa. Da mwari akwa tsəɗiyir Benjamin amma ba kulini da aɗi wutə ɗa wa.

⁵Sakatə da mzhitə tsəɗi Zuf antə Shawulu pəla aka buɗarni na adzə ni ni, “Mwa angka avəi diya, ta baba'na asə zhar damitədzi ata kəra kwarayeri ni ka ləkwa damitədzi ata kəra mwa.”

⁶Amma buɗa ni pəla, “Ndzi kwang! Mdər Hyel laga aɗi diya akwa di ni tə mji ana səlitə ni swaiswai. Shanga su tə tsa pəla ana ndzi jiri. Ndzi ka mwa mwari adzə ni nuhum tsa ata mzhi pəla ala mwa vəi tə mwa ata wutə kwarayeri ni ata.”

⁷Antə Shawulu pəla, “Kaha, ma mwa mwari adzə ni, man tə mwa ata mzhi na alari ri? Kamnyar susəma na akwa thləvur mwa ku kuri, tsuwa sur cauta aɗi tə mwa ata mzhi nar aka mdər Hyel ni wa. Nənga su laga aɗi ri?”

⁸Antə buɗa ni shinau ka pəla, “I ka liyar adzərfa laga raka, tə I ata mzhi na alari ka tsa pəla ala mwa laku tə mwa ata nuwari ka ra wutə ɗa.”

⁹Waci akwa Israila, ma mda ata bara nggaɓəla su akəla Hyel, antə tsa ata pəla, “Asəra ka mwa mwari adzə mdər wulsu.” Kamnyar mdə tə mji ana kəga kulini abbər naɓi ni, waci mda ana kəga ni mdər wulsu.

¹⁰Antə Shawulu pəla aka buɗarni, “Gariyir ngə ni ɓɗaku! Mwa təra mwari.” Antə da ləkwa lakur mwari akwa di tə mdər Hyel ni akwa ni.

¹¹Sakatə da akwa ndləɓəla ata ləkwa kutadi ni, antə da kəɓa ka maɗangkwi akwa ra kə yimi. Antə da yu maɗangkwi ni abbər, “Mdər wulsu ni avəi ya?”

¹²Antə maɗangkwi ni shinau ka pəla, “I tsa avəi, ndaga ni ma akəma giri. Tərtə gir səla giri. An səyirni kulini akwa di ni, kamnyar ashina mji ata hamta saɗaka akwa vəi vəngkər səli na ata kər gar ni.

¹³Təkəma ləvəyir giri akwa kutadi ni, giri ata wutə ni akəmata tsa ndləɓəla ka ra səm susəma ata gar ni. Kamnyar mji aɗi ata səm susəm wa tar ma tsa ku mwari ka vədzə barka aka saɗaka ni. Aghəla nda antə mji tə mdə ku kəgatə ɗa ni ata səmari. Antə ma giri ku hangkər, giri ata wutə ni.”

¹⁴Antə da ndləɓəla akwa kutadi ni. Antə təkəma ləkwar ɗa akwa kutadi ni təng da wutə Samiwal ku səɓəla akwa si təbwar ɗa. Tsa akwa bara ləmta akwa vəi vəngkər səli ni.

¹⁵Təng tsu vir pal akwabə Shawulu asi antə MTHLAKU ncanta aka Samiwal abbər,

¹⁶“Ɗəpə saka apani, I ata thlenta ala gə mdə laga akwa nyarmbwar Benjamin, ka gə ɗangkər alari mal ar olkur ka tsa ndzi kuthlir mjirna Israila. Tsa an ata msərantə mjirna akwa tsiya mjir Filistiya, kamnyar I ku wutə bwaniyir mjirna ka nggatə tuwar ɗa.”

¹⁷Sakatə Samiwal wutə Shawulu antə MTHLAKU pəla alari, “Ngəni an mdə natə I pəla ala gə su ata kər nda. Tsa ata hara kuthlikur ata kəra mjirna.”

¹⁸Antə Shawulu mwari adzə Samiwal akwa nyarfur ləvəi akwa kutadi ni ka yu ni abbər, “Ama kəyir mdər wulsu nə ri?”

¹⁹Antə Samiwal shinau alari abbər, “I an mdər wulsu ni. Dlu gir kəma, ka mburu ləmta akwa vəi vəngkər səli, kamnyar ashina giri ata səm susəma ata kəma duku ka iya. Ɗəpə ɗəɗəpa I ata hamta ala ga amsar sur yuwur ngə ni, kambəla I salamtə nga.

²⁰Ma kamnyar kwarayeri ar giri na sha ka vir makər ni, giri aɗiya damitədzi wa kamnyar mdə ku kurtə wutə ɗa. Tsuwa wa akwa Israila an ata wutə su na ɓɗakta shang ri? Aɗi ga kəga yangkura gə wa ya?”

²¹Antə Shawulu pəla, “Ai arna I akwa nyarmbwar Benjamin, nyarmbwa na raka ta shang akwa Israila. Tsuwa kutakəyirna an kutakəi na kula su ta shang akwa nyarmbwar Benjamin. Antə zanuwa, apa madi tə ga ata ngkər gari apani ali ri?”

²²Antə Samiwal mwantə Shawulu ka buɗarni akwa kutambwar səm susəma, ka na ɗa vəi ndzəndzi akəma shanga mji tə mdə kəgata, natə hangkurər ɗa ku mwanta apa makkumari.

²³Antə Samiwal pəla aka mdər ta susəm ni, “Səntə kum tə I na ga abbər ka gə vəi nda.”

²⁴Antə mdər ta ni ku səntə nggilang na ɓɗakta shang ka vəi akəma Shawulu. Antə Samiwal pəla, “Ngəni an kum tə mdə vəi kamnyar nga. Ɓɗa, kamnyar I vəi ni dzak kamnyar nga, abbər ka gə səma akwa saka ngəni ata kəma duku kəga mji tə I kəgata.” Antə vir nda Shawulu ku səm susəma ata kəma duku ka Samiwal.

²⁵Aghəla tə da səghəi kazhar vəi vəngkər səli na ata gar ni, ka ləkwa kutadi, antə Samiwal ka Shawulu ku lətə kəra mbwarni ka gari. Aghəla nda antə Samiwal ngka ka pəpəi.

²⁶Səɓəla ɗəpari sakatə viri ata kura antə Samiwal ndəra aka Shawulu ata kəra mbwa ni ka pəla, “Thlata, kəi pwarɓəla nga.” Antə Shawulu ku thlata, antə japwa ɗa suɗə ni ku ləɓəla ata kutadi.

²⁷Sakatə da ku ləɓəla ata hildi antə Samiwal pəla aka Shawulu, “Pəla aka buɗa ni ka tsa dlu kəma, ka tsa psi laku. Ma sakatə buɗa ni ku dlu kəma ka təra, ar nga ga ata ntsar səl kamnyar kəi pəla ala gə su tə Hyel pəla.”