Read chopi Genesisi 1 Bible Online

Genesisi 1 - chopi bible

Genesisi 1

¹Kukhatani Txizimu txi vangile nzuma ni mafu.[1]

²Mafu ma ti sinzi kuva ni khohe, ma ti sinzi kuva ni txilo; txidema txi ti ti fenengeta kuhokoma ka linene; se Moya wa Txizimu wu ti ti zinginika txitimwi ka mati.

³ Se Txizimu txi to kha txona: “Ku nave ho kuwonekela.” Se kuwonekela ku to vaho.

⁴Se Txizimu txi to wona ti to kuwonekela ngunene; se Txizimu txi to hambanisa kuwonekela ni txidema.

⁵Se Txizimu txi to raya kuwonekela ditina daku Mitshikari; ani txidema txi to txi raya ditina daku Wusiku. Se di to swa, ditxa: Ditshiku do khata.

⁶Se Txizimu txi to kha txona: “Ku nave ho mpfhuka hagari ka mati, kambe ku nave ho kuhambana ka mati ni mati.”

⁷Se Txizimu txi mahile mpfhuka, txi hambanisa mati a hahatshi ka mpfhuka, ni mati a txitimwi ka mpfhuka. Se eto ti to maheka.

⁸ Se Txizimu txi to raya mpfhuka ditina daku i nzuma; se di to swa, ditxa: Ditshiku da wumbidi.

⁹Se Txizimu txi to kha txona: “Ma na sengeletane mati a hahatshi ka nzuma wukhalo wumwewo; kasi ku na maneka mtxhefa wa kuoma.” Se eto ti to maheka.

¹⁰Se Txizimu txi to raya mtxhefa ditina daku Mafu; se msengeletano wa mati txi wu dhana ku i Linene. Se Txizimu txi to wona ti to ndinene.

¹¹Se Txizimu txi to kha txona: “Mafu ma na milise similwa so nakana, mwasi wu wu ningako mbewu, mindonga yo veleka mihando, yo ninga mihando ngu kuhambanelana ka yona, yi ku ni tinyingi mndani ka yona, txitimwi ka mafu.” Se eto ti to maheka.

¹²Se mafu ma milisile mwasi wo nakana, mwasi wo ninga mbewu ngu kuhambanelana ka wona, ni mindonga yo veleka mihando, yi ku ni tinyingi ngu kuhambanelana ka yona. Se Txizimu txi to wona taku ndinene.

¹³Se di to swa, ditxa: Ditshiku da wuraru.

¹⁴Se Txizimu txi to kha txona: “Ku nave ho siwoningo ha mpfhukani ka nzuma, kasi kuhambanisa hagari ka mitshikari ni wusiku; si txi maha sikombiso sa[2] timbimo to kari, ta masiku, ni malembe.”

¹⁵Si nava siwoningo sa ha mpfhukani ka nzuma, si na woninga mafu. Se eto ti to maheka.

¹⁶Se Txizimu txi mahile siwoningo simbidi sa hombe: Txiwoningo txa hombe kasi ku na fuma mitshikari, ni txiwoningo txa txidotho kasi ku na fuma wusiku; ni kuvanga tinyeleti.

¹⁷Se Txizimu txi si vekile ha mpfhukani ka nzuma, kasi kuwoninga ha mafuni;

¹⁸ni kuva si txi na fuma mitshikari ni wusiku, si txi hambanisa liwoningo ni txidema. Se Txizimu txi to wona ti to ndinene.

¹⁹Se di to swa, ditxa: Ditshiku da wumune.

²⁰Se Txizimu txi to kha txona: “Matini ku na maneke sivangwa sasingi[3] so hanya; se ka mpfhuka wa nzuma ku na purumapurume sinyana.”

²¹Se Txizimu txi to vanga vanyamrikidi,[4] ni sotshe so hanya so tsimbila ngu dibindi, sasingi ngutu, si nga maneka matini, ngu kuhambana ka sona, ni sotshe sinyana si si ku ni tibhapi, ngu tixaka ta sona. Se Txizimu txi to wona ti to ndinene.

²²Se Txizimu txi to si katekisa, txi txi kha txona: “Velekelani, mi txi anda, mi txi tata mati tineneni; se sinyana si na tale ha mafuni.”

²³Se di to swa, ditxa: Ditshiku da wutxhanu.

²⁴Se Txizimu txi to kha txona: “Mafu ma na humise sivangwa so hanya, ngu tihunzu ta sona; sifuyo, ni si si tsimbilako ngu dibindi, ni sihari sa txitinga, ngu tixaka ta sona.” Se tona eto ti to maheka.

²⁵Se Txizimu txi to vanga sihari sa txitinga, ngu tixaka ta sona, ni sifuyo ngu tixaka ta sona, ni sotshe si si tsimbilako ngu dibindi ha mafuni, ngu tixaka ta sona. Se Txizimu txi to wona ti to ndinene.

²⁶ Se Txizimu txi to kha txona: “A hi vangeni m'thu ngu txifaniso txathu e fana ni nathu; se a na fumela sihaka sa linene, ni sinyana sa nzuma, ni sifuyo, ni otshe mafu, ni sihari sotshe so tsimbila ngu dibindi[5] txitimwi ka mafu.”

²⁷ Se Txizimu txi vangile m'thu ngu txifaniso txa txona; txi m'vangile e fana ni Txizimu; txi va vangile wamwamna ni wamsikati.

²⁸Se Txizimu txi to va katekisa, txi va gela ku kha txona: “Velekelani, mi txi anda, mi tala ha mafuni, mi txi ma fuma; fumelani sihaka sa linene, ni sinyana sa nzuma, ni sotshe sihari si si tsimbilako ha mafuni.”

²⁹Se Txizimu txi to kha txona: “Ni mi ningile wotshe mwasi wu wu ningako mbewu, wu kuho txitimwi ka otshe mafu, ni yotshe mindonga ya mihando yi yi ningako mbewu; si na va i di sakudya sanu.

³⁰Ni sotshe sihari sa mafu, ni sotshe sinyana sa nzuma, ni sotshe so tsimbila ngu dibindi ha mafuni, asi si hanyako, wotshe mwasi wo nakana wu na va kudya ka sona.” Se eto ti to maheka

³¹Se Txizimu txi to wona totshe ti txi ngadi ti mahile, txi mana taku ndinene ngutu; se di to swa, ditxa: Ditshiku da wutxhanu ni dimwedo.