Read chopi Genesisi 11 Bible Online

Genesisi 11 - chopi bible

Genesisi 11

¹Sekoko kotshe ha mafuni, ku ti ti ni lidimi limwelo, ni mawombawombelo mamwewo.

²Ti di ngeto, vathu va to khukha na va txita ngu wutxani, se ve mana libala ditikoni ka Sinari; ve ti akela ka lona.

³Se va to angulana, va txi kha vona: “He wumbeni sitini, hi si hisa kha kwati ngu mndilo!” Sitini i ti ti marigwi a kona, ani ndope i ti ti semende ya kona.

⁴Va to kha vona: “A hi ti akeleni didhoropa ni txitezi, atxiya txiroro txa kona txi no hoka nzumani, se ditina dathu di na va ni nduma, kasi ku hi si hangalaswi ka otshe mafu.”

⁵Sekoko MKOMA, ngu konaho, a to relela, kasi kuya wona didhoropa ni txitezi txi vanana va vathu va nga ti aka.

⁶Se MKOMA a to womba, a txi khene: “Wonani, taku mbathu vamwevo, kambe votshe mba lidimi limwelo. Akuwa va nga khatisa tiya, txi walo txo va tandekisa kumaha txilo, ka totshe ti va ti lavako.

⁷A hi txhikeni hi txi ya hambanisa lidimi lawe, kasi ku mmwani asi swi a txi engisa lidimi la mmwani.”

⁸Sekoko MKOMA, a to va hangalasa txitimwi ka otshe mafu, ve leka kuaka didhoropa.

⁹Ngu mhaka yeto, m'ti wule wu dhanwa ku[27] i Bhabheli, nguko ngu koneyo MKOMA a nga hambanisa kuwombawomba ka vathu va mafu otshe, kambe ku khatete koneyo ku hangalaswa ka vathu ni dotshe ditiko ngu MKOMA.

¹⁰Ngu tiya tiveleko ta Seme: Mbimo yi Semi a ngadi ni tanga ya dizana; da malembe, a to veleka Arifaxadhe, ma di pindile malembe mambidi msana ka ndambi.

¹¹Msana ka kuvelekwa ka Arifaxadhe, Semi a hanyile kambe 500 wa malembe, se e veleka vanana va majaha ni vamahorana.

¹²Arifaxadhe a di ni magumi mararu a malembe ni mtxhanu, se a to veleka Sala.

¹³Msana ka kuvelekwa ka Sala, Arifaxadhe a hanyile 403 wa malembe, se e veleka vanana va majaha ni vamahorana.

¹⁴Mbimo yi Sala a nga va ni tanga ya magumi mararu a malembe, a to veleka Ebheri.

¹⁵Se msana ka kuvelekwa ka Ebheri, Sala a hanyile kambe 403 wa malembe, se e veleka vamwani vanana va majaha ni vamahorana.

¹⁶Mbimo yi Ebheri a nga ti ti ni magumi mararu a malembe ni mune, a to veleka Pelege.

¹⁷Msana ka kuvelekwa ka Pelege, Ebheri a hanyile 430 wa malembe, se e veleka vamwani vanana va majaha ni vamahorana.

¹⁸Mbimo yi Pelege a nga va ni magumi mararu a malembe, a to veleka Rewu.

¹⁹Msana ka kuvelekwa ka Rewu, Pelege a hanyile 209 wa malembe, e veleka vamwani vanana va majaha ni vamahorana.

²⁰Mbimo yi Rewu a nga va ni magumi mararu a malembe ni malembe mambidi, a to veleka Sarugi.

²¹Msana ka kuvelekwa ka Sarugi, Rewu a hanyile 207 wa malembe, se e veleka vamwani vanana va majaha ni vamahorana.

²²Mbimo yi Sarugi a nga va ni tanga ya magumi mararu a malembe, a to veleka Nahori.

²³Msana ka kuvelekwa ka Nahori, Sarugi a hanyile 200 wa malembe, se e veleka vamwani vanana va majaha ni vamahorana.

²⁴Mbimo yi Nahori a nga va ni magumi mambidi a malembe ni mtxhanu ni mune, a to veleka Tera.

²⁵Msana ka kuvelekwa ka Tera, Nahori a hanyile mamwani malembe a 114, se e veleka vamwani vanana va majaha ni vamahorana.

²⁶Se mbimo yi Tera a ngadi ni mtxhanu wa magumi ni mambidi a malembe, a to veleka Abramu, Nahori ni Harani.

²⁷Ngu liya liveleko la Tera. Tera a to veleka Abramu, ni Nahori, ni Harani. Harani a to veleka Loti.

²⁸Harani a fite a di ngadi a txi hanya tate wakwe Tera, a fete didhoropani ka Uri, ahawa a nga velekelwa kona, ditikoni ka Vakaldheya.

²⁹Abramu ni Nahori va to teka vasikati. Msikati wa Abramu a ti dhanwa ku i Sarayi, msikati wa Nahori a ti dhanwa ku i Milka, mwanana wa dihorana wa Harani, i nga ti tate wa Milka ni Jesika.

³⁰Kambe Sarayi i ti ti txifule, ati si nga ni vanana.

³¹Tera a to teka mwanana wakwe Abramu, ni mtukulu wakwe Loti, mwana Harani, ni mame wakwe Sarayi, msikati wa Abramu, e rura navo ditikoni ka Uri ka Vakaldheya, ve tsula ditikoni ka Kanana, aniko, va di hokile ditikoni ka Harani, va to aka ve zumba kona.

³²Tera a hanyile 250 wa malembe, se ngu msana a fete Harani.