Read chopi Genesisi 12 Bible Online

Genesisi 12 - chopi bible

Genesisi 12

¹ Sekoko MKOMA a to khene ka Abramu: “Rura ditikoni kwanu u leka maxaka ako ni nyumba ya vaveleki vako, u tsula ka ditiko di ni no kukomba.

²Ni na maha lihunzu la hombe ngu ngawe; ni na kukatekisa, ni kuninga ditina da hombe, uva ditshina da makatekwa.

³ Ni na katekisa wule a no kukatekisa, ni ruketela wule a no kueyisa. Ngu mhaka yako, ti nava ti txi katekiswa totshe tixaka ta ha mafuni.”

⁴Se Abramu a to khukha e tsula, nga ti MKOMA a nga m'gelisa tona, se Loti a to tsula nayo. Mbimo yi Abramu a nga khukha a ti ni tanga ya mtxhanu wa magumi ni magumi mambidi ni mtxhanu wa malembe, mbimo yi a nga khukha ngu Harani.

⁵Abramu a to teka Sarayi msikati wakwe, ni Loti mwanana wa mwanawe, ni thomba yotshe yi va nga ti ti nayo, ni sithumi si va nga ti si mani ditikoni ka Harani, va txi khukha ve tsula ditikoni ka Kanana, kala va txi ya hoka ditikoni ka Kanana.

⁶Abramu a to tshawunyeta ditiko kala a txi ya hoka ka mkusu wa More, wu nga ti ka wukhalo wa Sikemi; sekoko Vakanana va ti akile ka dona ditiko diya.

⁷ Se MKOMA a to humelela ka Abramu a txi ta khene: “Ditiko diya ni na di ningela ka liveleko lako.” Ngu konaho Abramu a nga akela MKOMA txiluvelo, a nga ti wonekisa kwakwe.

⁸A di khukhile konaho a to ya ka mmango wu wu ku ngu didhawa da wutxani ka Bheteli, eho a to emisa ditenda dakwe, Bheteli ku txi zumbela mswa-ditambo, se Ayi, ku ti zumbela didhawa da wutxani. Koneho Abramu a to akela MKOMA txiluvelo, atxi khozela kona ditina da MKOMA.

⁹Msana keto, Abramu a to tsimbila, eza a txi ya hoka Negebhe.

¹⁰Ka ditiko donedo ku to humelela nzala, se Abramu a to relela a txi ya Egipta, kasi kuya zumba kona, ngako nzala i nga ti ya hombe ha mafuni.

¹¹Mbimo yi a nga wona ti to a hafuhi ni kuwulela Egipta, Abramu a to khene ka msikati wakwe Sarayi: Wa ti wona: Na tiziva ti to awe u woneka u di msikati wo tshura ngutu.

¹²Ngako Vaegipta va txi kuwona, va na kha vona: “Awuwa i msikati wakwe,” se ngu toneto, va na ni daya, va txi kuleka awe u txi hanya.

¹³ Na ku kombela, u ndiyangu kasi ku ni txi mana kuamukelwa ngu nzila ya yinene, ni kumana kambe kulekwa ni hanya, ngu mhaka yako.

¹⁴Mbimo yi Abramu a nga wulela Egipta, Vaegipta va ti woni to awule wamsikati a tshurile ngutu.

¹⁵Tinduna ta Faro, ngako ti di muwoni wamsikati, ti to ya womba ngu mapswi a ku m'dhumisa ka Faro. Se wamsikati a to tekwa e yiswa nyumbani ka Faro.

¹⁶Ngu mhaka ya Sarayi, Faro a to amukela Abramu ngu manza mambidi. E mninga tinvuta, tihomu, timbongola ta vamatune, ni timbongola ta vamakati, sithumi sa mazambi, ni sa mahorana, ni makamelu.

¹⁷Aniko MKOMA a to rumela makhombo a hombe ka Faro, kumweko ni ka m'ti wakwe, ngu mhaka ya Sarayi, msikati wa Abramu.

¹⁸Sekoko Faro a to dhana Abramu a txi m'gela ku khene: “Ngu kutxani u txi ni mahela mhaka yiya kani? Ngu kutxani u nga mbi ni gela ti to ene msikati wako kani?

¹⁹Ngu kutxani u nga khawe i ndiyangu kani? Ngu mhaka yeto, ni mtekile a txi mmaha msikati. Se konkuwa, ndiyo msikati wako, mteke, u txi tsula nayo.”

²⁰Faro a to ninga mthetho ka tinduna takwe kasiku ve humisa Abramu hahanze ka Egipta, ene ni msikati wakwe ni sotshe si a nga ti naso.