Read chopi Genesisi 13 Bible Online

Genesisi 13 - chopi bible

Genesisi 13

¹Abramu a to huma ditikoni ka Egipta, ni msikati wakwe, ni sotshe si a nga ti naso, ni Loti a ti kumweko navo, kala ditikoni ka Negebhe.

²Abramu a ti ni sifuyo ngutu, ni silivhela ni nzalama.

³Ene a to ya masoni ni dipfhumba dakwe, kukhukhela Negebhe, kala Bheteli, ka wukhalo wu kukhatani ka kona a nga ti emisile ditenda dakwe, hagari ka Bheteli ni Ayi.

⁴Ka wukhalo wule kukhata ka kona a nga ti akile txiluvelo, Abramu a to khozela ditina da MKOMA.

⁵Loti a nga ti londetela Abramu, nene a ti ti ni mitxhambi ya tinvuta, ni tihomu, ni matenda.

⁶Ditikoni muwa va nga ya maneka kona, mafu ma ti si dingani kuve zumba votshe wukhalo wumwewo, nguko va ti ti fuyile ngutu.

⁷Se ku ti ti ho kuphikizana hagari ka vadyisi va sifuyo sa Abramu ni vadyisi va sifuyo sa Loti, ka yona mbimo yile; sekoko Vakanana, Vaferezi va ti ti zumba kona ditikoni mule.

⁸Abramu a to khene ka Loti: “Kha kulaveki ku txi vaho kuphikizana hagari kwangu ni nawe, hagari ka vadyisi vangu ni vako, nguko hi vamwevo.

⁹Dotshe ditiko kha di nga masoni kwako kani? Na ku kombela ti to u tshuketa kule ni nani. Nga ti u txi ya txibhabha, ani ni na ya txinene, nga ti u txi ya txinene, ani ni na ya txibhabha.”

¹⁰ Loti a to gula maso e wona lotshe libala la Jordhani, lotshe li ti ni mati amangi, na MKOMA asanzi kuhaxula Sodhoma ni Gomora, ku ti fana ni thembwe ya MKOMA, kufana ni ditiko da Egipta di gwitelako Zowari.

¹¹Sekoko Loti a to ti sawulela libala la Jordhani, e rumela kuya wutxani. Ngu tona tiya Abramu ni Loti va nga hambanisa tona.

¹²Abramu a to aka ditikoni ka Kanana, se Loti a txi aka ka madhoropa ale ma nga ti hafuhi ni mnambo wa Jordhani, e tshuketisela matenda akwe, kala kuya hoka Sodhoma.

¹³Kambe vathu va Sodhoma va ti ti ni tshofu ngutu, va txi mahetela sionho sasingi masoni ka MKOMA.

¹⁴MKOMA a wombile ka Abramu, msana ka kuhambana ka Loti nayo, a txi khene: “Sekoko Gula maso, kukhukhela ka wukhalo wu u ku ka wona, u wona wuphemba ni wulambwe, wutxani ni mswa-ditambo!

¹⁵ Dotshe ditikodo u di wonako, ni na kuninga, awe ni lotshe liveleko lako, kala kupinduka.

¹⁶Liveleko lako ni na li maha li txi fanana ni lithulu la mafu. Ku walo wu a sikotako kubala lithulu la mafu, kufana ni toneto, kuwalo wu a no sikota kubala situkulwana sako.

¹⁷Konkuwa, khukha u txi dhawula ditiko diya u wona kulapha ka dona ni kuanama ka dona, nguko ni na kuninga dona.”

¹⁸Abramu a to khukha ni matenda akwe a txi ya aka mikusuni ka Mambre, i ku hafuhi ni Hebroni, se koneyo, a to akela MKOMA txiluvelo.