Read chopi Genesisi 15 Bible Online

Genesisi 15 - chopi bible

Genesisi 15

¹Msana ka totshe tiya, dipswi da MKOMA di tile ka Abramu, ngu txiwoniso, di txi kha dona: “U nga thave awe Abramu, ani ngani txitxhavangu txako, hakhelo yako yi na va ya hombe ngutu.”

²Sekoko Abramu a xamute, a txi khene: “Awe MKOMA Txizimu, u na ni ninga txani kani? Nguko ni konkuwa kha ninzi kuva ni mwanana, se awu a no dya thomba yangu i Eliyezeri wa Dhamasku.”

³Abramu a to engeta, a txi khene: “Ngu ti to khwa ni ninga mwanana, se mwanana wule a no velekwa ha m'tini kwangu, ngene a no dya thomba yangu.”

⁴Se dipswi da MKOMA di tile ka Abramu, di txi ta kha dona: “Hi nga ene Eliyezeri a no dya thomba yako, aniko yi na dyiwa ngu wule a no velekwa ngu ngawe.”

⁵ Sekoko Txizimu txi to teka Abramu txi mu yisa hahanze, txi txi kha txona: “Hi nga gula maso u txi wona nzumani, u bala tinyeleti, mwendo u na sikota ku ti bala, txi txi kha txona: Liveleko lako li na talisa ku nga tona ti.”

⁶ Se ene a to kholwa ka MKOMA,[29] e woneka i di m'thu wo lulama.

⁷MKOMA a to khene ka Abramu: “Ani ni MKOMA wu a nga kuhumisa Uri ka Vakaldheya, kasi ku ni txi ku ninga ditiko diya, di maha thomba yako.”

⁸Se Abramu a to khene kwakwe: “MKOMA Txizimu, ni na ti zivisa kutxani ti to di na va ditiko dangu kani?”

⁹MKOMA a m'gete ku khene: “Ni tisele dirole da makati da malembe mararu, ni phongo ya malembe mararu, ni txihambana txa malembe mararu, ni dituva ni txituvani txatxidotho.”

¹⁰Ene a to mtisela sotshe sihari siya, e si bhanda ngu hagari, e si veketela hafu ni hafu, si rendekelana. Kambe dituva ni txituvani kha si bhanda.

¹¹Magwana ma to ta khandama txitimwi ka sihari sile sa kudawa, aniko Abramu a ma dindile.

¹²Mbimo yi ditambo di nga txi ya kuswani, Abramu a to ñolwa ngu wukohe, e maneka a di fenengetilwe ngu mtema wo thisa.

¹³Sekoko MKOMA a to womba tiya ka Abramu: “Ti zive ngu ditshuri ti to liveleko lako li nava i di la valuveli ka ditiko da vamwani vathu, adiya di ku si nga dawe, koneyo vona va na va i di sikulungu, va na va va txi xuphwa mndani ka 400 wa malembe.

¹⁴ Aniko ni na tsayisa wukoma wa vathu va va no va va di va fumete, kambe ngu msana, vona va na huma ni tithomba ta hombe.

¹⁵Se awe u na tshumelela ngu kuthutha ka vatate vako; u na ya tshotshwa, u di kumbile ngutu.

¹⁶Vanana va liveleko lako la wumune va na wuya kambe kona muwa, nguko konkuwa wubihi wa Vaamori kha wu se hoka magwito ka wona.”

¹⁷Ngako di ti swite ditambo, ku to va ni txidema txa hombe; Ku txi humelela txikho txi nga txi tuvikela, ni txisoso txa mndilo txi nga txi pinda ngu hagari ka sihari si si nga bhandiselwa.

¹⁸ Ka donedo ditshiku, MKOMA a to maha Txitumelelano ni Abramu, a txi khene: “Ni ningete ditiko diya ka liveleko lako, kukhukhela mnamboni ka Egipta, kala ka mnambo wa hombe, wa Ewufrate.

¹⁹I ku ditiko da Vakeni, ni Vakenezi, ni Vakadhimoni,

²⁰Muheti, Vaferezi, Varefayimi

²¹Vaamori, Vakanana, Vagerezi ni Vajebhuzi.”