Read chopi Genesisi 16 Bible Online

Genesisi 16 - chopi bible

Genesisi 16

¹Sarayi, msikati wa Abramu, a ti sa nga m'velekela mwanana. Aniko a ti ni txithumi txa Muegipta, txi nga ti dhanwa ku i Hagari.

²Sarayi a to womba ka Abramu, a txi khene: “Wona, MKOMA kha ni ninga ti to ni kuvelekela vanana. Ngu mhaka yeto, teka txithumi txiya txangu txa wamsikati; mwendo[30] ni na mana mwanana ngu ka txona. Se Abramu a to tumela dipswi da Sarayi.”

³Sekoko Sarayi msikati wa Abramu, a to teka Hagari, txithumi txakwe txa Muegipta, e txi ningela ka mwamna wakwe Abramu, eva msikati wakwe.

⁴Abramu a to amukela Hagari e zivana nayo, se Hagari e mana txirumbu. Mbimo yi Hagari a nga wona ti to ana ni txirumbu, a to khata kuwona nyamne wakwe Sarayi ngu maso a txieyiso.

⁵Sekoko Sarayi a to khene ka Abramu: “Awe ngawe u fanelako kuwona mhaka ya kuruketelwa kwangu. Ni vekile txithumi txangu mawokoni kwako, se kukhukhela kuwa a nga wona ti to ana ni txirumbu, ani kha ni nga wa txilo masoni kwakwe. Txizimu txi na hi lamule ka mhaka yangu ni nawe!”

⁶Abramu a to womba ka Sarayi, a txi khene: “Wona, txithumi txako txi manzani kwako. Maha ka txona nga ti u ti lavisako tona.” Sarayi a to khata ku mahela tshofu Hagari, ahawa ka kuza Hagari e thava masoni kwakwe.

⁷Ngelozi ya MKOMA yi to mana Hagari a di hafuhi ni txisima txi txi ku txiwulani, txisima txi txi ku hafuhi ni nzila ya kuya Suri,

⁸ngelozi yi to womba ka Hagari, yi txi kha yona: “Hagari, txithumi txa Sarayi, u ta ngu hani, na u txi ya hani kani?” Ene a xamute, a txi khene: “No thava masoni ka nyamne wangu Sarayi.”

⁹Sekoko Ngelozi ya MKOMA yi m'gete yi txi kha yona: “Tshumela u txi ya ka nyamne wako, u txi ya mthumela ngu kutiveka hahatshi.”

¹⁰Ngelozi ya MKOMA yi m'gete kambe yi txi kha yona: “Ani ni na andisa ngutu vanana va liveleko lako, ti to kuwalo ni wammweyo a no sikota ku va bala.”

¹¹Ngelozi ya MKOMA, yi to kha yona kambe kwakwe: “U ni txirumbu, se u na veleka mwanana wa mfana, u mraya ditina[31] daku i Ismayeli, nguko MKOMA a engisile kuxupheka kwako.

¹²Se ene a na[32] fana ni mangwa, a na zumba a txi lwisa votshe, se votshe va na zumba va txi mlwisa; a na humelela masoni ka votshe vaakelani vakwe.”

¹³Se Hagari a to raya MKOMA wule a nga ti womba-womba nayo, ditina do khene:[33] “Awe u Txizimu txo wonwa,” nguko u ti khawe: “Ina kha na wona Txizimu txi txi ni wonako kani?”

¹⁴Ngu mhaka yeto txisima txiya txi dhanwi ku[34] “Njisima txa Lahayi-Royi,” txona txi maneka hagari ka Kadhesi ni Bheredhi.

¹⁵Hagari a to velekela Abramu, mwanana wa mfana, se Abramu a rayile mwanana wakwe a nga velekwa ngu Hagari ditina daku i Ismayeli.

¹⁶Abramu a ti ni mtxhanu wa magumi ni magumi mararu a malembe, ni mtxhanu wa malembe ni dimwedo, mbimo yi Hagari a nga veleka mwanana wakwe Ismayeli.