Read chopi Genesisi 17 Bible Online

Genesisi 17 - chopi bible

Genesisi 17

¹Mbimo yi Abramu a nga va ni tanga ya mtxhanu ni mune wa magumi ni mtxhanu ni mune a malembe, MKOMA a to humelela masoni kwakwe, a txi khene: “Ani ni Txizimu txa Mtamo-Wotshe, u fanete kuhanya masoni kwangu, u txi ni engisa ngu kuhetiseka.

²Ani ni na maha Txitumelelano hagari kwangu ni nawe, kambe ni na andisa ngutu liveleko lako.”

³Sekoko Abramu a to wa hahatshi ngu mbanza; Txizimu txi to womba kwakwe txi txi kha txona:

⁴“Ngu didhawa dangu, nditxe txitumelelano txi ni txi mahako ni nawe, u na va tate wa matiko o tala.

⁵ Kambe khu na mbiswa u txi dhanwa ku u Abramu, aniko ditina dako u na va u di Abrahamu, nguko ani ni na kumaha tate wa matiko o tala.

⁶Ani ni na andisa ngutu liveleko lako, ngu ngawe ni na tumbulukisa mifumo yo tala, hambi vafumeli va na humela kwako.

⁷ Ni na tsanisa Txitumelelano txangu ni nawe, ni lihunzu lako msana kwako, Txitumelelano txiya, txi na va txo mbi guma, se ani ni na va Txizimu txako ni txa lihunzu lako, msana kwako.

⁸ Ni na kuninga awe, ni lihunzu lako, msana kwako, ditiko diya u zumbako ka dona, dotshe ditiko da Kanana di na va ditiko danu, ngu hale ku si gwitiko, kambe ni na va Txizimu txanu.”

⁹Txizimu txi wombile ka Abrahamu, txi txi kha txona: “Awe u na vekisa Txitumelelano txangu, awe ni lihunzu lako, msana kwako, kala kupinduka.

¹⁰ Txitumelelano txangu atxiya mi fanelako ku txi xayisa hagari kwangu ni nawe, awe ni lihunzu lako, msana kwako, ngu txiya: Otshe mazambi anu ma fanete kuyiswa wukwerani.

¹¹Mi na yisa wukwerani m'thu, ngu kuwila didhowo da magwito ka nyama yakwe, etxo txi na va txikombiso txa Txitumelelano txangu ni nanu.

¹²Msana ka mtxhanu wa masiku ni mararu a kuvelekwa, votshe vanana va vafana va na yiswa wukwerani, kukhukhela ka wule a velekwako m'tini kwako, kala ka wule a xawako ngu male ka vamatiko, awule i ku si nga wa lihunzu lako.

¹³Va fanete kuyiswa wukwerani avale va nga velekwa nyumbani, ni vale va nga xawa ngu male. Atxiya ngu txona Txitumelelano txangu txo mbi na magwito, ha mmidi kwanu.

¹⁴M'thu wuhi ni wuhi wa wamwamna, awule a nga mbi yiswa wukwerani, awule a nga mbi wilwa didhowo da magwito ka nyama yakwe, a na tutumiswe hagari ka m'ti wa lihunzu la ka kwawe, nguko a eyisile Txitumelelano txangu.”

¹⁵Txizimu txi to kha txona kambe ka Abrahamu: “Msikati wako Sarayi, khu na mbiswa u txi m'dhana ku i Sarayi, aniko[35] i nave Sara ditina dakwe.

¹⁶Ani ni na mkatekisa, kambe ngu ngene ni na kuninga mwanana wa dizambi, ani ni na mkatekisa ene a na va mame wa mifumo, ngu kwakwe ku na huma vafumeli va vathu.”

¹⁷Sekoko Abrahamu a to ti wisa hahatshi ngu mbanza na a txi seka, nguko a txi ti wotisa mbiluni kwakwe, a txi khene: “Ina wamwamna wu a ku ni 100 wa malembe a nga ngadi e veleka mwanana kani? Ni Sara wu a ku ni mtxhanu ni mune wa magumi a malembe, a nga ngadi e veleka mwanana kambe kani?”

¹⁸Abrahamu a to khene ka Txizimu: “Ayiwe! A na hanye Ismayeli masoni kwako!”

¹⁹Txizimu txi to mxamula txi txi kha tona: “Ahim-him msikati wako Sara ngene a no kuvelekela mwanana wa mfana, se awe u na mraya ditina daku[36] i Isaake, ni na emisa Txitumelelano nayo, atxi txi no va Txitumelelano txo mbi guma, kasiku ni va Txizimu txakwe, ni txa lotshe liveleko lakwe, msana kwakwe.”

²⁰Ngu didhawa da Ismayeli nene, ni engisile txikombelo txako, ni na mkatekisa, ni andisa ngutu liveleko lakwe, a na veleka digumi da vakoma ni vambidi, ani liveleko lakwe li na maha mfumo wa hombe.

²¹Aniko Txitumelelano txangu ni na txi maha ni Isaake, awu a no velekwa ngu Sara dilembe di di tako, ka yona yiya mbimo.

²²Ngako Txizimu txi di gwitile kuwombawomba ni Abrahamu, txi to khukha txi msiya, txi guleka.

²³Sekoko Abrahamu a to teka Ismayeli, mwanana wakwe, ni votshe vavamna vale va nga velekwa m'tini kwakwe, ni votshe vale va nga xawa ngu male, votshe va mazambi, ava va kuho m'tini kwakwe, a to va yisa wukwera, ka donedo tshiku, nga ti Txizimu txi nga mleletisa tona.

²⁴Abrahamu a ti ni malembe ya mtxhanu ni mune wa magumi ni mtxhanu ni mune a malembe, ni mtxhanu ni mune a tanga, mbimo yi a nga yiswa wukwerani

²⁵se Ismayeli, mwanana wakwe, a ti ni tanga ya digumi da malembe ni mararu, mbimo yi a nga yiswa wukwera.

²⁶Ka donedo ditshiku, Abrahamu ni mwanana wakwe Ismayeli, va to yiswa wukwera

²⁷ni otshe mazambi a nyumbani kwakwe, vanana va nyumbani, mwendo vale va nga xawa ngu male ka vamatiko, va to yiswa wukwera kumweko nayo.