Read chopi Genesisi 20 Bible Online

Genesisi 20 - chopi bible

Genesisi 20

¹Abrahamu a to khukha konaho e tsula ditikoni ka Negebhe, a txi ya aka hagari ka Kadhesi ni Suri. Ene a to ya luvela ditikoni ka Gerara.

² Koneyo, Abrahamu a txi womba ngu msikati wakwe Sara, a txi khene i ndiyakwe, se Abhimeleki mfumeli wa Gerara e ruma kuya teka Sara.

³Aniko Txizimu txi to endela Abhimeleki ngu mloro, ni wusiku, se txi txi ta m'gela tiya: “U na fa ngu mhaka ya wamsikatiyo u nga mteka, nguko msikati wa wukati.”

⁴Abhimeleki, ngako a nga ti sinzi kuotela nayo, a to khene: “MKOMA wangu, u na daya m'thu wo mbi na txionho kani?

⁵Abrahamu ngene a nga womba, a txi khene: ‘I ndiyangu’, ni nene wamsikati, e womba toneto, a txi khene: ‘I ndiyangu’. Ni mahile tiya ngu mbilu ya yinene ni manza o lulama.”

⁶Txizimu txi to mxamula ngu mloro, txi txi kha txona: “Ani na tiziva kha kwati taku, eto u ti mahile ngu mbilu ya yinene; aniko ngani ni nga maha ti to u si ni onheli, ni si kutumetisi kum'gwesa.

⁷Se konkuwa, mtshumete eyo wamsikati, a txi tsula ka mwamna wakwe, nguko mwamna wakwe mprofeti: Se a na kukombelela kasi u txi hanya. Aniko nga ti u si mtshumeti, kufa u na fa awe ni votshe va kulumbako.”

⁸Abhimeleki a to vindukela kuwuka, se e dhana otshe maxonga akwe, a txi ta ma txhamusela totshe timhaka tiya; se ni ona maxonga ale a hombe, ma to tala ngu kuthava.

⁹Sekoko Abhimeleki a to dhana Abrahamu, a txi ta m'gela ku khene: “U hi mahete txani kani? Njionho muni ni nga txi maha kwako, kuza u tisa mnandu wa hombe txitimwi kwangu, ni txitimwi ka mfumo wangu kani? Awe u ni mahete ati ti ku si nga ni fanelo yo mahwa.”

¹⁰Abhimeleki a wombile ka Abrahamu, a txi khene: “U pimisile txani, ngako u txi ti maha tiya kani?”

¹¹Abrahamu a xamute a txi khene: “Ani ni to pimisa nokha, ni txi khani: Ka wukhalo wuwa ku nava ku si nga ho ni wammweyo a thavako Txizimu, se va na ni daya ngu mhaka ya msikati wangu.

¹²Hahanze ka toneto, ngu ditshuri ene i ndiyangu, i mwanana wa dihorana, wa tate wangu, aniko hi nga mwanana wa dihorana wa mame wangu, se i msikati wangu.”

¹³Sekoko, mbimo yi Txizimu txi nga ni humisa m'tini ka tate wangu, ni txi pepeseka ni ditiko, ni gete msikati wangu, ni txi khani: “Ni kombela u txi ni mahela wumbilu wuwa, ka otshe makhalo awa hi no maneka hi di kona, womba ti to ani ni ndiyako.”

¹⁴Sekoko Abhimeleki a to teka tinvuta ni tihomu, ni sithumi sa mazambi ni sa mahorana, e ninga Abrahamu, e mtshumetela msikati wakwe Sara.

¹⁵Abhimeleki a to engeta a txi khene: “Ndide ditiko dangu di masoni kwako, u nga sikota kuaka ni ka wuhi wukhalo u wu lavako.”

¹⁶Ka Sara a to womba a txi khene: “Ndiya 1.000 wa maxekele a silivhela, ni mningako ndiyako. Eto ti na maha txikombiso masoni ka votshe va va ku ni nawe, txaku khu nga ni mnandu ka totshe tiya.”

¹⁷Abrahamu a to kombelela Abhimeleki ka Txizimu, se Txizimu txi to holisa, ni msikati wakwe ni sithumi sakwe, kasi ve mana kuveleka vanana;

¹⁸nguko Txizimu txi ti va mahile sifule votshe vavasikati va ha m'tini ka Abhimeleki, ngu mhaka ya Sara, msikati wa Abrahamu.