Read chopi Genesisi 22 Bible Online

Genesisi 22 - chopi bible

Genesisi 22

¹ Se msana keto timhaka, ku to maheka ti to Txizimu txi xola Abrahamu, txi m'gela tiya: “Abrahamu!” Ene a to orovela, a txi khene: “Niho hawa!”

² Txizimu txi to kha txona: “Teka mwanana wako, mwanana wako wammweyo, ene Isaake, awu u m'dhundako ngutu, u tsula ka ditiko da Moriya, ahawa u no ya mningela, u txi mmaha mhamba ya kuhiswa, ka mmango wu ni no kukomba.”

³Sekoko Abrahamu a to wuka ni mabimbi-kutxa, e longela mbongola yakwe, e teka sithumi simbidi kumweko ni mwanana wakwe Isaake, a txi funya ni tikhuni ta kuya hisa ngu tona mhamba; a to tsula ka wukhalo wu Txizimu txi nga mkomba wona.

⁴Ngu ditshiku da wuraru, Abrahamu, a di gute maso, a to wu wona wukhalo wule, a di ngadi kule.

⁵Se Abrahamu a to womba tiya ka sithumi: “Zumbani hawa ni mbongola, ani ni mfana hi ya haleya, hi txi ya khozela, hi na tshumela hi wuya kwanu.”

⁶Abrahamu a to teka tikhuni ta kuya hisa ngu tona mhamba, e rweka mwanana wakwe Isaake, na ene a di tekile mndilo ni txikhwa e ñola manzani, se ve tsula vona vokha vavambidi.

⁷Sekoko Isaake a to womba ka tate wakwe Abrahamu, a txi khene: “Tata wangu!” Se Abrahamu a to xamula a txi khene: “Ngani wuwa, mwanangu!” Isaake a to wotisa a txi khene: “Hi ni mndilo ni tikhuni, se txi hani txihambana txa mhamba ya kuhiswa kani?”

⁸Abrahamu a to xamula, a txi khene: “Txizimu ngu txona txi no ti lulamisela txihambana txa kuya maha ngu txona mhamba ya kuhiswa, mwanangu.” Se va to tsula ngu wumbidi wawe.

⁹ Va to hoka ka wukhalo wu Txizimu txi nga ti ti va leletile ka wona; Abrahamu a to aka txiluvelo, e veketela tikhuni txitimwi ka txona, e sunga mwanana wakwe Isaake, e msanzeka ha ka tikhuni txitimwi ka txiluvelo.

¹⁰Se Abrahamu a to nawuluta dianza dakwe, e teka txikhwa, kasi kudaya mwanana wakwe.

¹¹Aniko ngu nzumani yi to kwangula Ngelozi ya MKOMA yi txi kha yona: “Abrahamu! Abrahamu!” Ene a to orovela, a txi khene: “Ni ho hawa!”

¹²Sekoko Ngelozi yi to kha yona: “U nga sanzeke dianza txitimwi ka mfana, kambe u nga mmahe txilo; nguko se na tiziva tito, ngu ditshuri, wa txi thava Txizimu, nguko khwa ni lambela mwanana wako, mwanana wako wammweyo.”

¹³Sekoko mbimo yile Abrahamu a nga gula maso, a to wona txihambana msana kwakwe, txi di khwekete ngu titxheho makhukhuni; Abrahamu a to ya teka txihambana txile, e txi ningela txi maha mhamba yo hiswa, txi txi tsiveta mwanana wakwe.

¹⁴Se Abrahamu a to raya wukhalo wule ditina do khene[41] “MKOMA a na ti wonela.” Kukhukhela konaho kala ka ditshiku da nyamsi, kudhanwa ku “Mmangoni Txizimu txi na ti wonela.”

¹⁵Sekoko ngu nzumani yi to kwangula ka wumbidi Ngelozi ya MKOMA ka Abrahamu

¹⁶ yi txi m'gela tiya: “Ni xambanyile ngu ngani nipune, kuwomba MKOMA, Nga ku u nga maha toneto, u nga mbi lamba ni mwanana wako wammweyo,

¹⁷ ni na kukatekisa, ni andisa liveleko lako, nga tinyeleti ta nzumani, ni ku nga mtxhefa mabambe ka linene; liveleko lako li na honyola madhoropa a valala va lona.

¹⁸ Se ngu ka liveleko lako yi na katekiswa yotshe mifumo ya ha mafuni, nguko u engisile dipswi dangu.”

¹⁹Sekoko Abrahamu a to tshumelela ka sithumi sakwe, se votshe va to tsula Bherisebha, ahawa Abrahamu a nga aka kona.

²⁰Ti di pindile totshe eto, Abrahamu a to gelwa ti to kha vona: Milka nene a m'velekete vanana mwananu Nahori.

²¹Uzi i ku matiwula, Bhuzi i ku mwanawe, ni Kemuweli, i ku tate wa Aramu,

²²ni Kesedhi, Hazo, Pildhasi, Jidhilafi ni Bhetuweli.

²³Se Bhetuweli a to veleka Rebheka; ngu vava va mtxhanu ni vararu, Milka a nga velekela Nahori, mwanawe Abrahamu.

²⁴Nahori a ti ni msikati wa txikaba, ditina dakwe i Rewuma, nene a mningile vanana i ku: Tebha, Gahamu, Tahasi ni Mahaka.