Read chopi Genesisi 23 Bible Online

Genesisi 23 - chopi bible

Genesisi 23

¹Sara a hanyile 127 wa malembe, aawa ngu ona malembe a kuhanya ka Sara

²se a fete Keriyate-Aribhe, i ku Hebroni, ditikoni ka Kanana. Abrahamu a to ya maha tifanelo ta madila ni kusaluka.

³Ngu msana, Abrahamu a to khukha ahawa mfi a nga ti kona eya womba ka vanana va Heti, a txi khene:

⁴ “Hagari kwanu ani ni muwuyi, ni mluveli, ni kombela wukhalo, kasi ku nave mathithani ko ni lumba, tito, ni na tshotsha kona mfi wangu.”

⁵Vanana va Heti va to xamula ka Abrahamu, va txi kha vona:

⁶“Hi engise, awe nyamne wathu: Awe u didhota da Txizimu hagari kwathu; tshotsha mfi wako ka diphala di i ku da lisima ka maphala athu; ni wammweyo kwathu kha na mbi kulambela diphala dakwe, kuva u tshotsha mfi wako ka dona.”

⁷Sekoko Abrahamu a to khukha a txi ema, e nama masoni ka vathu va ditiko, i ku vanana va Heti.

⁸A txi va gela ku khene: “Ngako ti txi mi tsakela ku ni teka mfi wangu ni txi ya mtshotsha, ni vhuneni ngu kuya ni kombelela ka Efroni, mwana Zowari,

⁹kasi ku a txi ni ninga diphala da Makipela, di kuho ngu magwito ka thembwe yakwe, a txi ni xavisela ngu mtengo wo dingana, di na maha diyiva do tshotsha ka dona, hagari kwanu.”

¹⁰Sekoko Efroni, a ti khalahatshile hagari ka vanana va Heti, konako Efroni, Muheti, a to xamula ka Abrahamu, na va txi mu engisa vanana va Heti, i ku votshe vale va nga ti wulela ngu ha txikeni ka didhoropa dakwe, a txi khene:

¹¹“Ahim-him, awe nyamne wangu, ni engise. Ani na kuninga thembwe, kumweko ni diphala di di ku ka yona, ni kuninga sotshe siya, masoni ka vanana va vathu vangu. Tshotsha mfi wako.”

¹²Sekoko Abrahamu a to nama masoni ka vathu va ditiko

¹³a txi womba ka Efroni, na a txi engiswa ngu vathu va ditiko, a txi khene: “Na kombela u txi ni engisa. Ni na kuninga male ya kuxava thembwe, yi amukele, se ni na ya tshotsha kona mfi wangu.”

¹⁴Efroni a to xamula a txi khene:

¹⁵“Nyamne wangu, ni engise: Thembwe ya kuteka 400 wa maxekele a silivhela, nji txani txonetxo hagari kwangu ni nawe kani? Tshotsha koneho mfi wako.”

¹⁶A di ti pfite eto Abrahamu ngu ka Efroni, Abrahamu a to mpimela male ya silivhela, yi a nga yi womba masoni ka vanana va Heti, ya 400 wa maxekele a silivhela, male yi nga ti ti thumiswa ka vaxavisi.

¹⁷Ngu toneto, thembwe ya Efroni, yi nga ti ti Makipela, masoni ka Mambre, thembwe ni diphala di di kuho ka yona, ni yotshe mindonga yi yi nga ti ti ho, mndani ka mihingano ya kona

¹⁸si to tsaniswa kulumba Abrahamu, masoni ka vanana va Heti, ka votshe vale va nga ti ti wulela ngu ha txikeni ka didhoropa dakwe.

¹⁹Ngu msana, Abrahamu a to tshotsha msikati wakwe Sara, ka diphala di di ku thembweni ka Makipela, masoni ka Mambre, i ku Hebroni, ditikoni ka Kanana.

²⁰Ngu toneto, ngu vanana va Heti, ku to tsaniswa ka Abrahamu kulumbwa ngu thembwe, ni diphala di di nga ti ti ka yona, kuva wukhalo wo tshotshela kona vafi.