Read chopi Genesisi 26 Bible Online

Genesisi 26 - chopi bible

Genesisi 26

¹Ku to humelela yimwani nzala ditikoni, hahanze ka nzala yo khata, yi nga humelela ka mbimo ya Abrahama, se Isaake a to tsula Gerara ka Abhimeleki, mfumeli wa Vafilista.

²MKOMA Txizimu a ti wonekisile ka Isaake, a txi m'gela tiya: “U nga relele u txi ya Egipta; zumba ka ditiko di ni no kukomba dona.

³U nga sikota kuaka ka ditiko diya, ani ni na va ni nawe, kambe ni na kukatekisa. Nguko otshe matiko awa ni na kuninga awe ni liveleko lako, ni txi hetisa txixambanyo txi ni nga txi maha ka Abrahamu, tate wako.

⁴ Ani ni na maha ti to liveleko lako li txi tala ha mafuni nga tinyeleti ta nzumani, otshe matiko awa ni na ninga vatukulu vako, se ngu mhaka yawe, mifumo yotshe ya ha mafuni yi na katekiswa,

⁵nguko Abrahamu a engisile dipswi dangu, kambe a veketile milayo yangu, sirumo sangu, ni sileleto sangu, ni mithetho yangu.”

⁶Ti di ngeto, Isaake a to zumba Gerara.

⁷ Se vavamna va wukhalo wule, va to mu wotisa madingano ni msikati wakwe, ene a to khene: I ndiyangu, ene a ti ti thava kuwomba tito: “Msikati wangu,” ngu kupimisa ti to vathu va wukhalowo, va nga m'daya ngu mhaka ya Rebheka, nguko ene a ti tshurile ngutu.

⁸Ku di pindile mbimo ya hombe koneyo, ngu txikhati txokari, Abhimeleki, mfumeli wa ditiko da Vafilista, ngako a txi solela hahanze ngu ha difasitelani, a to wona Isaake a txi khutarela Rebheka msikati wakwe.

⁹Sekoko Abhimeleki a to dhana Isaake a txi khene: “Kha ditshuri, ene msikati wako; ngu kutxani u txi khawe: I ndiyangu, kani?” Isaake a xamute a txi khene: “Ni ti ko thava kudawa ngu mhaka yakwe.”

¹⁰Abhimeleki a to engeta, a txi khene: “U hi mahete txani toneto kani? Kudotho nga m'thu wokari wa ka kwathu a di otete ni msikati wako, se konaho u ndi nava u di hi wuyisete mnandu.”

¹¹Se Abhimeleki a to veka mthetho ka vathu vakwe votshe, a txi khene: “Awule a no gwesa Isaake ni msikati wakwe a na dawa.”

¹²Isaake a dimile e phaya ka ditiko dile, se a txi elula ka dona dilembe dile,[53] so pinda ngu 100 ka sile a nga phaya, nguko MKOMA a mkatekisile.

¹³Ene a to khata kuhumelela e simama a txi kula kala kuza e maha nyatithombe wa hombe.

¹⁴Ene a ti ni mitxhambi ya tinvuta, tihomu to tala ni sithumi sasingi. Ngu mhaka ya toneto, Vafilista va to khata ku m'bavela.

¹⁵Sisima sotshe si si nga ti ketwe ngu sithumi sa Abrahamu, tate wakwe, Vafilista va to si kuletela, ve si tata ngu mafu.

¹⁶Abhimeleki a to womba ka Isaake, a txi khene: “Khukha ditikoni kwathu, nguko se u ni mtamo ngutu kupinda athu.”

¹⁷Sekoko Isaake a to khukha konaho, eya zima matenda akwe mkovani ka Gerara, e zumba kona.

¹⁸Isaake a to kuha sisima si si nga ti ketwe ngu sithumi sa Abrahamu tate wakwe, asi Vafilista va nga ti si kuletete, msana ka kufa ka Abrahamu, se va to si ninga kambe ona matina ale tate wakwe a nga ti si ningile.

¹⁹Sithumi sa Isaake si to kela mu mkovani, se si tumbula txisima txa mati o khulunga.

²⁰Vadyisi va niya Gerara, va to khata kuphikizana ni vadyisi va sifuyo sa Isaake, va txi kha vona: “Aawa mati athu!” Ti di ngeto, a to raya txisima txile[54] ditina daku i Eseki “Kuphikizana”: Nguko va phikizanile ni vadyisi ngu mhaka ya txisimetxo.

²¹Sekoko va to kela tximwani txisima, aho nikona, ku mahekile diguwa da kuphikizana ngu mhaka ya txisima; Isaake a txi rayile ditina daku,[55] i Sitina.

²²Ti di ngeto, Isaake a to khukha hale, eya kela tximwani txisima, aha ku nga mbi va ni kuphikizana, se e txi dhana ku i Rehobhoti,[56] a txi khene: “Nguko MKOMA a hi ningile wukhalo wo thandawuka, se hi na velekela ditikoni muwa.”

²³Koneyo, Isaake a to khukha a txi ya Bherisebha.

²⁴Se MKOMA a to woneka kwakwe ka wona wusiku wule, e m'gela tiya: “Ani ngani Txizimu txa Abrahamu, tate wako; u nga thave txilo, nguko ani nipune ni ni nawe. Ani ni na kukatekisa, ni na andisa liveleko lako, ngu mhaka ya Abrahamu txithumi txangu.”

²⁵Sekoko Isaake a to aka txiluvelo koneho, e dhumisa ditina da MKOMA, a txi zima ditenda dakwe; se sithumi sa Isaake, si to kela txisima kona hale.

²⁶ Abhimeleki a txi ta ngu Gerara a to wona Isaake, a di ni Okozati, mndoni wakwe, ni Fikoli, mthangeli yakwe ya dibutho da yimbi.

²⁷Isaake a to va wotisa, a txi khene: “Mi tela txani kwangu, anu mi ni vengako, na kambe mi ni tutumisile hagari kwanu, kani?”

²⁸Vona va to xamula, va txi kha vona: “Ha ti wona ngu ditshuri ti to MKOMA Txizimu, a ni nawe, se hi khathu: Ta laveka ti to athu ni nawe hi txi xambanyelana, hi txi maha txitumelelano hagari kwathu.

²⁹Hi thembise ti to khu na mbi hi mahela kubiha ni ka kudotho, nga ti nathu hi nga mbi kukaratisa, hi kuleka u khukha ngu kuthutha. Se u katekisilwe ngu MKOMA Txizimu.”

³⁰Sekoko Isaake a to va lulamisela m'buso, se vona ve dya, ve sela.

³¹Va to wuka ni mixo, ve mahelana txixambanyo. Ngu msana Isaake a to salisana navo, se vona va to khukha m'tini kwakwe ve msiya ngu kudikha.

³²Ngu ka donedo ditshiku, sithumi sa Isaake si to mu wuyisela m'biko wa txisima txi va nga kela, va txi kha vona: “Hi mani mati.”

³³Se txisimetxo,[57] Isaake a txi dhani ku i Sebha. Ngu konaho di khukhelako kona ditina da didhoropa,[58] daku i Bherisebha, kala ka ditshiku da nyamsi.

³⁴Mbimo yi Esawu a nga va ni tanga ya mune wa magumi a malembe, a to teka vasikati vambidi, i ku Judhite, mwana Bheyeri, Muheti, ni Bhasemate, mwana Eloni, Muheti.

³⁵Vona va to va nga sikarato mbiluni ka Isaake ni ka Rebheka.