Read chopi Genesisi 27 Bible Online

Genesisi 27 - chopi bible

Genesisi 27

¹Se Isaake a ti kumbile, ni maso akwe ma ti ti pfhupete aha koza ma si woni txilo, a to dhana Esawu, mwanana wakwe wa mkoma, a txi m'gela yiya: “Mwanangu!” Ene a to xamula, a txi khene: “Niho hawa.”

²Se Isaake, a txi khene: “Wona, se ni kumbile, ditshiku da kufa kwangu kha ni di zivi.”

³Konkuwa, teka matxhari ako a wuxoti, wulaho wako ni tingove, tsula txitingani u txi ya ni xotela nyama.

⁴Ngako u di mani txihari, u nata ni bhikela sakudya so tshamba, asi ni si dhundako, u txi ta naso, kasi ni nata dya ni txi kukatekisa, ni sinzi kufa.

⁵Rebheka a ti ti riyile nzeve, a txi engisela ati Isaake a nga txi womba-womba ni mwanakwe Esawu. Ti di ngeto, Esawu a to tsula txitingani kuya xotela tate wakwe.

⁶Sekoko Rebheka a to khene ka mwanakwe Jakobe: Ni engisile tate wako a txi womba-womba ni mwananu Esawu, a txi khene:

⁷“Ni tisele nyama, u txi ni mahela sakudya so tshamba, se ani ni na dya ni gwita ni txi kukatekisa, masoni ka MKOMA, ni sanzi kufa.”

⁸“Konkuwa koko, awe mwanangu engisisa mapswi angu, aya ni kurumako.”

⁹“Tsula txibalani u txi ya ni tisela tiphongo timbidi to tshura, se ni nata lulamisela tate wako sakudya so tshamba, nga ti ene a ti dhundisako tona.”

¹⁰“Awe u na ya mninga tate wako, kasi ku a na dya, e gwita a txi kukatekisa, a sinzi kufa.”

¹¹Sekoko Jakobe a to khene ka mwamwakwe Rebheka: “Mwanathu Esawu, ana ni mapfhepfheleti, aniko ani mmidi wangu mbwo swililika.”

¹²“Yimwani mbimo tate ana ni mbumbutela, a txi tiziva ti to ni mkanganyisile; se ni na ti tisela txiruko, ha wukhaloni ka kumana txikatekiso.”

¹³Mwamwakwe a to mxamula a txi khene: “Mwanangu, txiruko etxo txi na wele txitimwi kwangu; awe engisa tona ti ni kugelako, tsula u ya teka si ni nga si womba.”

¹⁴Jakobe a to tsula eya teka tiphongo e ta ningela ka mame wakwe, se ene e lulamisa sakudya sa sinene, asi si dhundwako ngu tate wa Jakobe.

¹⁵Msana keto, Rebheka a to teka[59] syambalo sa txhuko sa mwanakwe wa mkoma, Esawu, asi si nga ti ti ho nyumbani, a txi ambeka Jakobe, mwanana wakwe wa mnanda.

¹⁶A to mu ambalisa madhowo a tiphongo mawokoni kwakwe, ni mu ka thamo.

¹⁷Sekoko a to ningela ka mwanakwe Jakobe sakudya sile so tshamba ni dipawu, a nga ti si lulamisile.

¹⁸Jakobe a to tsula ka tate wakwe, a txi ya khene: “Tata!” Ene a to xamula a txi khene: “Womba! Ngawe mani kani mwanangu?”

¹⁹Jakobe a to xamula ka tate wakwe, a txi khene: “Ngani Esawu, mwanana wako wa matiwula; ni mahile ti u nga ni ruma. Wuka koko, u txi khalahatsha udya si ni nga ya xota, kasi ku u txi ni katekisa.”

²⁰Sekoko Isaake a to khene ka mwanana wakwe: “Ti mahisile kutxani ti to u si mana ngu kukuluveta kani mwanangu?” Ene a xamute a txi khene: “Nguko MKOMA, Txizimu txako, asi tisile kwangu.”

²¹Sekoko Isaake a to khene ka Jakobe: “Tshuketa hawa, ni na mana ku ku mbumbutela mwanangu, kasi kuziva ti to ngawe mwanangu Esawu, mwendo hi ngawe.”

²²Sekoko Jakobe a to tshuketa hafuhi ka tate wakwe Isaake, awu a nga mmbumbutela, a txi khene: “Dipswi nda Jakobe, aniko mawoko nga Esawu.”

²³Ene kha nga m'ziva, nguko mawoko akwe ma ti ni mapfhepfheleti nga a Esawu, mwanawe Jakobe, se Isaake a to mkatekisa.

²⁴A tshumete kambe a txi wotisa ku khene: “Ina ngawe Esawu mwanana wangu kani?” Ene a to xamula, a txi khene: “Ngani wuwa!”

²⁵Sekoko Isaake a to engeta, a txi khene: “Tisa hafuhi ni ta dya nyama yi u nga xota mwanangu, kasi ku ni txi ku katekisa.” Jakobe a to mninga sakudya e dya, a txi mninga kambe vhinya e sela.

²⁶Isaake tate wakwe a ti khene: “Tshuketa u ta ni pswopswa mwanangu.”

²⁷Ene a to tshuketa e pswopswa tate wakwe. Sekoko Isaake, ngako a txi pfa kubhumula ka syambalo sakwe, a to mkatekisa, a txi khene: “Hi nga pfani kubhumula ka mwanana wangu, kufana ni thembwe yi Txizimu txi nga yi katekisa.

²⁸Txizimu txi na ku nisela mwando wa nzumani, txi kuninga mafu o nona; ni kupfuna ka fulaho ni vhinya.

²⁹ Vathu va na kuthumele, mifumo yi na khizame masoni kwako. Maha mfumeli wa vananu, va na khizame masoni kwako vanana va mame wako. A na ruketelwe awule a no kuruketela, a na katekiswe awule a no kukatekisa.”

³⁰Ngako Isaake a di gwitile kukatekisa Jakobe, se Jakobe to khukha masoni ka tate wakwe Isaake, mwanawe Esawu a to bwaka a txi wuya ngu kuxotani.

³¹Nene a to lulamisa sakudya sa sinene, e si tisa ka tate wakwe. Esawu a to gela tate wakwe, a txi khene: “Tata, wuka u txi dya nyama yo xotwa ngu mwanana wako, kasi ku u txi ni katekisa!”

³²Isaake, tate wakwe, a to muwotisa, a txi khene: “Ngawe mani kani?” Esawu a to xamula, a txi khene: “Ngani Esawu, mwanana wako wa matiwula.”

³³Sekoko Isaake a to dhudhumela ngu kuhenya ka hombe ngutu, a txi khene: “I mani koko wule a nga xota nyama a txi ta ni ninga kani? Ani ni dyite sotshe na u sanzi kubwaka, se ni mkatekisile, kambe a na va a di katekile.”

³⁴Mbimo yi Esawu a nga engisa mapswi a tate wakwe, a to dila ngu mtamo, a txi pandiseka ngutu, a txi womba ka tate wakwe, a txi khene: “Tata, ni katekise nani.”

³⁵Aniko tate wakwe a xamute, a txi khene: “Jakobe mwananu a tile ngu wukanganyisi, se a tekile txikatekiso txako.”

³⁶Sekoko Esawu a to engeta, a txi khene: “Kha ditshuri, ngu tona tiya va nga mraya ngu tona ditina daku i Jakobe, nguko se nda wumbidi a txi ni dyelela. Kukhata a tekile wutiwula wangu, se konkuwa a tekile txikatekiso txangu.” Se a txi sanzekela mapswi a ku khene: “Ina khwa ni siyela ni txa tximwetxo txikatekiso kani?”

³⁷Sekoko Isaake, a to xamula ka Esawu, a txi khene: “Ani ni mmahile mfumeli wako, ni mningile votshe vanana-kulowe, ti to ve maha sithumi sakwe, ni mningile kambe fulaho ni vhinya. Se ni nga ku mahela txani kambe nawe, mwanangu, kani?”

³⁸ Esawu a to khene ka tate wakwe: “Ina njikatekiso tximwetxo dwe u ku natxo, kani tata? Tata, ni katekise nani!” Esawu a to peka huwa, a txi dila.

³⁹ Sekoko tate wa kona Isaake a to mxamula, a txi khene: “Wona taku m'ti wako wu na va wu di kule ni kunona ka mafu, wu si mani mwando wa nzumani.

⁴⁰ Awe u na hanya ngu ditxhari dako, u na thumela mnanda wako. Ku na maheka taku, mbimo yi u no ti txhatxhisa, sekoko u na funya dikange thamoni kwako.”

⁴¹Se Esawu a to khata kuvenga Jakobe mnanda wakwe, ngu mhaka ya txikatekiso txi tate wakwe a nga mninga, a txi pimisa ekha mbiluni kwakwe, a txi khene: “Masiku o na dila tate nguko a di fite, ma hafuhi; sekoko ni na daya mnanda wangu Jakobe.”

⁴²Mbimo yile Rebheka a nga geletelwa mapswi a Esawu, mwanana wakwe wa matiwula, ene a to dhana Jakobe mwanana wakwe wa mnanda, a txi m'gela tiya: Esawu, mkomwako a lava kuphota kwako, a lava ku kudaya.

⁴³Konkuwa, mwanangu, ni engise: Khukha, thava, u txi ya ka Labhani ndiyangu, ditikoni ka Harani;

⁴⁴zumba nayo masiku okari, kala kuza ku txi pinda kuhenya ka mkomwako,

⁴⁵txiza txi hola txiviti txakwe, a txi divala ti u nga mmahela; sekoko ni na rumela vathu ve ta kuteka. Nguko, ina ni nga mi saluka anu vanana vangu vavambidi ngu ditshiku dimwedo kani?

⁴⁶Rebheka a to womba ka Isaake, a txi khene: “Na dyiswa mihumbo kuhanyani kwangu, ngu mhaka ya vavasikati va Vaheti. Ngako Jakobe a txi teka msikati wa Muheti, ka dona ditiko diya, wo fana ni vona vava, ni nga va ni txi hanyela txani kani?”