Read chopi Genesisi 28 Bible Online

Genesisi 28 - chopi bible

Genesisi 28

¹Se Isaake a to dhana Jakobe, e mkatekisa a txi mninga mthetho wa ku khene: “U nga lowole msikati hagari ka vanana va Vakanana.

²Khukha u txi tsula Padhani-Aramu, nyumbani ka Bhetuweli, tate wa mame wako, u na ya langa kona msikati, hagari ka vanana va Labhani, ndiyakwe mame wako.

³Txizimu txa mtamo wotshe txi na ku katekise, txi txi kuninga liveleko lo tala, u txi anda, u txi maha tate wa tihunzu to mbi balwa.

⁴ Txizimu txi na ku ninge awe ni liveleko lako, kateko ya Abrahamu, kasiku u txi teka ditiko di u nga zumba ka dona, di maha dako, adi Txizimu txi nga ninga Abrahamu.”

⁵Isaake a to salisana ni Jakobe, se Jakobe a to teka nzila ya kuya Padhani-Aramu, m'tini ka Labhani, mwana Bhetuweli,[60] muaramu, ndiya ya Rebheka, mame wa Jakobe ni Esawu.

⁶Esawu a to tiziva ti to Isaake a katekisile Jakobe, ni tito, a mrumete ditikoni ka Padhani-Aramu, kasi ku eya teka kona msikati. Se ngako a di mkatekisile, a mningile kambe mthetho wa ku khene: “U nga teke msikati hagari ka vanana vo velekwa Kanana.”

⁷Jakobe a to engisa milayo ya tate wakwe ni ya mame wakwe, se e khukha a txi ya Padhani-Aramu.

⁸Esawu a ti zivile kambe ti to mahorana a Kanana kha ma tsakisi tate wakwe Isaake.

⁹A to tsula ka Ismayeli, eya teka Mahalati, mwanana wa muhorana wa Ismayeli, mwana Abrahamu, i ku ndiya ya Nabhayoti, a txi maha msikati wakwe, hahanze ka vale a nga ti navo ngu kale.

¹⁰Jakobe a to khukha Bherisebha e tsula Harani.

¹¹Se ngako a di hokile ka wukhalo wokari, a to navela kuhumula konaho, nguko se ditambo di ti swite. A to teka dirigwi dimwedo ka wona wukhalowo, e di maha txikhigelo txa msungo wakwe, a txi otela.

¹² Se a to lora a txi wona dinera di nga emiswa ha mafuni, di txi ya khigetela nzumani, ngu tshokani ka dona, se tingelozi ta Txizimu ti txi kwela ni kutxhika ngu dona.

¹³ Ngu txitimwi ka dinera MKOMA a ti emile, se, a txi khene: “Ani ngani MKOMA, Txizimu txa Abrahamu, tate wako, ni Txizimu txa Isaake. Ditiko di u nga otela ka dona, ani ni na di ningela kwako ni ka liveleko lako.

¹⁴ Liveleko lako li na tala nga lithulu la mafu, u na anda kala mswa-ditambo, ni wutxani, kala wuphemba ni wulambwe, ni tixaka totshe ta ha mafuni ti na katekiswa ngu mhaka yako ni mhaka ya liveleko lako.

¹⁵Ani ni ni nawe, kambe ni na kuxayisa hani ni hani u no maneka u di kona, ni na ku wuyisa ka ditiko diya, nguko kha ni na mbi kuleka na ni sinzi kumaha ati ni nga kugela.”

¹⁶Jakobe a to wuka ngu ha wukoheni kwakwe e womba tiya: “Kha ditshuri MKOMA a ho ka wukhalo wuwa, aniko ani ni si ti zivi.”

¹⁷A to talelwa ngu kuthava, a txi khene: “Wukhalo wuwa wa thisa ngutu! Ayiya ngu yona Nyumba ya Txizimu ni ditimba da nzumani.”

¹⁸Sekoko Jakobe a di wukile ni mixo, a to teka dirigwi di a nga ti di mahile txikhigelo, e di emisa di maha txialakanyiso, e thela mtona tximwi ka dona.

¹⁹Se wukhalo wuwa a wu rayile ditina daku[61] i Bheteli; kambe ditina da didhoropa dile, kale di ti dhanwa ku i Luzi.

²⁰Sekoko Jakobe a mahile txixambanyo txiya: Ngako Txizimu txi di ni nani, txi txi ni xayisa ka nzila yi ni ku ka yona, ngako txi txi ni ha sakudya sa kudingana, ni simaha sa kuambala;

²¹ngako ni txi tshumelela m'tini ka tate wangu ni di mtomi, konaho MKOMA a na va i di Txizimu txangu;

²²ni dirigwi diya ni ngadi emisa di txi maha txialakanyiso, di na va i di Nyumba ya Txizimu, sotshe si u no ni ninga, ni na ku humisela sa wugumi ka sona.