Read chopi Genesisi 29 Bible Online

Genesisi 29 - chopi bible

Genesisi 29

¹Sekoko Jakobe a to teka nzila ya kuya ka vathu va Wutxani.

²A to wona txisima libalani, hafuhi ka txona ku di mbambamete mitxhambi yiraru ya tinvuta; i ti ti ka txisima txonetxo va nga ti ti reka mati a kuninga mitxhambi yawe, yi txi sela. Dirigwi di va nga txi fenengeta ngu dona txisima i ti da hombe.

³Yi ti ti manana koneho yotshe mitxhambi, vadyisi va ti ti vhunungula dirigwi, va txi di thavisa ha txisofuni ka txisima, va txi rekelela mati a kuninga mitxhambi, yi sela, se ngu msana ve tshumela va txi di wuyisa ha wukhaloni ka dona.

⁴Jakobe a va wotisile a txi khene: “Vanathu, mi huma hani kani?” Va to xamula va txi kha vona: “Hi va Harani.”

⁵A to va wotisa kambe, a txi khene: “Ma m'ziva Labhani, mwana Nahori, kani?” Va to kha vona: “Ha m'ziva.”

⁶Jakobe a va wotisile kambe, a txi khene: “Ene wa hanya kha kwati kani?” Va to xamula kambe va txi kha vona: “Ina ene, wa hanya kha kwati. Wona, ndiyo Rakeli mwanana wakwe, a tako ni tinvuta.”

⁷Sekoko Jakobe a to va gela ku khene: “I ngadi mitshikari, hi nga mbimo yo sengeleta mitxhambi yi txi ya m'tini. Ningani mati sihari si txi sela, mi txi tshumela mi dyisa.”

⁸Va xamute va txi kha vona: “Kha hi ti mahi eto, na kusanzi kutshangana yotshe mitxhambi, ngako yi di tshanganile yotshe mitxhambi, ngu kona hi nga sikotako kurindilita dirigwi, hi di thavisa ha txisimani, hi ninga mati tinvuta ti sela.”

⁹Jakobe a di ngadi a txi bhula navo, Rakeli a to hoka ha txisimani ni mtxambi wa tinvuta ta tate wakwe, nguko ene i ti m'dyisi.

¹⁰Ngako Jakobe a di woni Rakeli, mwanana wa tatanyani wakwe Labhani, ni tinvuta ta tatanyani wakwe Labhani, a to tshuketa hafuhi ka txisima, e rindilita dirigwi ngu ha txisofuni ka txisima, e reka mati e ninga mtxhambi wa tinvuta ta tatanyani wakwe Labhani, ti txi sela.

¹¹Jakobe a to pswopswa Rakeli, se a txi kwangula, a txi dila.

¹²Sekoko Jakobe a to gela Rakeli, a txi khene: “Ani ni dixaka da tate wako, nguko ni mwanana wa Rebheka.” Sekoko Rakeli a to tutuma eya zivisa tate wakwe.

¹³Se ngako Labhani a di engisile ti to Jakobe, mwanana wa ndiyakwe, a to tutuma e m'hingeta, e mkhutarela ngu mawoko, a txi mpswopswa, e tsula nayo nyumbani kwakwe. Se Jakobe a to xawutela ka Labhani totshe ti ti nga maheka.

¹⁴Sekoko Labhani a to khene kwakwe: “Kunene awe ni nani hi dirambu dimwedo ni nyama yimweyo.” Se Jakobe a to zumba nayo, mtxima wumwewo wotshe.

¹⁵Se Labhani a to womba ka Jakobe, a txi khene: “Ina aku u ku dixaka, u nga ni thumela walo kani? Ni gele muholo wu u wu lavako.”

¹⁶Labhani a ti ni vanana vambidi vamahorana: “Mkomwakona a txi dhanwa ti to i Leya, ani mnanda i ti Rakeli.”

¹⁷“Kambe Leya a ti ni maso[62] o wumela, aniko Rakeli a ti ni txiemo txa txinene ni khohe yo tshura.”

¹⁸Jakobe a to randa Rakeli, se e xamula ka Labhani, a txi khene: “Ani ni na kuthumela mtxhanu wa malembe ni mambidi, ngu mhaka ya Rakeli, mwanana wako wa mnanda.”

¹⁹Sekoko Labhani a ti khene: “Ndinene ku mningela kwako, kupinda ku mningela ka nyamthuyo; awe zumba ni nani.”

²⁰Ngu kumaha keto, Jakobe a to thumela Rakeli mtxhanu wa malembe ni mambidi; malembe awa a ma woni i di masiku amadotho, nguko a ti ti mramda ngutu.

²¹Se Jakobe a to womba ka Labhani, a txi khene: “Ni ninge msikati wangu, nguko yi gumile mbimo yi hi nga langana, kasiku ani ni txi tekana nayo.”

²²Sekoko Labhani a to ramba vathu va wukhalowo, e va mahela m'buso.

²³Aniko ni wusiku Labhani a to teka Leya mwanana wakwe wa mkoma e mu heleketa ka Jakobe, awu a nga mu amukela, e otela nayo.

²⁴Labhani a to mninga Zilpa, txithumi txakwe, kasiku e maha txithumi txa Leya, mwanana wakwe.

²⁵Mangwanani ka kona ni mixo, Jakobe a to wona ti to i Leya a nga ningwa, se Jakobe a to womba ka Labhani, a txi khene: “Njitxani u nga ni mahela kani? Ina kasi ani kha na thumela Rakeli m'tini kwako kani? Ngu kutxani u txi ni kanganyisa kani?”

²⁶Labhani a to xamula, a txi khene: “Kha ti maheki mu ditikoni kwathu, kuthanga mnanda e tsula wukati, na mkomwa kona a sanzi kutekwa.

²⁷Awe heta divhiki diya da mtekano, sekoko ni na kuninga kambe mnanda wa kona, u txi mthumela nene mtxhanu wa malembe ni mambidi.”

²⁸Se Jakobe a to maha toneto, e heta divhiki da Leya. Se ngako di di gumile divhiki da Leya; sekoko Labhani a to mninga Rakeli, eva msikati wa Jakobe.

²⁹Labhani a to ningela kambe txithumi txakwe Bhiliha ka Rakeli kasiku e maha txithumi txakwe nene.

³⁰Jakobe a to ziva kambe Rakeli, awu a nga mranda ngutu kupinda Leya; se a txi thuma kambe mamwani malembe a mtxhanu ni mambidi, m'tini ka Labani.

³¹Txizimu ngako txi di woni ti to Leya kha randwi, txi to mninga kuveleka, kasi Rakeli a zumbile i di txifule.

³²Leya a to mana txirumbu e veleka mwanana wa mfana, awu a nga mraya ditina daku[63] i Rubheni, nguko, ene a wombile ku khene: “Txizimu txi woni kupandiseka kwangu. Konkuwa, mwamna wangu a na ni randa.”

³³Se a to mana kambe txirumbu e veleka mwanana wa mfana, a txi khene: “MKOMA a engisile ti to ani kha ni randwi, se e ni ninga kambe wuwa. Se a to mraya ditina daku[64] i Simiyoni.”

³⁴A to engeta kambe e mana txirumbu txa wuraru, e veleka mmwani mwanana, a txi khene: “Konkuwa mwamna wangu a na namarela kwangu, nguko ni m'velekete mazambi mararu, ngu kumaha keto, a to mraya ditina daku[65] i Levhi.”

³⁵A to engeta kambe e mana txirumbu txa wumune, e veleka mwanana wa mfana, a txi khene: “Konkuwa ni na dhumisa MKOMA Txizimu.” Ngu mhaka yeto a mrayile ditina daku[66] i Judha. Sekoko a to leka kuveleka.